Abɛ Womi 5 - BAIBLO ALOO NGMAMI KLƆUKLƆU Ɔ

Ko puɛ gba

¹ Ye bi, i kɛ mo maa tu munyu nɛ mi kuɔ; i kɛ mo maa tu juɛmi munyu sɔuu. Bu tue,

² konɛ o hyɛ o he nɔ saminya, nɛ o munyu tumi nɛ tsɔɔ kaa ní lelɔ ji mo.

³ Ke yo yaholɔ fiɔ o nya he ɔ, e lilɛ ngɔɔ pe hwo; e nya mi munyu hu ngɛ ngleinglei kaa nu.

⁴ Nɔ́ nɛ jeɔ mi kɛ baa a dooɔ pe agba, nɛ e puɛɔ nɔ́ pe klaate nya enyɔtsɛ.

⁵ Blɔ nɔ nɛ e ngɛ nyɛɛe ɔ kɛ nɔ yaa gbeje. E maa ngɔ mo kɛ ya tɔɔ.

⁶ Blɔ nɛ kɛ nɔ yaa wami mi ɔ, e susuu we he; e ya nyɛɛɔ blɔ gɔdɔgɔdɔhi a nɔ nɛ lɛ nitsɛ e li tete.

⁷ Lɔ ɔ he ɔ, ye bimɛ, nyɛɛ bu tue, nɛ nyɛ hɛ ko je munyuhi nɛ i kɛ nyɛ ngɛ tue ɔ a nɔ.

⁸ Hɛɛ mo kɛ je yo kaa kikɛ nɛ ɔ he; e tsu nya tete po koo ya.

⁹ Ke pi ja a, o hɛ mi nyami ɔ ma ba pee ni kpahi a nɔ, nɛ yiwutsotsɛmɛ ma kpata o hɛ mi ngɛ nihe mi.

¹⁰ Niinɛ, nibwɔhi ma ba ngɔ ní nɛ o na a tsuo, nɛ nɔ́ ko nɛ o gbo he dengme ɔ ma ba pee nɔ kpa nɔ́.

¹¹ Nyagbe ɔ, be mi nɛ o hwɔɔ si ngɛ gbenɔ sa nɔ, nɛ o he lo, kɛ o nɔmlɔ tso ɔ tsuo hɛ mi ngɛ kpatae ɔ, o maa hi kɛmɛe,

¹² nɛ o maa hi dee ke, “Mɛni he je i kplɛɛ we nɛ a tsɔse mi ɔ? Mɛni he je i ngmɛ́ blɔ nɛ a ka ye hɛ mi ɔ?

¹³ I bui ye tsɔɔli fɛɛ, nɛ ma de ke i ngɛ nihi nɛ tuɔ mi slɔmi munyuhi tue bue po.

¹⁴ Amlɔ nɛ ɔ, pe ye hɛ mi miɔ nɛ e ma pue si ngɛ ma hɛ mi ji nɛ ɔ nɛ.”

¹⁵ Ye mo nitsɛ o yo anɔkuale, nɛ o kɛ o suɔmi tsuo ha lɛ pɛ.

¹⁶ Anɛ e sa kaa o wo ngmɛdu ngɛ gbɛjegbɛ nɔ ngɛ je ɔ mi tsuo kɛ bɔle si lo?

¹⁷ Ha o bimɛ nɛ pee mo nɔ kake too o níhi, se pi o kɛ nibwɔhi a bimɛ.

¹⁸ Lɔ ɔ he ɔ, ha o yo bua jɔmi. O nihe mi yo kpeekpee ɔ, na e he bua jɔmi.

¹⁹ E he ngɛ fɛu saminyayoo kaa odabɔ. Ha e he nɛ pee mo akɔnɔ, nɛ e suɔmi ɔ nɛ fi mo kɛ mɛtɛ e he daa.

²⁰ Ye bi, mɛni he je lɛ yo ajuama haa o yi mi plɛɔ kikɛ nɛ ɔ? Mɛni ha o fua nɔ kpa e yo kɛ wo o gugwe mi ɔ?

²¹ Nɔ́ tsuaa nɔ́ nɛ o ngɛ pee ɔ fɔɔ si paa ngɛ Yawɛ hɛ mi. He tsuaa he nɛ o gu ɔ, e ngɛ mo hyɛe.

²² Yiwutsotsɛ ɔ, lɛ nitsɛ e he yayamihi nɔuu lɛ maa du lɛ klama; e he yayami kpa amɛ nɔuu a kɛ maa fi lɛ.

²³ Akɛnɛ e kplɛɛ we tsɔsemi he je ɔ, e ma gbo; e kuasia jemi ma kpata e hɛ mi.