Abɛ Womi 3 - BAIBLO ALOO NGMAMI KLƆUKLƆU Ɔ

A wo nihewi kɛ yihewi ga

¹ Ye bi, níhi nɛ i tsɔɔ mo ɔ, o hɛ ko je a nɔ; o hɛ nɛ hi mlaahi nɛ i wo mo ɔ a nɔ be tsuaa be.

² Ke o pee ja a, o wami se maa kɛ, nɛ o ma na he jɔmi, kɛ kplɔkɔtɔ.

³ Koo ngmɛɛ si himi kpakpa, kɛ anɔkuale yemi he. Fi kɛ wo o kuɛ, nɛ o ngma kɛ fɔ o tsui nɔ.

⁴ Ke o pee ja a, o hɛ mi maa ba nyami, nɛ Mawu, kɛ nimli adesahi tsuo ma na o he bua jɔmi.

⁵ Ngɔɔ o hɛ ngɔ fɔ Yawɛ nɔ kulaa. Koo ngɔ o hɛ ngɔ fɔ nɔ́ nɛ moo o susu kaa o le ɔ nɔ.

⁶ Nɔ́ tsuaa nɔ́ mi ɔ, mo kai Yawɛ, nɛ e maa tsɔɔ mo blɔ nɛ da.

⁷ Koo bu o he ní lelɔ; moo ye Yawɛ gbeye, nɛ o tu yayami nya fo.

⁸ Ke o pee ja a, e ngɛ kaa tsopa kpakpa nɛ ma tsa mo, nɛ ma ha o he mi maa jɔ mo.

⁹ Ngɔɔ o ní babauu ɔ kɛ wo Yawɛ hɛ mi nyami; ngɔɔ o niba ní tsuo mi kekleekle nɔ́ kɛ sã bɔ ha lɛ.

¹⁰ Ke o pee ja a, o blɛfo gba a ma hyi tɔtɔɔtɔ kɛ blɛfo; o wai hu maa ba babauu nɛ o nine be he kpee.

¹¹ Ye bi, ke Yawɛ ngɛ mo tsɔsee ɔ, e ko pee mo tai; ke e ngɛ o hɛ mi kae ɔ, o ko de ke e ngɛ mo haoe.

¹² Nihi nɛ Yawɛ suɔ mɛ ɔ, a hɛ mi e kaa, kaa bɔ nɛ tsɛ peeɔ e bi nɛ e suɔ ɔ.

¹³ Nɔmlɔ nɛ le ní, nɛ e nuɔ nɔ́ sisi ɔ, a gbaa lɛ saminya.

¹⁴ Ejakaa e he ngɛ se nami pe sika tsu, kɛ sika hiɔ.

¹⁵ Nile he ngɛ se nami kulaa pe june; nɔ́ ko be nɛ o suɔ saminya nɛ a kɛ maa to nile he.

¹⁶ Nile haa nɔ wami se kɛɔ ngɛ je mi; e haa nɔ naa ní, nɛ e haa nɔ hɛ mi baa nyami.

¹⁷ Nile haa nɔ bua jɔmi, kɛ tue mi jɔmi.

¹⁸ Nihi nɛ le ní ɔ, a naa bua jɔmi; nile haa mɛ wami.

¹⁹ Nile Yawɛ kɛ bɔ je ɔ. Ga lɛ e kɛ ngɔ hiɔwe ngɔ to e blɔ he.

²⁰ E nile ɔ nɛ ha nɛ pa amɛ hia; lɛ nɛ ha nyu je bɔku ɔmɛ a mi pue zugba.

²¹ Ye bi, ngɔɔ nile nitsɛnitsɛ, kɛ juɛmi ngɔ to saminya; ko ha nɛ a je o dɛ.

²² A ma ha mo he wami, nɛ o ma na bua jɔmi.

²³ Kɛkɛ ɔ, o maa nyɛɛ tɛɛ ngɛ he jɔmi mi, nɛ o be nɔ́ tɛe.

²⁴ Ke o hwɔ si ɔ, o be gbeye yee; o maa hwɔ mahe vii nyɔ mi tsuo.

²⁵ Haomihi nɛ baa yiwutsotsɛmɛ a nɔ tlukaa kaa kɔɔhiɔ nɛ nya wa a, lɔ ɔmɛ be o he gbeye woe.

²⁶ Yawɛ maa bu o he. E be blɔ ngmɛe nɛ o ya du klama.

²⁷ Be tsuaa be nɛ o ma nyɛ ɔ, nihi nɛ e hia kaa a pee mɛ kpakpa a, pee mɛ kpakpa.

²⁸ Ke nɔ́ ko ngɛ o dɛ nɛ o ma nyɛ kɛ pee o nyɛmi kpakpa a, ko de lɛ ke e ya nɛ e ba hwɔɔ loko o ha lɛ.

²⁹ O nyɛmi nɛ o kɛ lɛ ngɛ, nɛ e ngɔ e hɛ kɛ fɔ o nɔ ɔ, koo to ga yayami kɛ wo e he.

³⁰ O kɛ nɔ ko nɛ ko pɛ yaka gu be mi nɛ e pee we mo nɔ́ yaya ko.

³¹ O hɛ ko kɔ̃ yiwutsotsɛmɛ a nɔ; níhi nɛ a peeɔ hu, ko hla kaa o maa pee.

³² Ejakaa Yawɛ sume nimli yayamihi; nihi nɛ peeɔ nɔ́ nɛ da lɛ e kɛ bɔɔ.

³³ Yawɛ gbiɛmi ngɛ yiwutsotsɛmɛ a wehi a nɔ, se nihi nɛ peeɔ nɔ́ nɛ da a, mɛɛ a hi he ɔ, gbaami sɔuu.

³⁴ Yawɛ kɛ he nɔ woli bɔɛ; se nihi nɛ baa a he si lɛɛ e naa mɛ mɔbɔ.

³⁵ Ní leli a hɛ mi maa ba nyami, se kuasiahi lɛɛ a hɛ mi ma pue si.