Abɛ Womi 30 - BAIBLO ALOO NGMAMI KLƆUKLƆU Ɔ

Agur munyuhi

¹ Yake nɛ je Masa a, e binyumu Agur sɛ gbi nɛ e ngɔ ha Itiel kɛ Ukal ji nɛ ɔmɛ nɛ. Nyumu ɔ ke, “Mawu lee! Peepee ta ye he oo, peepee ta ye he! Kɛ ma pee kɛɛ?

² Anɔkuale mi ɔ, i be nimlihi a kpɛti; i pe lohwe tete po. Juɛmi nɛ ngɛ nɔmlɔ adesa yi mi ɔ, i be eko.

³ I kase we nile; Mawu Klɔuklɔu ɔ hu i li e he nɔ́ ko nɔ́ ko.

⁴ Mɛnɔ lɛ ya hiɔwe nɛ e kpale kɛ ba zugba hyɛ? Mɛnɔ lɛ bua kɔɔhiɔ nya kɛ wo e dɛ mi hyɛ? Mɛnɔ lɛ yɛ wo mi nyu ɔ tsuo kɛ wo bo mi, nɛ e fi nya hyɛ? Aloo mɛnɔ lɛ ma buna ngɛ je ɔ mi nyagbe he ɔmɛ? Kɛ a tsɛɔ lɛ kɛɛ? E bi ɔ hu, mɛni ji e biɛ? Tse o le?

⁵ “Ke Mawu wo si ɔ, e yeɔ nɔ. Mawu ngɛ kaa tsɛ̃i kɛ ha nihi tsuo nɛ hlaa e se blɔ.

⁶ Koo ngɔ nɔ́ ko kɛ piɛ Mawu munyu ɔmɛ a he. Ke o pee ja a, Mawu ma ka o hɛ mi, nɛ nihi tsuo maa na kaa lakpatsɛ ji mo.”

Abɛ kpa komɛ

⁷ Mawu, nɔ enyɔ i ngɛ mo bie nɛ o ha mi loko ma gbo.

⁸ Hyɛ nɛ ma ko ye lakpa. Ko ha nɛ ma ná ní kpɔtɔɔ, nɛ ko ha nɛ ma ye ohia hulɔ; niye ní nɛ maa su mi ɔ, lɔ ɔ pɛ o ha mi.

⁹ Ke i na ní kpɔtɔɔ ɔ, ma kua mo, nɛ ma de ke, “Mɛnɔ kulaa ji Yawɛ nɛ ɔ?” Jã kɛ̃, ke i ye ohia a, ma ju, nɛ ma wo ye Mawu ɔ he mu.

¹⁰ Koo gbe tsɔlɔ he guɛ ha e nyɔmtsɛ. Ke o pee ja a, tsɔlɔ ɔ maa gbiɛ mo, nɛ o hɛ mi ma pue si.

¹¹ Ni komɛ gbiɛɔ a tsɛmɛ, nɛ a gbaa we a nyɛmɛ.

¹² Ni komɛ buɔ a he kaa a he tsɔ, be mi nɛ a sɛ mu kpɔtɔɔ.

¹³ Ni komɛ woɔ a he nɔ, nɛ a susuɔ kaa a hi tsɔ.

¹⁴ Ni komɛ sisiɔ ohiatsɛmɛ, kɛ nihi nɛ a ní ngɛ mɔbɔ, nɛ a kpɔɔ níhi ngɛ a dɛ. Bɔ nɛ jamɛatsɛmɛ ɔmɛ peeɔ kɛ yeɔ ní ji nɛ ɔ nɛ.

¹⁵ Malɛɛ ngɛ biyiwi enyɔ; a foɔ ya nɛ a deɔ ke, “Ha mi enɛ, ha mi enɛ!” E peeɔ nɔ́ etɛ nɛ a tɔɛ gblegbleegble. Nɔ́ eywiɛ komɛ ngɛ nɛ mɛ hu a tɔɛ gblegbleegble:

¹⁶ Ni gbogboehi a je, yo nɛ be bi, zugba nɛ hiɔmi nɛ́ ngɛ nɔ, kɛ la nɛ ngɛ tsoe nɛ nine kpi he.

¹⁷ Nɔ nɛ gbeɔ e tsɛ he guɛ, nɛ e bui e nyɛ ɔ, kuakualabitehi nɛ ngɛ kɔ̃ ɔ mi ma ta e hɛngmɛ, nɛ okpokuhi maa ye lɛ.

¹⁸ Nɔ́ etɛ kɛ yaa eywiɛ komɛ peeɔ mi nyakpɛ nɛ ye juɛmi sui he:

¹⁹ Kɔle nɛ ngɛ tee ngɛ kɔɔhiɔ mi kɛ bee; sinɔ nɛ ngɛ si sããe ngɛ tɛ sa nɔ, lɛ nɛ ngɛ nyɛɛe ngɛ wo nɔ, kɛ nyumu kɛ yo a bɔmi.

²⁰ Bɔ nɛ yo gba puɛlɔ ngɛ ha ji nɛ ɔ nɛ; e yeɔ ní nɛ e tsuɔ e nya he saminyayoo, nɛ e deɔ ke, “Oo, i tsa pee we yayami ko.”

²¹ Nɔ́ etɛ kɛ yaa eywiɛ nɛ ɔmɛ ji níhi nɛ je ɔ sume saasaa, nɛ e peeɔ je ɔ kaa e mimiɛ:

²² Nyɔguɛ nɛ ba ngɛ matsɛ yee, kuasia nɛ ye ngma nɛ e tɔ,

²³ yo nɛ nɔ ko nɔ ko sume lɛ, nɛ ba na gba, kɛ mawayo nɛ ba kpɔ gba ngɛ e nyɛ dɛ.

²⁴ Nɔ́ eywiɛ komɛ ngɛ je nɛ ɔ mi nɛ a klee we saasaa, se a le ní saminya:

²⁵ Tatuhi; a he wɛ saasaa, se a buaa niye ní nya kɛ toɔ ngɛ latsa be mi.

²⁶ Nyu mi kpihi; mɛ hu a be he wami ko, se a peeɔ a tsu ngɛ tɛ sahi a kpɛ.

²⁷ Baalɛhi; a be matsɛ, se kɛ̃ ɔ, a nyɛɛɔ ngɛ kuuhi a mi pɛpɛɛpɛ.

²⁸ Akɔtɔkuhi: o ma nyɛ nu akɔtɔku kɛ o nine, se kɛ̃ ɔ, matsɛmɛ a mɔhi a mi a naa mɛ ngɛ.

²⁹ Nɔ́ etɛ kɛ yaa eywiɛ komɛ ngɛ nɛ a nyɛɛmi ngɛ fɛu kɛ akɔnɔ:

³⁰ Jata: e he wa pe lohwehi tsuo, nɛ e yi lohwe ko lohwe ko gbeye.

³¹ Kungwɔ ku nɛ ngɛ si sie kɛ bee; to akpakpo, kɛ matsɛ nɛ nyɛɛ e ma hɛ mi kɛ ma.

³² Ke o ya je kuasia, nɛ o ya wo o he nɔ, aloo o ya to ga yayami ɔ, pee dii nɛ o susu o yi mi.

³³ Ejakaa ke o fia nyɔ nyu ɔ, e peeɔ bɔta. Ke o fia nɔ ko gugwɔ nɔ́ ɔ, e jeɔ muɔ. Ke o wo nɔ ko mi mi la a, pɛ lɛ nyɛɛɔ se.