Daniel 10 - BAIBLO ALOO NGMAMI KLƆUKLƆU Ɔ

Daniel na nina ko ngɛ Tigris pa a he

¹ Benɛ Sirus ngɛ matsɛ yee ngɛ Persia a, jeha etɛne ɔ mi ɔ, Daniel ná sɛ gbi ko. Daniel biɛ kpa ji Belteshazar. Sɛ gbi nɛ ɔ kɔɔ sane yaya ko nɛ maa ba hwɔɔ se he; e kɔɔ ta ngua ko he. Nɛ a tsɔɔ lɛ sisi kɛ gu nina mi.

² Jamɛ a be ɔ mi ɔ, imi Daniel, i ngɛ kɔmɔ yee otsi etɛ.

³ I yi niye ní kpakpa ko, i yi lo; dã yɛ ye nya mi, nɛ i kpa we nu kɛ ya si otsi etɛ ɔ tsuo be.

⁴ Kekleekle nyɔhiɔ ɔ we ligbi nɛ ji nyingmi enyɔ kɛ eywiɛ ɔ, i daa si ngɛ Tigris pa ngua a tue.

⁵ Benɛ i wo ye yi nɔ ma hyɛ ɔ, nyumu ko ji nɛ ɔ nɛ ha kploba kɛ e mlɛ mi sika tsu mlɛ mi fimi nɔ.

⁶ E nɔmlɔ tso ɔ ngɛ kpɛe kaa tɛ nɛ he jua wa. E hɛ mi ngɛ kpɛe kaa oslabai nɛ gba, nɛ e hɛngmɛhi ngɛ kaa jatɛ nɛ a su. E kɔnihi kɛ e nanehi ngɛ kpɛe kaa akɔblee nɛ a sa he, nɛ e gbi ngɛ kaa nimli babauu a gbi.

⁷ Imi nɔ kake too lɛ i na nina nɛ ɔ nɛ. Nyumuhi nɛ piɛ ye he ɔ, mɛɛ a nɛ nina nɛ ɔ, se kɛ̃ ɔ, a tsui po nɛ a tu fo ya laa a he,

⁸ nɛ e piɛ imi nɔ kake too. Benɛ i na nyakpɛ nina nɛ ɔ, ye he wami ta, nɛ i gbɔjɔ. Ye hɛ mi tsake amlɔ bɔ nɛ nɔ ko be ye mi tso lee.

⁹ Kɛkɛ nɛ e tu munyu. Se benɛ i nu e gbi ɔ, i sɛ diblii mi, nɛ i kɛ ye hɛ mi bu si.

¹⁰ Tlukaa a, nɔ ko ba fua mi, nɛ e wo ye nɔ kɛ kpla si ngɛ ye nakutso nya, nɛ i kɛ ye ninehi pi zugba. Jamɛ a be ɔ mi tsuo ye he ngɛ doe blibliibli.

¹¹ Nɔ ɔ de mi ke, “Daniel, Mawu suɔ o sane. Moo te nɛ o da si, nɛ o bu nɔ́ nɛ ma de mo ɔ tue saminya. A tsɔ mi o ngɔ.” Benɛ e kɛ mi tu munyu nɛ ɔ, i te da si nɛ́ ye he ngɛ doe kɛ mwɔɔ.

¹² Kɛkɛ nɛ e de mi ke, “Daniel, koo ye gbeye. Kɛ je kekleekle ligbi ɔ nɛ o to kaa o maa ba o he si ha o Mawu ɔ, konɛ o nu níhi a sisi ɔ, jamɛ a be ɔ tɔɔ Mawu nu o kue fami ɔ. Nɛ lɔ ɔ he i ba hiɛ ɔ nɛ.

¹³ Ganɔ ɔ nɛ buu Persia nɔ yemi ɔ he ɔ tsi mi blɔ ligbi nyingmi enyɔ kɛ kake. Se Mikael, nɛ ji ganɔ nikɔtɔma amɛ a ti nɔ kake ɔ ba piɛ ye he; ejakaa imi nɔ kake too pɛ a si ngɛ Persia matsɛ ɔ he.

¹⁴ I ba, konɛ ma ba tsɔɔ mo nɔ́ nɛ maa ba o ma a nɔ hwɔɔ se, ejakaa nina a kɔɔ hwɔɔ se níhi a he.”

¹⁵ Benɛ e tu munyu nɛ ɔ, i ma ye yi si, nɛ i pee dii.

¹⁶ Tlukaa a, nɔ ko nɛ ngɛ kaa nɔmlɔ ta ye nya he. Kɛkɛ nɛ i pa ye nya mi nɛ i tu munyu. I de nɔ nɛ daa si ngɛ ye kasa nya a ke, “Ye nyɔmtsɛ, nina nɛ ɔ ha nɛ ye he mi po, nɛ i gbɔjɔ.

¹⁷ I ngɛ kaa nyɔguɛ nɛ daa si ngɛ e nyɔmtsɛ hɛ mi. Kɛ ma pee kɛɛ nɛ ma nyɛ nɛ i kɛ mo nɛ tu munyu? Amlɔ nɛ ɔ, ye he wami ta, nɛ mumi ko mumi ko be ye mi.”

¹⁸ Kɛkɛ nɛ nɔ ɔ ta ye he ekohu, nɛ ye he wami ɔ kpale ba.

¹⁹ E de mi ke, “Mo he manye! Mawu suɔ o sane saminya. Koo ye gbeye! Ko ha nɛ nɔ́ ko nɛ hao mo!” Benɛ e kɛ mi tu munyu nɛ ɔ, i na he wami he, nɛ i de lɛ ke, “Ye nyɔmtsɛ! I kpa mo pɛɛ, nɔ́ nɛ ngɛ o nya a, de mi; ejakaa o ha nɛ i na he wami.”

^20-21 Kɛkɛ nɛ e de mi ke, “Anɛ o le nɔ́ nɛ he je nɛ i ba o ngɔ ɔ? I ba konɛ ma ba tsɔɔ mo nɔ́ nɛ a ngma ngɛ anɔkuale womi ɔ mi. Amlɔ nɛ ɔ, ma kpale ye se, nɛ i kɛ ganɔ ɔ nɛ buu Persia he ɔ ma ya hwu ta. Pee se ɔ, ganɔ ɔ nɛ buu Hela he ɔ maa ba. Nɔ ko nɔ ko be nɛ maa piɛ ye he, pe ganɔ ɔ nɛ buu Israel he, nɛ a tsɛɛ lɛ Mikael ɔ kɛkɛ.