Abɛ Womi 29 - BAIBLO ALOO NGMAMI KLƆUKLƆU Ɔ

¹ Nɔ nɛ ke a ka e hɛ mi, nɛ e waa tue kɛ mwɔɔ ɔ, e maa ku kɛ pue si tlukaa, nɛ e be hie tsami.

² Ke nihi nɛ peeɔ nɔ nɛ da ngɛ ma nɔ ye ɔ, ma mi bi ɔmɛ a bua jɔɔ saminya; se ke nɔ yeli ɔmɛ ya pee yiwutsotsɛmɛ ɔ, ma a yeɔ kɔmɔ wawɛɛ nitsɛ.

³ Bi nɛ nyaa nile he ɔ, e haa e fɔli bua jɔmi; se nɔ nɛ kɛ yaholi ya bɔɔ ɔ, e kpataa e weto ní hɛ mi.

⁴ Matsɛ nɛ yeɔ dami sane ɔ, e ma a yaa nɔ saminya; se nɔ nɛ heɔ nike ní pani nya ngɛ e ma mi bi a dɛ ɔ, e ywiaa ma a.

⁵ Nɔ nɛ kɛ e nyɛmi tuɔ munyu dɔkɔbii ɔ, klama e ngɛ lɛ tsɔe ɔ nɛ.

⁶ Nɔmlɔ yaya a, lɛ nitsɛ e ní yayamihi lɛ peeɔ klama ha lɛ nɛ e duɔ; se nɔ nɛ peeɔ nɔ́ nɛ da a, lɛɛ pe e laa, nɛ e nyaa.

⁷ Nɔ nɛ peeɔ nɔ́ nɛ da a, e le ohiatsɛmɛ a hiami níhi, se yiwutsotsɛ lɛɛ e juɛmi sui ní nɛ ɔmɛ a he kulaa.

⁸ Nihi nɛ yeɔ nɔ he fɛu woɔ pɛ ngɛ ma mi; se ní leli haa ma mi jɔɔ.

⁹ Ke ní lelɔ kɛ kuasia na sane ɔ, nɔ́ nɛ kuasia peeɔ kɛkɛ ji kaa e hii kuɛe, nɛ e hii muɔe, nɛ lejɛ ɔ tsuo peeɔ hoo.

¹⁰ Muɔ si pueli sume nihi nɛ pee we yayami; lɔ ɔ he ɔ, a hlaa kaa a ma kpata nihi nɛ peeɔ nɔ́ da a hɛ mi.

¹¹ Kuasia jeɔ e we abofu tsuo kpo; se ní lelɔ lɛɛ e toɔ e tsui si kɛ tsiɔ abofu nya.

¹² Nɔ yelɔ nɛ lakpa munyu tue e buɔ ɔ, e tsɔli tsuo peeɔ yiwutsotsɛmɛ.

¹³ Ohiatsɛ kɛ nɔ nɛ ngɛ lɛ yi mi wae ɔ, a sɔ pɛ; mɛ tsuo ɔ, Yawɛ lɛ ha mɛ hɛngmɛ nɛ a kɛ hyɛɛ nɔ́.

¹⁴ Matsɛ nɛ ngɔɔ anɔkuale yemi kɛ yeɔ dɛgutsɛmɛ a sane ɔ, e tsɛ yemi ɔ se kɛɔ.

¹⁵ Ke a kɛ kpa tsɔse nɔ ɔ, e leɔ ní; se ke a ngmɛɛ jokuɛ je mi he ha lɛ ɔ, e pueɔ e nyɛ hɛ mi si.

¹⁶ Ke yiwutsotsɛmɛ ngɛ nɔ yee ɔ, a peeɔ yi wu tso níhi babauu ngɛ ma a mi. Se nihi nɛ peeɔ nɔ́ nɛ da maa na yayami peeli ɔmɛ a hɛ mi si puemi ɔ.

¹⁷ Tsɔse o bi saminya, nɛ o ma na yi jemi; nɛ o bua maa jɔ o he.

¹⁸ Ma nɛ kɛ e hɛ fɔɛ Mawu nɔ ɔ, e níhi peeɔ basaa. Nɔ nɛ yeɔ mlaa a nɔ ɔ, a gbaa lɛ.

¹⁹ Munyu babauu kɛkɛ tsɔse we tsɔlɔ; ejakaa e maa nu lɛɛ, se e be he ní tsue.

²⁰ Hɛ nɔ kami ngɛ ha kuasia pe nɔ nɛ tuɔ munyu puu.

²¹ Nɔ nɛ haa e tsɔlɔ nɔ́ tsuaa nɔ́ nɛ e biɔ lɛ be tsuaa be ɔ, nyagbe ɔ, tsɔlɔ ɔ mohu ba peeɔ wetsɛ.

²² Nɔ nɛ woɔ e mi mi la a, e woɔ pɛ. Nɔ nɛ naa abofu peeɔ tɔmi babauu.

²³ Nɔ nɛ woɔ e he nɔ ɔ, a maa ba lɛ si; se nɔ nɛ baa e he si ɔ, a maa wo e hɛ mi nyami.

²⁴ Nɔ nɛ kɛ julɔ ya dlaa ju ní ɔ, e he mi jɔɛ lɛ kɔkɔɔkɔ; e nuɔ kita nɛ a ka ngɛ nɔ́ ɔ he, se e peeɔ kɔ̃, konɛ a ko nu nɔ́ ko kɛ je e nya.

²⁵ Ke o ngɛ nɔmlɔ adesa gbeye yee ɔ, o naa haomi; se ke o ngɔ o hɛ kɛ fɔ Yawɛ nɔ ɔ, nɔ́ ko nɔ́ ko be o he sae.

²⁶ Nihi babauu buɔ kaa a maa sa nɔ yelɔ hɛ mi; se Yawɛ pɛ ji nɔ nɛ yeɔ dami sane ha nɔ.

²⁷ Bɔ nɛ yiwutsotsɛ sume nɔ nɛ peeɔ nɔ́ nɛ da sane ɔ, jã kɛ̃ nɔ nɛ peeɔ nɔ́ nɛ da hu sume yiwutsotsɛ sane.