Abɛ Womi 22 - BAIBLO ALOO NGMAMI KLƆUKLƆU Ɔ

¹ Biɛ kpakpa hi pe ní nami babauu. Bu hu hi pe sika hiɔ, loo sika tsu.

² Niatsɛ, kɛ ohiatsɛ ɔ, nimli kake too ji mɛ; Yawɛ lɛ pee mɛ tsuo.

³ Nɔmlɔ nɛ le nɔ́ ɔ, ke e na haomi nɛ ma a, e tuu nya fo, nɛ e ya laa e he. Nɔ nɛ be juɛmi ɔ, lɛɛ e kɛ e he ya woɔ haomi mi, nɛ e naa nɔ́.

⁴ Nɔ nɛ baa e he si, nɛ e yeɔ Yawɛ gbeye ɔ, e naa ní, e hɛ mi baa nyami, nɛ e wami se kɛɔ.

⁵ Mio, kɛ klama ngɛ yayami peelɔ blɔ mi. Nɔmlɔ nɛ hyɛɔ e he nɔ saminya a, e maa yu e he kɛ je ní nɛ ɔmɛ a he.

⁶ Tsɔse jokuɛyo nɛ e le bɔ nɛ e maa ba e je mi ha, nɛ ke e wa a, e hɛ be nɔ jee.

⁷ Niatsɛ nyɔguɛ ji ohiatsɛ. Ke o pa sika ngɛ nɔ ko dɛ kɛkɛ o plɛ pee e nyɔguɛ.

⁸ Nɔ nɛ yi dami sane ɔ, nɔ́ nɛ maa ba e nɔ ji amanehlu. Kɛkɛ ɔ, yi mi nɛ e waa nihi ɔ tsuo se maa po.

⁹ Nɔ nɛ mi mi jɔ ɔ, a gbaa lɛ, ejakaa e ngɔɔ e niye ní kɛ haa ohiatsɛmɛ.

¹⁰ Nɔmlɔ nɛ yeɔ nɔ he fɛu ɔ, fie lɛ kɛ je o kasa nya. Kɛkɛ ɔ, huhui, pɛ, kɛ nɔ jɛmi se maa po.

¹¹ Nɔ nɛ tsui mi tsɔ, nɛ e munyu ngɛ blɛuu ɔ, e kɛ matsɛ maa bɔ.

¹² Yawɛ haa anɔkuale daa si, nɛ yayami peelɔ munyuhi peeɔ yaka.

¹³ Nɔ́ nɛ hejɔtsɛ deɔ ji, “Jata ngɛ blɔ mi; ke i je kpo ɔ, e maa gbe mi.”

¹⁴ Yo yaholɔ nya mi ngɛ kaa muɔ voo nɛ a tsua kɛ fɔ si. Nihi nɛ Yawɛ mi mi fu mɛ lɛ a nɔɔ muɔ nɛ ɔ mi.

¹⁵ Nɔ́ nɛ jokuɛyo suɔ peemi ji kuasia jemi. Se tsɔsemi tso fieɔ nɔ́ nɛ ɔ kɛ jeɔ e he.

¹⁶ Nɔ nɛ waa ohiatsɛmɛ yi mi nɛ e kɛ naa ní, aloo nɔ nɛ keɔ niatsɛmɛ ní ɔ, nyagbe ɔ, lɛ nitsɛ e ma ba ye ohia.

Nile munyu nyingmi etɛ

¹⁷ Bu tue, nɛ o nu munyuhi nɛ ní leli tuɔ, nɛ o kase ní kɛ je mi.

¹⁸ Ke o pee ja a, e maa hi ha mo, nɛ o ma na bua jɔmi. O ma kai munyu nɛ ɔmɛ daa, nɛ mo hu o ma nyɛ maa tu munyu nɛ ɔmɛ be tsuaa be nɛ o suɔ.

¹⁹ I suɔ kaa o ngɔ o hɛ kɛ fɔ Yawɛ nɔ, lɔ ɔ he nɛ i ngɛ mo ní nɛ ɔmɛ dee mwɔnɛ ɔ nɛ.

²⁰ I ngma nile, kɛ ga womi munyu nyingmi etɛ nɛ ɔmɛ kɛ ha mo,

²¹ konɛ o le nɔ́ nɛ ji anɔkuale tutuutu. Kɛkɛ ɔ, ke a tsɔ mo ɔ, o ma na heto kpakpa ba ha nɔ nɛ tsɔ mo ɔ.

-1-

²² Ko de ke ohiatsɛ pi nɔ ko he je ɔ, o maa sisi lɛ. Nɔ nɛ e yi fi ngɛ kojomi he ɔ, koo wa lɛ yi mi.

²³ Yawɛ nitsɛ maa ye jamɛatsɛmɛ ɔmɛ a sane ha mɛ. Ke nɔ ko wo a susuma he gbeye ɔ, Yawɛ maa wo lɛ hu e susuma he gbeye ja nɔuu.

-2-

²⁴ Nɔmlɔ nɛ be tsui ɔ, o kɛ lɛ ko bɔ. Nɔ nɛ mi mi fuɔ mla a, o kɛ lɛ ko nyɛɛ.

²⁵ Ke o kɛ lɛ bɔ ɔ, o maa kase e ní peemi níhi, nɛ enɛ ɔ maa pee klama nɛ du mo.

-3-

²⁶ Koo pee o he nɔmlɔ nɛ daa hiɔ nya ha nihi.

²⁷ Ke o nyɛ we nɛ o wo hiɔ ɔ, o sa tete po a ma kpɔ ngɛ o dɛ.

-4-

²⁸ Blema buna nɛ o nɛmɛ kɛ kadi zugba a, koo hɛ.

-5-

²⁹ Anɛ o le nɔ ko nɛ tsuɔ ní saminya lo? Jamɛ a nɔ ɔ, matsɛmɛ nɛ e ma sɔmɔ; pi ni guhi.