Abɛ Womi 21 - BAIBLO ALOO NGMAMI KLƆUKLƆU Ɔ

¹ Matsɛ juɛmi ngɛ kaa nyu dɔ ngɛ Yawɛ dɛ mi. He nɛ lɛɛ e suɔ nɛ e haa e guɔ.

² Nɔmlɔ adesa blɔ tsuo da ngɛ lɛ nitsɛ e hɛ mi; se Yawɛ lɛ hyɛɔ nɔ tsui mi.

³ Pee nɔ́ nɛ sa, kɛ nɔ́ nɛ da; lɔ ɔ saa Yawɛ hɛ mi pe nɔ nɛ a maa sã bɔ ha lɛ.

⁴ He nɔ womi, kɛ he womi nɛ yiwutsotsɛmɛ nyaa he ɔ, yayami ji lɔ ɔmɛ.

⁵ Nɔ nɛ bɔɔ mɔde kɛ toɔ níhi a blɔ nya saminya a, e naa ní babauu; se nɔ nɛ esɔ kɛkɛ e heɔ ɔ, e be nɔ́ kpakpa ko náe pe ohia.

⁶ Ní nɛ o gu sisimi blɔ nɔ kɛ na a, e se kɛ we kulaa; kaa bɔ nɛ la muɔ se poɔ be kuku kɛkɛ ɔ, gbenɔ lɛ nyɛɛɔ se.

⁷ Basabasa nɛ yiwutsotsɛmɛ peeɔ ɔ, lɔ ɔ nɔuu lɛ ma kpata a hɛ mi; ejakaa a sume nɛ a peeɔ nɔ́ nɛ da.

⁸ Nɔ nɛ yeɔ fɔ ɔ, e blɔ ngɛ gɔdɔgɔdɔ, se nɔ nɛ tsui mi tsɔ ɔ, e subai hi.

⁹ E hi kaa o ma ya hi tsu yi mi banee, pe nɔ́ nɛ o kɛ yo pɛ wolɔ maa hi we kake mi.

¹⁰ Yiwutsotsɛ lɛɛ yayami peemi pɛ e suɔ; e nyɛmi ní pee we lɛ mɔbɔ.

¹¹ Ke a gbla he nɔ wolɔ tue ɔ, kuasia po kaseɔ ní kɛ jeɔ mi. Nɛ ke a tsɔɔ nɔ nɛ ngɛ juɛmi ní ɔ, e leɔ.

¹² Mawu ngɛ yayami peeli tsuo hyɛe ngɛ a we ɔmɛ a mi, nɛ e ma kpata a hɛ mi pɛsɛpɛsɛ.

¹³ Nɔ nɛ tsiɔ e tue, konɛ e ko nu ohiatsɛ ngmlaa a, lɛ hu ke e kpa ngmlaa a, a be lɛ tue bue.

¹⁴ Nike ní nɛ a haa ngɛ laami mi jɔɔ abofu he kaa bɔ nɛ nyɔ mi ní haa mi mi la se poɔ ɔ.

¹⁵ Ke a ye dami sane ɔ, nihi nɛ peeɔ nɔ nɛ da a bua jɔɔ saminya; se yayami peeli lɛɛ sawale nuɔ mɛ.

¹⁶ Nɔ nɛ hɛ mi ka we si ngɛ je mi, se nɔ́ nɛ e tsui suɔ lɛ e peeɔ ɔ, gbenɔ ji nɔ nɛ fɔɔ si ha lɛ.

¹⁷ Nɔ nɛ suɔ fiɛmi maa ye ohia; nɔ nɛ dã, kɛ he dlami e suɔ ɔ, e be ní nae.

¹⁸ Klama nɛ yiwutsotsɛmɛ tsɔɔ nihi nɛ peeɔ nɔ́ nɛ da a, nyagbe ɔ, e duɔ mɛ nitsɛmɛ mohu.

¹⁹ Afani nɔ́ nɛ o ma ya hi nga kplanaa nɔ pe nɔ́ nɛ o kɛ yo pɛ wolɔ nɛ hɛ kɔɔ maa hi si.

²⁰ Ní lelɔ buaa níhi nɛ a he jua wa nya ngɔ toɔ; kuasia lɛɛ e kpataa ní ɔmɛ a hɛ mi mohu.

²¹ Nɔ nɛ yeɔ dami sane, nɛ e naa mɔbɔ ɔ, e se kɛɛ ngɛ je mi, nɛ a maa wo e hɛ mi nyami.

²² Gbogbo nɛ katsɛmɛ fiaa kɛ bɔleɔ a mɔ, nɛ lɔ ɔ nɔ a ngɔɔ a hɛ ngɔ fɔɔ ɔ, ní lelɔ kuɔɔ nɛ e kpataa ma a hɛ mi.

²³ Nɔ nɛ hyɛɛ e nya, kɛ e lilɛ nɔ saminya ngɛ munyu tumi mi ɔ, e yeɔ e he kɛ jeɔ amanehlu mi.

²⁴ Nɔ nɛ woɔ e he nɔ, nɛ e tsɔɔ e he, nɛ e peeɔ pupuupu ɔ, e bui nɔ́.

²⁵ Nɔ́ hiaa hejɔtsɛ hluu kɛ ya siɔ e gboɔ, ejakaa e sume nɛ e kɛ e nine tsuɔ ní.

²⁶ Nɔ nɛ peeɔ nɔ́ nɛ da a, e haa nɔ nɔ́, nɛ e nyɛ́ nɔ nɔ́ he; se yiwutsotsɛ lɛɛ daa nɛ ɔ, e hɛ ngɛ nɔ́ nɔ kɔe.

²⁷ Yayami peelɔ bɔ ɔ, Yawɛ sume kulaa, hluu nɛ a de ke yi mi tomi yayami piɛ bɔ ɔ he.

²⁸ Lakpa odase yelɔ hɛ mi ma kpata. Nɔ nɛ susuɔ munyu he loko e tuɔ ɔ, lɛɛ e munyu ɔ, a ngɔɔ.

²⁹ Yiwutsotsɛ toɔ e hɛ mi liliili kɛ peeɔ yayami; nɔ nɛ peeɔ nɔ́ nɛ da lɛɛ e susuɔ níhi a he saminya.

³⁰ Adesa nile, loo nɔ́ sisi numi, loo ga be nyɛe maa da Yawɛ hɛ mi.

³¹ Adesa dlaa e we okpɔngɔ he kɛ ha ta hwumi; se kunimi yemi ɔ lɛɛ Yawɛ dɛ mi e ngɛ.