Amos 3 - BAIBLO ALOO NGMAMI KLƆUKLƆU Ɔ

¹ Nyɛ Israel bi! Nyɛ ma a tsuo nɛ Yawɛ je kɛ je Egipt zugba a nɔ ɔ, nyɛɛ bu nɔ́ nɛ Yawɛ ngɛ dee ngɛ nyɛ he ɔ tue.

² Yawɛ ke, “Ngɛ je ma amɛ tsuo a kpɛti ɔ, nyɛ pɛ ji ma nɛ i je blɔ hla, nɛ i ngɛ nɔ hyɛe. Enɛ ɔ ha nɛ nyɛ he yayami ɔ kle agbo, nɛ e hia kaa ma gbla nyɛ tue wawɛɛ nitsɛ.”

Nɔ́ nɛ Mawu gbalɔ ɔ tsuɔ

³ Anɛ ni enyɔ hiaa blɔ nɛ a wui a sibi si ke a maa kpe ngɛ hiɛ, loo hiɛ lo? Dɛbi!

⁴ Anɛ jata huãã ngɛ pu mi be mi nɛ e nɛ de lo lo? Anɛ jata bi huãã ngɛ muɔ mi be mi nɛ e nui lohwe ko lo? Dɛbi!

⁵ Anɛ lohwe pɛlitsɛ duɔ klama nɛ a kɛ lo kɔɛ nya lo? Anɛ klama fɛɔ be mi nɛ nɔ́ ko sɛ he lo? Dɛbi!

⁶ Anɛ ta titimati pɛɛ ngɛ ma mi nɛ ma mi bi ɔmɛ a tsui pui lo? Anɛ amanehlu baa ma ko nɔ nɛ pi Yawɛ nɛ pee lo? Dɛbi!

⁷ Anɛ Nyɔmtsɛ Mawu pee nɔ́ ko hyɛ nɛ e ha we nɛ e tsɔli ɔmɛ, nɛ ji gbali ɔmɛ nɛ a le lo? Dɛbi!

⁸ Ke jata ngɛ huãe ɔ, mɛnɔ lɛ e tsui pui? Ke Yawɛ ngɛ munyu tue ɔ, mɛnɔ ma kua ke e be e sɛ gbi ɔ fiɛe? Nɔ ko nɔ ko be!

A kpata Samaria hɛ mi

⁹ Mawu de gbalɔ ɔ ke e tsɔ nɛ a ya de nihi nɛ a ngɛ mɔ nguanguahi a mi ngɛ Egipt kɛ Ashdod ke, “Nyɛ ya bua nyɛ he nya ngɛ yo ɔmɛ nɛ bɔle Samaria a nɔ, nɛ́ nyɛɛ hyɛ yayamihi nɛ a ngɛ pee ngɛ lejɛ ɔ, kɛ bɔ nɛ lejɛ ɔ pee basabasa ha.”

¹⁰ Yawɛ ke, “Nimli nɛ ɔmɛ a mɔ ɔmɛ hyi tɔ kɛ níhi nɛ a gu ju kɛ yi mi wami blɔhi a nɔ kpɔ ngɛ nihi a dɛ. Bɔ nɛ a yeɔ anɔkuale po, a li.

¹¹ Lɔ ɔ he ɔ, he nyɛli ma ba sa ma a yi. A maa ywia a mɔ ɔmɛ, nɛ a maa ha ní ngɛ a we saminyawiiwi ɔmɛ a mi.”

¹² Yawɛ ke, “Ke jata ye lohwe ko ta a, to hyɛlɔ ɔ ngɔɔ lohwe ɔ nane enyɔ, aloo e tue kake pɛ nɛ piɛ ɔ kɛ ba yeɔ odase. Samaria ma mi bi ɔmɛ nɛ mwɔnɛ nɛ ɔ a ngɛ mle yee ngɛ sa tso bɔdɔbɔdɔhi a nɔ ɔ, jã kɛ̃ lɛ a ma he a ti nihi bɔɔ pɛ a yi wami.”

¹³ Yawɛ Tabohiatsɛ ɔ ke, “Lɔ ɔ he ɔ, nyɛɛ bu tue, konɛ nyɛɛ bɔ Yakob nina a kɔkɔ.

¹⁴ Ligbi ɔ nɛ ma gbla Israel tue ngɛ a yayami ɔmɛ a he ɔ, ma ywia bɔ sami la tɛ ɔmɛ ngɛ Betel ma a mi. Bɔ sami la tɛ ɔmɛ a he koli ɔmɛ nɛ a saa we ngɛ a he ɔ, ma ku mɛ tsuo ngɔ pue si.

¹⁵ Ma ku wehi nɛ ngɛ ma amɛ, kɛ kɔpe ɔmɛ a mi ɔ ngɔ pue si. Wehi nɛ a kɛ suɔ wu dla a mi ɔ maa hule pue si, nɛ wehi babauu a hɛ mi ma kpata.” Yawɛ lɛ de.