Abɛ Womi 20 - BAIBLO ALOO NGMAMI KLƆUKLƆU Ɔ

¹ Wai sisiɔ nɔ; dã nɛ nya wa haa nɛ nɔ peeɔ basabasa. Nɔ nɛ ngɔɔ e he kɛ haa dã a, e li nɔ́.

² Ke matsɛ mi mi fu ɔ, ye lɛ gbeye kaa bɔ nɛ o maa ye jata nɛ ngɛ huae gbeye. Nɔ nɛ woɔ matsɛ mi mi la a, lɛ nitsɛ e wami e kɛ ngɛ fiɛe ɔ nɛ.

³ Nɔ nɛ bu ngɛ e he ɔ, e yuu e he kɛ jee pɛ he. Kuasiahi lɛ a hii pɛe kpamisa.

⁴ Hejɔtsɛ nɛ sume kaa e maa gba ní ngɛ be nɛ sa mi ɔ, ke ní kpami be su ɔ, e be nɔ́ ko nae.

⁵ Juɛmi nɛ ngɛ nɔmlɔ adesa yi mi ɔ, e mi kuɔ kaa nyu ngɛ vu mi tsitsaa lokoo. Se ní lelɔ jeɔ juɛmi nɛ ɔ kpo ngɛ be nɛ sa mi.

⁶ Nihi babauu maa tsɔɔ mo bɔ nɛ a mi mi jɔ ha. Se mo hla anɔkualetsɛ kake too ngɛ a kpɛti kaa o maa na lo.

⁷ Bimɛ nɛ a tsɛ yeɔ anɔkuale, nɛ e peeɔ nɔ́ nɛ da a, a gbaa mɛ.

⁸ Ke matsɛ ngɛ kojoe ɔ, e hɛngmɛ e kɛ dlaa nɔ́ yaya.

⁹ Mɛnɔ ma nyɛ ma de anɔkuale mi ke, “Ye tsui mi tsɔ, nɛ yayami ko pa be ye he hu”?

¹⁰ Nihi nɛ ngɔɔ sɛni, kɛ sɛni tɛhi nɛ dɛ kɛ tsuɔ ní ɔ, Yawɛ sume mɛ.

¹¹ Jokuɛyo tete po e ní peemi níhi a kɛ yoɔ lɛ kaa e yeɔ anɔkuale, loo e peeɔ nɔ́ nɛ da.

¹² Tue nɛ waa kɛ nuɔ nɔ́, kɛ hɛngmɛ nɛ waa kɛ hyɛɔ nɔ́ ɔ, Yawɛ nɛ pee mɛ tsuo ha wɔ.

¹³ Koo suɔ mahe hwɔmi nɛ o ba ye ohia. Moo hi hɛ ngmengmle nɛ o hi o he mɔde bɔe, kɛkɛ o ma na ní babauu maa ye.

¹⁴ Ke nɔ ko yaa he nɔ́ ɔ, e deɔ ke e he jua wa tsɔ. Se ke e je kɛ yaa a, e fĩaa nɛ e deɔ ke, “Enɛ ɔ lɛɛ i ná lɛ he jua jɔjɔɛ.”

¹⁵ Sika tsu, kɛ tɛhi nɛ a he jua wa ngɛ babauu. Se ní lelɔ nya mi munyu ngɛ kaa june kpakpa.

¹⁶ Ke nɔ ko wo si ke e maa da nubwɔ nɛ e li lɛ e se ɔ, a ngɔ nɔ nɛ wo si ɔ tade kɛ to awaba.

¹⁷ Nɔ́ nɛ nɔ ko na kɛ gu sisimi blɔ nɔ ɔ, e ngɔɔ kaa bɔ nɛ niye ní kpakpa ngɔɔ ɔ. Se pee se ɔ, e ba peeɔ kaa tɛ ngmlitsa ngɛ nɔ ɔ nya mi.

¹⁸ Ke o maa pee nɔ́ ko ɔ, bi ga womi, kɛkɛ e maa hi ha mo. Too ga kpakpa loko o ya hwu ta.

¹⁹ Nɔmlɔ nɛ e lilɛ hwɔ we si, nɛ e hii nihi a he munyu tue kɛ hii nyɛɛe ɔ, jeɔ laami sanehi kpo. Nɔ nɛ tuɔ munyu puu kikɛ nɛ ɔ, o kɛ lɛ ko bɔ.

²⁰ Nɔ tsuaa nɔ nɛ gbiɛɛ e tsɛ, loo e nyɛ ɔ, e nyagbe baa tlukaa kaa kane nɛ a gbe ngɛ diblii kpii mi.

²¹ Gbosi ní nɛ o he sɔ kɛ na a, nyagbe ɔ, e pee we gbaami.

²² Ke nɔ ko pee mo yayami ɔ, ko de ke mo hu o maa pee lɛ kɛ to nane mi. Ngɔɔ o sane ɔ kɛ ha Yawɛ, nɛ e maa piɛ o he.

²³ Yawɛ hiɔ ní ngmɛmi ní munomunohi; sɛni kɛ e mi tɛ nɛ a kɛ sisiɔ nɔ ɔ, e hí.

²⁴ Blɔ nɛ nɔ maa nyɛɛ nɔ ɔ, Yawɛ lɛ tsɔɔ. Lɛɛ kɛ nɔ ko maa pee kɛ maa le lɛ nitsɛ e blɔ kɛɛ?

²⁵ Mo susu o yi mi saminya loko o wo Mawu si, konɛ e ko ba pee klama nɛ maa du mo pee se.

²⁶ Matsɛ nɛ le ní ɔ, e hlaa yayami peeli ngɛ e ma mi bi ɔmɛ a kpɛti kaa bɔ nɛ a saa blɛfo mi, nɛ e gblaa a tue wawɛɛ.

²⁷ Nɔmlɔ he nile ngɛ kaa kane nɛ Yawɛ kɛ hyɛɛ nɔmlɔ tsui mi níhi tsuo fitsofitso.

²⁸ Matsɛ nɛ naa mɔbɔ, nɛ e yeɔ anɔkuale ɔ, e naa tue mi jɔmi, nɛ e tsɛ yemi ɔ hu yaa nɔ saminya.

²⁹ Nihewi a hɛ mi nyami ji a he wami; nimowi a he fɛu ji a yi mi mua.

³⁰ Tue gblami nɛ nya wa tsakeɔ wa ní peemi ní yayamihi.