Abɛ Womi 2 - BAIBLO ALOO NGMAMI KLƆUKLƆU Ɔ

Nile he se namihi

¹ Ye bi, bu ye munyu ɔmɛ tue, nɛ o pɛtɛ ye mlaa amɛ a he saminya.

² Bu nile munyu tue, nɛ o bɔ mɔde kaa o maa nu sisi lo.

³ Ee, moo fa kue nɛ a ha mo nile; kpa pɛɛ nɛ a ha mo nɔ́ sisi numi.

⁴ Hla e se blɔ kaa bɔ nɛ a hlaa sika hiɔ, loo juetli nɛ a ngɔ kɛ laa.

⁵ Ke o pee ja loko o maa nu Yawɛ gbeye yemi sisi, nɛ o maa kase Mawu he nile.

⁶ Yawɛ lɛ haa nɔ nile; lɛ nɛ e tsɔɔ nɔ nile, kɛ nɔ́ sisi numi.

⁷ Nihi nɛ peeɔ nɔ́ nɛ da, nɛ a yeɔ anɔkuale ɔ, Yawɛ piɛɔ a he, nɛ e baa a yi.

⁸ Yawɛ buu dami sane yeli a he, nɛ e baa e ni klɔuklɔu ɔmɛ a yi.

⁹ Ke o bu mi tue ɔ, o maa le nɔ́ nɛ hi, kɛ blɔ nɔ́ nɛ da. O maa le nɔ́ nɛ sa mo peemi.

¹⁰ O maa le ní, nɛ nile ɔ ma ha mo bua jɔmi.

¹¹ O he nile, kɛ o nɔ́ sisi numi maa bu o he,

¹² nɛ a be hae nɛ o pee nɔ́ nɛ dɛ. A ma je mo kɛ je nimli yayamihi a dɛ mi: nihi nɛ a kɛ a lilɛ puɛɔ nɔ,

¹³ nihi nɛ gba kɛ je blɔ nɛ da nɔ kɛ ya ngɛ diblii blɔhi a nɔ nyɛɛe,

¹⁴ nihi nɛ nyaa yayami peemi he, nɛ a naa bua jɔmi ke a ngɛ nɔ́ nɛ dɛ pee,

¹⁵ kɛ nihi nɛ a blɔhi dɛ, nɛ a kɛ hɛ fɔ we a nɔ.

¹⁶ Ke o bu mi tue ɔ, lɛɛ yo yaholɔ ko nɛ ma hla kaa e kɛ e nya mi munyu ngɔngɔɛ ma puɛ o tue ɔ, ma je mo kɛ je e dɛ mi:

¹⁷ yo nɛ kua e yihe mi huno, nɛ si nɛ e wo e Mawu ɔ hu e yi nɔ.

¹⁸ Ke o ya e we mi ɔ, gbenɔ blɔ nɔ o ngɛ nyɛɛe ɔ nɛ. Ke o ya lejɛ ɔ lɛɛ o su gbeje ta.

¹⁹ Nɔ ko ya slaa we lɛ, nɛ e kpale kɛ ba hyɛ. Ke nɔ ko ya su lejɛ ɔ, e kpale we e se kɛ bɛ wami blɔ ɔ nɔ hu.

²⁰ Lɔ ɔ he ɔ, moo kase nimli kpakpahi a ní peepee, konɛ o pee nɔ́ nɛ da.

²¹ Dali, kɛ nimli kpakpahi ji ni nɛmɛ nɛ maa hi zugba nɛ ɔ nɔ.

²² Se yiwutsotsɛmɛ, kɛ yayami peeli lɛɛ Mawu ma kpata a hɛ mi kaa bɔ nɛ a hiaa tso ngɛ zu mi kɛ fɔɔ si ɔ.