Amos 1 - BAIBLO ALOO NGMAMI KLƆUKLƆU Ɔ

¹ To hyɛlɔ ɔ nɛ a tsɛɛ lɛ Amos, nɛ je Tekoa ma a mi ɔ, e munyuhi ji nɛ ɔmɛ nɛ. Jeha enyɔ loko zugba mimiɛ ɔ, benɛ Uzia ngɛ tsɛ yee ngɛ Yuda zugba a nɔ, nɛ Yehoash bi Yeroboam ngɛ tsɛ yee ngɛ Israel zugba a nɔ ɔ, Mawu je ní nɛ ɔmɛ tsuo ngɔ tsɔɔ Amos ngɛ Israel he.

² Amos de ke, “Yawɛ tu munyu ngɛ Zion yo ɔ nɔ kaa jata nɛ ngɛ huãe, nɛ e miɔ nɛ e ma tsɔtslɔɔ lohwe ko mi. Yawɛ wo gbi ngɛ Yerusalem kaa hiɔwe nɛ ngɛ sie. Ba amɛ ngla ngɛ lohwehi a ní yemi he ɔmɛ, nɛ nga nɛ ngɛ Karmel yo ɔ nɔ ɔ gbli.”

Yawɛ maa gbla Israel huza a nɔ bi ɔmɛ a tue Siria

³ Yawɛ ke, “Siria ma ngua Damasko bi ɔmɛ pee yayamihi nɔtonɔto babauu; a wa Gilead bi ɔmɛ yi mi, nɛ a pee mɛ nisɛ ní a ní. Enɛ ɔ he je ɔ, ja i gbla a tue kokooko.

⁴ Ma mɛ we ɔ nɛ Matsɛ Hazael po ɔ he la, nɛ Matsɛ Benhadad mɔ ɔmɛ maa sã.

⁵ Gbogbo nɛ a fia kɛ bɔle Damasko ma a, agbohi nɛ a je ngɛ mi ɔ, ma ywia mɛ. Ma gbe nihi nɛ ngɛ Aven kɔ̃ ɔ mi, kɛ Beteden ma nɔ yelɔ ɔ. A maa nuu Siria bi ɔmɛ nyɔguɛ kɛ ya Kir zugba a nɔ.” Yawɛ lɛ de.

Filistia

⁶ Yawɛ ke, “Gaza ma mi bi ɔmɛ pee yayamihi nɔtonɔto babauu; a nuu kɔpehi fuu a mi bi kɛ ho, nɛ a ya jua mɛ kaa nyɔguɛhi kɛ ha Edom bi. Enɛ ɔ he je ɔ, ja i gbla a tue kokooko.

⁷ Ma mɛ Gaza gbogbo ɔmɛ, kɛ mɔ ɔmɛ a he la.

⁸ Ma gbe ma nɔ yeli ɔmɛ ngɛ Ashdod kɛ Ashkelon. Ma gbla Ekron ma a tue, nɛ Filisti bi nɛ a he maa je tue gblami nɛ ɔ mi ɔ ma gbo.” Yawɛ lɛ de.

Tiro

⁹ Yawɛ ke, “Tiro ma mi bi ɔmɛ pee yayamihi nɔtonɔto babauu. A jua kɔpehi babauu a mi bi kaa nyɔguɛhi kɛ ha Edom bi, nɛ kake peemi somi nɛ ngɛ nyɛmi kɛ nyɛmi a kpɛti ɔ, a yi nɔ. Enɛ ɔ he je ɔ, ja i gbla a tue kokooko.

¹⁰ Ma mɛ Tiro gbogbo ɔmɛ, kɛ mɔ ɔmɛ a he la.”

Edom

¹¹ Yawɛ ke, “Edom ma mi bi ɔmɛ pee yayamihi nɔtonɔto babauu. A kɛ abofu nɛ nya wa fie a nyɛmimɛ Israel bi ɔmɛ kɛ klaate, nɛ a nɛ mɛ mɔbɔ kulaa.

¹² Ma mɛ Teman ma a, kɛ Bozra mɔ ɔmɛ a he la.”

Amon

¹³ Yawɛ ke, “Amon ma mi bi ɔmɛ pee yayamihi nɔtonɔto babauu. Benɛ a ngɛ ta hwue ngɛ Gilead nɛ a kɛ kpɔ nihi a zugba a, a pee yi wu tso níhi fuu; a kɛ klaate tsɔtslɔɔ yihɔyihi po a mi mi. Enɛ ɔ he je ɔ, ja i gbla a tue kokooko.

¹⁴ Ma mɛ Raba gbogbo ɔmɛ, kɛ mɔ ɔmɛ a he la. A ma he ose hoo ta hwumi ligbi ɔ, nɛ ta a ma puɛ ní kaa lasiogblee.

¹⁵ Nɛ a maa nuu Amon matsɛ ɔ, kɛ e ganɔ ɔmɛ kɛ ho ma se ya.” Yawɛ lɛ de.