Abɛ Womi 25 - BAIBLO ALOO NGMAMI KLƆUKLƆU Ɔ

Salomo Abɛ ɔmɛ a nɔ tsami

¹ Salomo abɛ kpahi nɛ Yuda matsɛ, Hezekia we bi ɔmɛ bua nya ji nɛ ɔmɛ nɛ.

² Hɛ mi nyami sa Mawu kaa e ngɔɔ níhi kɛ laa wɔ; matsɛmɛ lɛɛ bu sa mɛ, ejakaa a hyɛɔ níhi a mi fitsofitso.

³ Bɔ nɛ hiɔwe kɛ zugba a kpɛti kɛ ha a, ja lɛ nɔ́ nɛ matsɛ ngɛ susue ngɛ e yi mi ɔ ngɛ; nɔ ko nɔ ko be nyɛe maa le.

⁴ Ke sika hiɔ galɔ je sika fĩ kɛ je sika hiɔ mi loko e naa june nɛ e kɛ tsuɔ nɔ́ ko kpakpa.

⁵ Ke a je nimli yayamihi kɛ je matsɛ ga woli a kpɛti ɔ, dami sane yemi yaa nɔ saminya ngɛ matsɛ ɔ nɔ yemi he ɔ.

⁶ Koo pee o he nɔ agbo ngɛ matsɛ hɛ mi; nɛ ko ya da si ngɛ nimli nguahi a da he.

⁷ E hi kaa a ma tsɛ mo kɛ ya yimɛ a je pe nɔ́ nɛ a maa tsɛ̃ mo kɛ ya sisimɛ a je ngɛ ganɔ ɔ hɛ mi.

⁸ Nɔ bi nya sɔɛ ngɛ sane yemi he kɛ de nɔ́ nɛ e na. Ke o nya sɔ kɛ tu munyu, nɛ nyagbe ɔ, o nyɛmi ba pue o hɛ mi si ɔ, kɛ o maa pee kɛɛ?

⁹ Ke o kɛ o nyɛmi ngɛ pɛ ko ɔ, o kɛ lɛ pɛ nyɛ hla nya. Koo wo nɔ kpa laami sane nɔ ta.

¹⁰ Ke o pee ja, nɛ nɔ ko nu he ɔ, e ma pue o hɛ mi si, nɛ o biɛ yaya a maa tlɔ o he daa.

¹¹ Munyu nɛ a tu pɛpɛɛpɛ ngɛ be nɛ sa mi ɔ, e ngɛ kaa sika tsu akutuhi nɛ a to ngɔ wo sika hiɔ nɔ́ mi.

¹² Ke ní lelɔ ka o hɛ mi nɛ o bu tue ɔ, e ngɛ kaa june kpakpa nɛ e ke mo.

¹³ Tsɔlɔ nɛ yeɔ anɔkuale ɔ, e haa e nyɔmtsɛmɛ a tsui nɔɔ a mi kaa bɔ nɛ nyu nganii jɔɔ nɔ tsui he latsa be mi ke a ngɛ ní kpae ɔ.

¹⁴ Nɔ nɛ fĩaa ke e maa ke nɔ nɔ́, se e yi nɔ gblee ɔ, e ngɛ kaa bɔku kɛ kɔɔhiɔ nɛ nyu be mi.

¹⁵ Ke o to o tsui si nɛ o kɛ matsɛ tu munyu ɔ, o ma nyɛ tsake e yi mi tomi. Ke sane ɔ he wa kaa tɛ po, munyu blɛuu nyɛɔ jɔɔ he.

¹⁶ Ke o na hwo ɔ, ye bɔ nɛ maa su o nya pɛ, konɛ e ko de mo nɛ o ba vie ngɔ pue si.

¹⁷ O nane ko pɔ o huɛ we mi fiɛmi, konɛ o sane ko ba ti lɛ, nɛ́ e ba nyɛ mo.

¹⁸ Nɔ nɛ yeɔ lakpa odase ngɛ e nyɛmi he ɔ, e ngɛ kaa tsokpoti, loo klaate, loo kɛ̃ɛ̃ mi bi nɛ nya ba.

¹⁹ Ke hɛdɔ ba, nɛ o ngɔ o hɛ kɛ fɔ nɔmlɔ yayami nɔ ɔ, e ngɛ kaa nɔ́ nɛ o kɛ lungu yaya ngɛ nɔ́ tae, loo o kɛ nane nɛ tɔ̃ ngɛ nyɛɛe.

²⁰ Ke nɔ ko ngɛ kɔmɔ yee, nɛ moo o ngɛ bua jɔmi la lae ngɛ e kasa nya a, e ngɛ kaa nɔ́ nɛ o ngɛ kɔmɔ yelɔ ɔ bo kpae ngɛ e he fĩɛ be mi, aloo o kɛ ngo ngɛ e pá nɔ puee.

²¹ Ke hwɔ ngɛ o he nyɛlɔ yee ɔ, ha lɛ ní nɛ e ye; nɛ ke kuma ngɛ lɛ yee ɔ, ha lɛ nyu nɛ e nu.

²² Ke o pee ja a, zo kpɔtɔɔ maa gbe lɛ, nɛ Yawɛ maa gbaa mo.

²³ Kɔɔhiɔ nɛ jeɔ omleyi ɔ, hiɔmi e kɛ baa kaa bɔ nɛ sieku yemi kɛ hɛ mi tumi baa a.

²⁴ E hi kaa o ma ya hi tsu yi mi banee, pe nɔ́ nɛ o kɛ yo pɛ wolɔ maa hi we kake mi.

²⁵ Ke o nu manye munyu kɛ je ma se ɔ, e ngɛ kaa nɔ́ nɛ o ná nyu nɛ mi jɔ nɛ o kɛ maa gbe kuma.

²⁶ Dalɔ nɛ ngmɛɛɔ nɔ́ he ha yayami peelɔ ɔ, e ngɛ kaa nyu nɛ a gbidi mi, loo vu nɛ e mi nyu ɔ puɛ.

²⁷ Hwo babauu yemi hí; lɔ ɔ he ɔ, ko hla yi jemi kɛ be nɔ.

²⁸ Nɔ nɛ nyɛ we e he nɔ nɛ e ye ɔ, e ngɛ kaa ma nɛ a ba tua lɛ, nɛ a ku e gbogbo ɔmɛ kɛ pue si.