Amos 7 - BAIBLO ALOO NGMAMI KLƆUKLƆU Ɔ

Baalɛhi a he nina

¹ Nɔ́ ko nɛ Nyɔmtsɛ Yawɛ je ngɔ tsɔɔ mi ngɛ nina mi ji nɛ ɔ nɛ. I na lɛ nɛ e ngɛ baalɛhi babauu bɔe be mi nɛ a poo nga kɛ ha matsɛ ɔ ta. Jamɛ a be ɔ mi nɔuu lɛ nga mumu bɔni puɛmi ekohu.

² Benɛ baalɛ ɔmɛ miɔ nɛ a ma kpe nga mumu ɔ tsuo ta zugba a nɔ ɔ, i fa kue ha Nyɔmtsɛ Yawɛ ke, “Nyɔmtsɛ Yawɛ, i kpa mo pɛɛ, ngɔɔ o ma a he yayami ɔ kɛ pa mɛ! Kɛ o ma a maa pee kɛɛ nɛ a yi ma na wami? Israel ɔ, ma wayoo kɛkɛ ji mɛ; a he wɛ tsɔ ko!”

³ Kɛkɛ nɛ Yawɛ tsake e yi mi tomi ɔ, nɛ e de ke, “Dɛbi, nɔ́ nɛ o na a be mi bae.”

La he nina

⁴ Nɔ́ kpa ko nɛ Nyɔmtsɛ Yawɛ je ngɔ tsɔɔ mi ngɛ nina mi ji nɛ ɔ nɛ: Nyɔmtsɛ Yawɛ tsɔɔ mi bɔ nɛ e ngɔ la kɛ gbla e ma a tue. La a sã muɔ voo ɔ nɛ ngɛ zugba a sisi ɔ, nɛ e bɔni zugba a hu sami.

⁵ Kɛkɛ nɛ i fa kue ha Nyɔmtsɛ Yawɛ ke, “Nyɔmtsɛ Yawɛ lee, i kpa mo pɛɛ, ha nɛ la a se nɛ po! Kɛ o ma a maa pee kɛɛ nɛ a yi ma na wami? Israel ɔ, ma wayoo kɛkɛ ji mɛ; a he wɛ tsɔ ko!”

⁶ Kɛkɛ nɛ Yawɛ tsake e yi mi tomi ɔ, nɛ e de ke, “Enɛ ɔ hu be mi bae!”

Sumui kɛ e nya kpa a he nina

⁷ Jehanɛ, nɔ́ kpa ko hu nɛ Nyɔmtsɛ ɔ je ngɔ tsɔɔ mi ngɛ nina mi ji nɛ ɔ nɛ. I na Nyɔmtsɛ ɔ nɛ e hɛɛ sumui kɛ e nya kpa kɛ daa si ngɛ gbogbo ko he.

⁸ E bi mi ke, “Amos, mɛni o na?” I he nɔ ke, “Sumui kɛ e nya kpa.” Kɛkɛ nɛ e de mi ke, “I ngɔ sumui kɛ e nya kpa nɛ ɔ kɛ ngɛ ye ma Israel ɔ susue kaa a susuɔ gbogbo. Enɛ ɔ he je ɔ, i be ye yi mi tomi ɔ tsakee hu; ja i gbla a tue kokooko!

⁹ A ma kpata hehi tsuo nɛ Isak nina a jaa mi ngɛ ɔ a hɛ mi. Israel he klɔuklɔu ɔmɛ maa pee kaa kuku nɔ, nɛ ma ha nɛ Yeroboam matsɛ yemi ɔ se maa po.”

Amos kɛ Amazia

¹⁰ Osɔfo ko nɛ a tsɛɛ lɛ Amazia hi Mawu we ɔ ngɛ Betel. Ligbi ko ɔ, e tsɔ ya de Israel matsɛ, Yeroboam ke, “Amos ngɛ yi mi yaya toe kɛ wo o he ngɛ mo nitsɛ o nɔ yemi he ɔ. Munyuhi nɛ e ngɛ tue ɔ ma ha nɛ ma mi bi ɔmɛ maa te si kɛ wo mo, a matsɛ ɔ. Ke e ba mi ja a, kɛkɛ pe ma a ywia a nɛ.

¹¹ Nɔ́ nɛ Amos ngɛ dee ji, mo nɛnɛ ɔ, o ma gbo ngɛ ta mi. Se Israel ma a lɛɛ a maa nuu mɛ nyɔguɛ kɛ maa je a zugba a nɔ kɛ ho.”

¹² Jehanɛ, Amazia de Amos ke, “E maa hi kaa o je ma nɛ ɔ mi nɔuu kɛ ho Yuda ya. Yaa nɛ o ya gba ngɛ lejɛ ɔ, nɛ o na o nya mi ngma.

¹³ Se Betel ma nɛ ɔ mi lɛɛ o be hie nɛ o kɛ gba hu gblegbleegble. Ejakaa hiɛmɛ nɛ ɔ lɛ matsɛ ɔ jaa Mawu ngɛ; hiɛmɛ nɛ ɔ ji ma a tsuo a jami he klɔuklɔu.”

¹⁴ Kɛkɛ nɛ Amos he nɔ nɛ e de Amazia ke, “Pi gbalɔ ji mi, nɛ pi gbalɔ bi ji mi hulɔ. To hyɛlɔ ji mi, nɛ i tsuɔ ngmɔkɔ tso he ní.

¹⁵ Se Yawɛ je mi kɛ je to ɔmɛ a he, nɛ e tsɔ mi ke ma ngɔ sɛ gbi ya ha e ma Israel.

¹⁶ Lɔ ɔ he ɔ, nyɛɛ bu nɔ́ nɛ Yawɛ ngɛ dee ɔ tue. Nyɛ ke ma kpa gbami, nɛ ma ko tu munyu kɛ si Israel ma a hu.

¹⁷ Enɛ ɔ he je ɔ, Amazia, Yawɛ ngɛ mo dee ke, ‘O bimɛ ma gbo ngɛ ta nga nɔ. He nyɛli ma ba ngɔ o ma a, nɛ o zugba a maa pee ni kpahi a nɔ nɛ a maa dla. O yo maa bɔ ajuama ngɛ ma a mi, nɛ mo nitsɛ lɛɛ a maa ngɔ mo kɛ ho, nɛ o ma ya gbo ngɛ ma se. A maa nuu Israel bi ɔmɛ nyɔguɛ kɛ maa ho.’ ”