Abɛ Womi 8 - BAIBLO ALOO NGMAMI KLƆUKLƆU Ɔ

Nile yi jemi la

¹ Nyɛɛ bu tue! Nile ngɛ ngmlaa kpae. Nyɛɛ bu tue! Juɛmi gbi ngɛ pɛe.

² Nile daa si ngɛ blɔ gbla amɛ a nya, ngɛ blɔ he, kɛ yokuhi a yi mi.

³ E ngɛ ngmlaa kpae gegeege ngɛ ma a nya; e ngɛ kpae ngɛ ma a agbo ɔmɛ a nya ke,

⁴ “Nyɛ nimli adesahi lee! I ngɛ nyɛ tsɛe oo! Nyɛ tsuo pɛpɛɛpɛ, nyɛɛ bu mi tue!

⁵ Nyɛ nɛ nyɛ be juɛmi ko juɛmi ko, nyɛɛ le ní; nyɛ kuasiahi, nyɛ na juɛmi.

⁶ Nyɛɛ bu tue nɛ ma tu nyɛ munyuhi nɛ a he hia.

⁷ Nɔ́ tsuaa nɔ́ nɛ ma de nyɛ ɔ, anɔkuale sɔuu; i be nyɛ munyu kpa ko tue pe anɔkuale. Lakpa lɛɛ i hiee.

⁸ Ye nya mi munyuhi tsuo da; ekoeko be nɛ kpɛ̃; ekoeko be nɛ ji lakpa.

⁹ Ye nya mi munyu ɔmɛ fɔɔ si paa kɛ ha nihi tsuo nɛ nuɔ nɔ́ sisi. Munyu ɔmɛ a mi tsɔ heii kɛ ha nihi tsuo nɛ le ní.

¹⁰ Nyɛ hla ye tsɔsemi ɔ se blɔ pe sika hiɔ; nyɛ hla nile pe sika tsu kpakpa.

¹¹ “Nile hi pe june; níhi nɛ adesa suɔ pe kulaa a, ekoeko be nɛ a kɛ maa to nile he.

¹² Imi nile, i ngɛ hɛ mi si kami. I ngɛ juɛmi, kɛ nɔ́ sisi numi hulɔ.

¹³ Ke nɔ ko ke e yeɔ Yawɛ gbeye ɔ, e sa kaa e kua yayami. Hewo, he tsɔɔmi, je mi bami yaya, kɛ lakpa a, i sume.

¹⁴ I le ní saminya, nɛ i woɔ nɔ ga; i nuɔ nɔ́ sisi, nɛ i ngɛ he wami hulɔ.

¹⁵ I piɛɔ matsɛmɛ a he kɛ hyɛɛ ma nɔ; i piɛɔ nɔ yeli a he kɛ woɔ mlaa kpakpahi.

¹⁶ Ganɔhi kɛ odehehi tsuo, imi lɛ i piɛɔ a he kɛ tsuɔ ní.

¹⁷ Nihi nɛ suɔ mi ɔ, imi hu i suɔ mɛ; nɔ tsuaa nɔ nɛ hlaa ye se blɔ ɔ, e maa na mi.

¹⁸ Ní nɛ ɔmɛ ngɛ ye dɛ nɛ ma dla; sika, hɛ mi nyami, kplɔkɔtɔ, kɛ nɔ yami.

¹⁹ Nɔ́ nɛ o ma na kɛ je ye dɛ mi ɔ, e hi pe sika tsu ngmingmiingmi; e hi pe sika hiɔ ngmingmiingmi hulɔ.

²⁰ Dami blɔ nɔ lɛ i nyɛɛɔ; dami sane lɛ i yeɔ.

²¹ Nihi nɛ suɔ mi ɔ, i peeɔ mɛ niatsɛmɛ; i haa a wehi a mi hyiɔ tɔ kɛ june.

²² “Imi nile lɛ Yawɛ bɔ kekleekle; e bɔ mi loko e je e ní tsumi ɔmɛ a sisi blema lokoo.

²³ Blema lokoo, benɛ a na we nɛ a bɔ je ɔ, imi lɛ a bɔ kekleekle.

²⁴ Benɛ wo be, nɛ nyu vuhi hu be ɔ, jamɛ a be ɔ, imi lɛɛ a fɔ mi momo.

²⁵ Benɛ a na we nɛ a ngɔ yo ɔmɛ, kɛ yoku ɔmɛ kɛ ma a blɔ hehi lolo ɔ, jamɛ a be ɔ, imi lɛɛ a fɔ mi momo.

²⁶ Benɛ Mawu na we nɛ e pee je ɔ, kɛ nga, kɛ tabo zu ɔ, jamɛ a be ɔ, imi lɛɛ a fɔ mi momo.

²⁷ Benɛ e ngɔ hiɔwe kɛ to e blɔ he, nɛ e pee hiɔwe kɛ zugba a kpe he ɔ, jamɛ a be ɔ, i ngɛ lejɛ ɔ.

²⁸ Benɛ e ngɔ bɔku ɔmɛ ngɔ to hiɔwe, nɛ e kɛ nyu vu ɔmɛ hu to a blɔ hehi ngɛ wo ɔ mi ɔ, jamɛ a be ɔ, i ngɛ lejɛ ɔ.

²⁹ Benɛ e fa wo ɔ ke wo nyu ɔ ko be e huzu ɔ he ɔ, i ngɛ lejɛ ɔ. Benɛ e to je ɔ sisi ɔ, jamɛ a be ɔ, i ngɛ lejɛ ɔ.

³⁰ I ngɛ e kasa nya kaa ga ní tsulɔ kpanaa, nɛ e bua jɔɔ ye he daa nɛ; i fiɛɔ ngɛ e hɛ mi be tsuaa be.

³¹ I náá je ɔ nɛ e bɔ ɔ, kɛ nimli adesahi tsuo a he bua jɔmi.

³² “Lɔ ɔ he ɔ, nihewi, nyɛɛ bu mi tue! Nyɛɛ pee bɔ nɛ i de nyɛ ɔ, nɛ nyɛ ma na bua jɔmi.

³³ Nyɛɛ bu nɔ́ nɛ a ngɛ nyɛ tsɔɔe ɔ tue nɛ nyɛɛ le ní. Nyɛ ko kua tsɔsemi.

³⁴ Nɔ nɛ buɔ mi tue, nɛ e hii si ngɛ ye sinya nya daa ligbi, nɛ e hii mlɛe ngɛ ye agbo nya a, e naa bua jɔmi.

³⁵ Nɔ nɛ hlaa mi ɔ, e yi ma na wami; nɛ Yawɛ ma na e he bua jɔmi.

³⁶ Se nɔ nɛ hla we mi ɔ, lɛ nitsɛ e he awi lɛ e ngɛ yee. Nihi tsuo nɛ nyɛɔ mi ɔ, a suɔ gbenɔ.”