Abɛ Womi 31 - BAIBLO ALOO NGMAMI KLƆUKLƆU Ɔ

Munyuhi nɛ a kɛ slɔ matsɛ

¹ Munyuhi nɛ Matsɛ Lemuel, Masa matsɛ ɔ nyɛ kɛ tsɔse lɛ ji nɛ ɔmɛ nɛ:

² “Ye bi, i suɔ mo saminya. I kpa o he pɛɛ ngɛ sɔlemi mi loko i ná mo nɛ i fɔ. Mɛni munyu kpakpa sa mo pe enɛ ɔ?

³ Koo ngɔ o he wami kɛ ha yihi. Matsɛmɛ tete po nɛ nyɛɛɔ yihi a se ɔ, a hɛ mi kpataa.

⁴ Lemuel lee, anɔkuale mi ɔ, e sɛ matsɛmɛ, kɛ ma nɔ yeli kaa a nu wai, loo dã nɛ nya wa.

⁵ Ke a nu dã a, a hɛ maa je mlaa a nɔ, nɛ a ma plɛ nɔ́ nali a sane hɛ mi kɛ bu si.

⁶ Nyɛ ha ni nɛmɛ nɛ a hɛ mi miɔ nɛ e ma kpata a dã nɛ nya wa nɛ a nu; nɛ nyɛ ha ni nɛmɛ nɛ aywilɛho nu mɛ ɔ hu wai.

⁷ Ke a nu ɔ, a hɛ maa je ohia nɔ, nɛ a be kɔmɔ yee hu.

⁸ “Tu munyu kɛ fa mumui he; ye awusahi tsuo a sane ha mɛ.

⁹ Tu munyu kɛ fa a he; ye dami sane. Hyɛ nɔ́ nali, kɛ dɛgutsɛmɛ a nɔ saminya.”

Yo kpakpa

¹⁰ Yo kpakpa a, mɛnɔ ma na? E he jua wa kulaa pe june!

¹¹ E huno ngɔɔ e hɛ kɛ fɔɔ e nɔ kɛ e tsui tsuo, nɛ e huno ɔ be ohia yee gblegbleegble.

¹² Yo ɔ peeɔ e huno ɔ suɔmi nya ní; daa nɛ ɔ, e peeɔ lɛ kpakpa, pi yayami.

¹³ E hlaa to he bwɔmi kɛ doti kpa, nɛ e bua jɔɔ nɔ́ nɛ e kɛ loɔ ɔ he.

¹⁴ E ya ngɔɔ niye ní kɛ jee tsitsaa kɛ baa kaa bɔ nɛ jua yelɔ ya ngɔɔ tlomi kɛ jee ma se lokoo kɛ baa a.

¹⁵ E teɔ si makɛ mla, nɛ e hlaa niye ní ha e we mi bimɛ, nɛ e gbaa ní tsumi ha e mawayihi.

¹⁶ E hlaa zugba nɛ e heɔ. E bɔɔ apaa nɛ a peeɔ wai ngmɔ ha lɛ.

¹⁷ E tsuɔ ní kpakpataa; e nine si wa kɛ ní tsumi.

¹⁸ E tsuɔ ní nyɔ mi tsuo; ejakaa e le kaa e ma na he se kokooko.

¹⁹ Lɛ nitsɛ nɛ e tsɛ̃ɔ doti kpa, nɛ e kɛ loɔ bo.

²⁰ E naa ohiatsɛ mɔbɔ, nɛ e bɔleɔ nine kɛ haa nɔ nɛ e fi lɛ.

²¹ Ke fĩɛ be su ɔ, e yi tsui kaa fĩɛ maa ye e we mi bimɛ, ejakaa mɛ tsuo a ngɛ kuutu tade.

²² Lɛ nitsɛ e loɔ e sa nɔ bo; nɛ e buɔ kploba nɛ ngɛ fɛu, kɛ bo nɛ hɛɛ alamua tu su.

²³ Ke ma nimeli kpe ɔ, a toɔ e huno ɔ he hɛ saminya ngɛ a kpɛti.

²⁴ Yo ɔ kpɛɔ kploba tade nɛ e juaa; e juaa mi mi fimi níhi hu kɛ haa je juali.

²⁵ Ke o na e he wami, kɛ e he fɛu ɔ, lɛɛ ja bo kpakpa nɛ nɔ kɛ dla e he. E yi nɔ́ nɛ maa ba hwɔɔ se gbeye.

²⁶ Nile munyu sɔuu e tuɔ, nɛ a naa ngɛ e lilɛ nɔ kaa e mi mi jɔ.

²⁷ E hyɛɔ nɛ e we mi bimɛ nɛ ba a je mi saminya; nɛ e sume hejɔ.

²⁸ E huno, kɛ e bimɛ tsuo buɔ lɛ, nɛ a gbaa lɛ. E huno ɔ jeɔ e yi ke,

²⁹ “Yihi babauu ngɛ nɛ bɔɔ mɔde mohu, se moo lɛɛ, o pe mɛ tsuo!”

³⁰ Hɛ mi nyami sisiɔ nɔ, nɛ he fɛu hu taa; se yo nɛ yeɔ Yawɛ gbeye ɔ, e sa kaa a je e yi.

³¹ Nyɛ je e yi ngɛ níhi nɛ e tsu ɔ a he. Nɔ tsuaa nɔ nɛ je e yi ngɛ e ní tsumi ɔmɛ a he.