Amos 2 - BAIBLO ALOO NGMAMI KLƆUKLƆU Ɔ

Moab

¹ Yawɛ ke, “Moab ma mi bi ɔmɛ pee yayamihi nɔtonɔto babauu. A pue Edom matsɛ ɔ hɛ mi si; a sã e wuhi, nɛ a wɛɛ mɛ mɔnyɔmɔnyɔ kɛ pee kalo. Enɛ ɔ he je ɔ, ja i gbla a tue kokooko.

² Ma mɛ Moab zugba a, kɛ Keriot mɔ ɔmɛ a he la. Be mi nɛ ta a pee hoo, nɛ ta buli he ose, nɛ titimatihi ngɛ pɛe ɔ, Moab ma mi bi ɔmɛ ma gbo ngɔ pue si.

³ Ma gbe Moab matsɛ ɔ, kɛ e ganɔ ɔmɛ tsuo.”

Yuda

⁴ Yawɛ ke, “Yuda ma mi bi ɔmɛ pee yayamihi nɔtonɔto babauu. A yi imi Yawɛ, ye mlaa amɛ a nɔ fɛɛ. Yaka mawuhi nɛ a nɛmɛ ɔmɛ sɔmɔ ɔ, jamɛ a mawu ɔmɛ nɔuu a se lɛ a ya nyɛɛ. Enɛ ɔ he je ɔ, ja i gbla a tue kokooko.

⁵ Ma mɛ Yuda ma a, kɛ Yerusalem mɔ ɔmɛ a he la.”

Mawu maa gbla Israel hu tue

⁶ Yawɛ ke, “Nyɛ Israel ma, nyɛ pee yayamihi nɔtonɔto babauu. Nimli kpakpahi nɛ a hɛɛ hiɔ, kɛ dɛgutsɛmɛ nɛ a nyɛ we nɛ a wo tokota nane hiɛ kɛ hiɛ he hiɔ ɔ, nyɛ juaa mɛ kaa nyɔguɛhi. Enɛ ɔmɛ a he je ɔ, ja i gbla nyɛ tue.

⁷ Nyɛ niatsɛmɛ ɔmɛ hlaa kaa a ye ohiatsɛmɛ amimi daa; ke ohiatsɛ ngɛ amanehlu mi, kɛkɛ niatsɛ bua jɔ. Nɔ kɛ e tsɛ po kɛ nyɔguɛ yo kake naa bɔmi, nɛ a kɛ nɔ́ nɛ ɔ peemi bleɔ ye biɛ klɔuklɔu ɔ.

⁸ Ngɛ nyɛ jami he ɔmɛ tsuo ɔ, bohi nɛ ohiatsɛmɛ kɛ ba toɔ nyɛ awaba a, jamɛ a bo ɔmɛ a nɔ nyɛ hwɔɔ. Dã nɛ nyɛ nuɔ ngɛ imi Mawu, ye we ɔ ji dã nɛ nyɛ heɔ ngɛ nihi nɛ nyɛ bu mɛ fɔ ɔ a dɛ.”

⁹ Yawɛ ya nɔ nɛ e de ke, “Nɛ, nyɛ ye ma! Nyɛ he ɔ, i kpata nyɛ he nyɛli nɛ ji Amor bi ɔmɛ a hɛ mi pɛsɛpɛsɛ. Nimli nɛ ɔmɛ ka gagaaga kaa seda tsohi, nɛ a he wa kaa tso nguahi.

¹⁰ Imi lɛ i je nyɛ kɛ je Egipt bi ɔmɛ a zugba a nɔ ɔ nɛ. I kpaka nyɛ kɛ gu nga a nɔ jeha nyingmi eywiɛ, nɛ i ngɔ Amor bi ɔmɛ a zugba a kɛ ha nyɛ, nɛ e ba pee nyɛ nɔ́.

¹¹ I hla nyɛ binyumu ɔmɛ ekomɛ nɛ i pee mɛ gbali. I pee nyɛ nihewi ɔmɛ ekomɛ Nazir bi.

¹² Se nyɛ ha nɛ Nazir bi ɔmɛ nu dã, nɛ a puɛ kɔ; gbali ɔmɛ hu, nyɛ wo mɛ mlaa ke a ko de ye sɛ gbi ɔ. Ye ma Israel, anɛ nɔ́ nɛ ɔ be mi lo? Imi Yawɛ lɛ i ngɛ nyɛ bie!

¹³ “Lɔ ɔ he ɔ, ma gbla nyɛ tue, nɛ nyɛ ma kɛmɛ kaa bɔ nɛ tlɔɔke kɛmɛɛ ke a wo lɛ ngma nɛ́ e hyi kɛ be nɔ ɔ.

¹⁴ Nyɛ kpɛti nihi nɛ a he sɔɔ po be nyɛe nɛ a tu fo kɛ je. Nihi nɛ a he wa a ma gbɔjɔ; nɛ ta buli ɔmɛ be nyɛe nɛ a he mɛ nitsɛmɛ a yi wami.

¹⁵ Kɛ̃ɛ̃ tsɛ̃li maa gbee senyasenya; ni nɛmɛ nɛ a nane nya sɔɔ a he be mi jee, nɛ ta buli ngɛ ta okpɔngɔhi a nɔ po a yi be wami nae.

¹⁶ Ligbi ɔ nɛ ma gbla ma a tue ɔ, ta buli katsɛmɛ kpakpahi po maa ngmɛɛ a ta hwumi ní ɔmɛ a he kɛ fɔ si, nɛ a maa tu fo.” Bɔ nɛ Yawɛ de ji nɛ ɔ nɛ.