Amos 6 - BAIBLO ALOO NGMAMI KLƆUKLƆU Ɔ

Yawɛ ma kpata Israel hɛ mi

¹ Nyɛ nihi nɛ nyɛ he mi jɔ nyɛ ngɛ Zion, kɛ nyɛ Samaria bi nɛ e peeɔ nyɛ kaa nɔ́ ko he hia we nyɛ, musu tloo nyɛ! Nyɛ Israel ma kpetekpleenyɛ nɛ ɔ mi ganɔhi nɛ ma a mi bi ba biɔ yemi kɛ buami ngɛ nyɛ ngɔ, musu tloo nyɛ!

² Nyɛ deɔ nyɛ ma mi bi ɔmɛ ke, “Nyɛɛ ya nɛ nyɛ ya hyɛ Kalne ma a, Hamat ma nguaa a, kɛ Filisti bi a ma nɛ a tsɛɛ Gat ɔ. Sa a, ma nɛ ɔmɛ kle agboagbo, nɛ a ngɛ he wami hu pe Yuda kɛ Israel nɔ yemi he ɔmɛ. Se amlɔ nɛ ɔ lɛɛ nyɛɛ hyɛ mɛ ha!”

³ Nyɛ susuɔ kaa nyɛ tsitsɛɛ haomi be ɔ yi se kɛ ya tsitsaa. Se níhi nɛ nyɛ ngɛ pee ɔ mohu ma ha nɛ nimli basabasahi maa ba, nɛ a ma ba kpata nyɛ hɛ mi.

⁴ Nyɛ nihi nɛ nyɛ jualeɔ nyɛ se ngɛ sa tso kpakpahi nɛ a he jua wa a nɔ, nɛ nyɛ yeɔ jijɔ, kɛ na kpakpahi a lo, musu tloo nyɛ!

⁵ Nyɛ suɔ kaa nyɛ maa po lahi kaa bɔ nɛ David pee ɔ, nɛ nyɛɛ fia la amɛ ngɛ kpa sakuhi a nɔ.

⁶ Nyɛ nuɔ dã bami ngɛ tsimi agboagbohi a mi, nɛ nyɛ kpaa nu je via kpakpahi. Se nyɛ yi kɔmɔ kaa a ma kpata Israel hɛ mi.

⁷ Enɛ ɔ he je ɔ, nyɛ ji kekleekle nihi nɛ a maa nuu nyɔguɛ kɛ ho. Nɛ nyɛ bua jɔmi ɔ se maa po.

⁸ Yawɛ Tabohiatsɛ Mawu ɔ ka e he kita ke, “Israel bi ɔmɛ a he nɔ womi ɔ, i hiee; a mɔ nguangua amɛ hu, i sume. Ma ngɔ a matsɛ ma a, kɛ e mi níhi tsuo kɛ ha a he nyɛli.”

⁹ Ke nihi nyɔngma ya laa a he ngɛ we ko mi, nɛ a susu kaa a ye a he ɔ, mɛ hu a ma gbo ja nɔuu.

¹⁰ Ke nɔ nɛ gbo ɔ tsɛko, kɛ weku ɔ mi nɔ kpa ko ba nɛ a ba ngɔ gbogboe ɔ, a ma bi nɔ nɛ ya laa e he ngɛ tsu ɔ mi ke, “Anɛ nɔ ko piɛ o he ngɛ tsu ɔ mi kɛ mwɔɔ lo?” Ke nɔ ɔ he nɔ ke, “Dɛbi!” ɔ, weku no ɔ nɛ ma gbogboe ɔ ngɔmi ɔ ma de lɛ ke, “Pee dii! Wa ko wo Yawɛ biɛ ta nɛ e ba nu.”

¹¹ Lɔ ɔ he ɔ, ke Yawɛ wo gbi ɔ, a maa ku we nguangua amɛ, kɛ wawi ɔmɛ tsuo ngɔ pue si.

¹² Anɛ okpɔngɔhi ma nyɛ maa tu fo ngɛ tɛ sa nɔ lo? Dɛbi! Anɛ nɔ ko ma nyɛ ma hu wo mi kɛ na kpakplaa lo? Dɛbi! Se nyɛɛ lɛɛ nyɛ tsake dami sane yemi kɛ pee duɔ; nyɛ tsake nɔ́ nɛ da kɛ pee nɔ́ nɛ dɛ.

¹³ Nyɛ woɔ nyɛ he nɔ, ejakaa nyɛ ngɔ Lodebar ma a. Nyɛ fĩaa nɛ nyɛ deɔ ke, “Wɔ nitsɛmɛ wa he wami nya nɛ wa ngɔ Karnaim ɔ nɛ.”

¹⁴ Se Yawɛ Tabohiatsɛ Mawu ɔ nitsɛ ke, “Israel bi, ma ha nɛ je ma ko ma ba tua nyɛ zugba a, nɛ a maa hao nyɛ. A maa ngɔ nyɛ zugba a kɛ maa je Hamat yo kpɛ blɔ ɔ he, ngɛ omleyi je, kɛ ma ya ta Ngo wo ɔ he, ngɛ leneyi je.”