Abɛ Womi 17 - BAIBLO ALOO NGMAMI KLƆUKLƆU Ɔ

¹ Niye ní nya mi bɔ kake nɛ o maa ye ngɛ tue mi jɔmi mi ɔ, e hi kulaa pe okplɔɔ nguaa nɛ a tsɛ ngɛ we nɛ pɛ sɔuu lɛ ngɛ mi.

² Sɔmɔlɔ nɛ le ní maa ye bi nɛ peeɔ zo ní nɔ; nɛ e kɛ bimɛ ɔmɛ maa dla gbosi ní fiee.

³ La a kɛ tsuɔ sika tsu kɛ sika hiɔ he, se Yawɛ lɛ kaa adesa tsui hyɛɔ.

⁴ Yayami peelɔ buɔ yi wu tso níhi tue, nɛ lakpatsɛ hu buɔ lakpa munyuhi nɛ puɛɔ nɔ biɛ tue.

⁵ Nɔ nɛ yeɔ ohiatsɛ he fɛu ɔ, ohiatsɛ ɔ bɔlɔ e ngɛ jɛe ɔ nɛ. Nɔ nɛ bua jɔɔ nɔ ko amanehlu he ɔ, e be e he yee.

⁶ Bibimɛ ji nimowi a hɛ mi nyami, kaa bɔ nɛ bimɛ ngɛ ha fɔli ɔ.

⁷ Munyu kpakpa sɛ́ kuasia, kaa bɔ nɛ lakpa sɛ́ ganɔ ɔ.

⁸ Nyɔ mi ní halɔ susuɔ kaa e ma nyɛ nɛ e kɛ nyɔ mi ní ma tsu nɔ́ tsuaa nɔ́ bɔ nɛ e suɔ, kaa nɔ́ nɛ tɛ nɛ a kɛ tsuɔ nyakpɛ ní lɛ e hɛɛ ngɛ e dɛ mi.

⁹ Nɔ nɛ kɛ tɔmi nɛ a tɔ̃ e nɔ paa a, a suɔ e sane; se nɔ nɛ hɛɛɔ yayami nɛ a pee lɛ mi kpamisa a, e kɛ e huɛmɛ a kpɛti puɛɔ.

¹⁰ Ke a ka nɔ nɛ kɔɔ sane se hɛ mi ɔ, e naa he se babauu pe kuasia nɛ a fia e se mi kpa si lafa sɔuu.

¹¹ Nɔ́ nɛ nɔmlɔ yayami tsuɔ kɛkɛ ji kaa e tsɔ atuã. E kɛ tsɔlɔ yiwutsotsɛ lɛ ma ya kpe.

¹² Afani nɔ́ nɛ o kɛ osisiblisi nɛ a nuu e bimɛ maa kpe, pe nɔ́ nɛ o kɛ kuasia nɛ ngɛ biɛe maa kpe.

¹³ Nɔ nɛ ngɔɔ yayami kɛ toɔ kpakpa nane mi ɔ, yayami be e we mi tae gblegbleegble.

¹⁴ Pɛ sisi jemi ngɛ kaa nyu nɛ a bli nya nɛ́ e be; lɔ ɔ he ɔ, benɛ nya sami ɔ mi wɛ lolo ɔ, moo ngmɛɛ he.

¹⁵ Nɔ nɛ woɔ yayami peelɔ nguɔ, kɛ nɔ nɛ buɔ dalɔ fɔ ɔ, Yawɛ hiɔ mɛ tsuo.

¹⁶ Mɛni se kuasia ma na ke e maa hɛɛ sika kɛ ya he nile, be mi nɛ e be juɛmi?

¹⁷ Huɛmɛ suɔ a he be tsuaa be, se nyɛmimɛ lɛɛ haomi be mi tete po a si we a sibi.

¹⁸ Nɔ nɛ be juɛmi lɛ woɔ si nɛ e daa nɔ se kaa e maa wo e hiɔhi ha lɛ.

¹⁹ Nɔ nɛ suɔ nɛ e tɔ̃ nɔ nɔ be tsuaa be ɔ, pɛ wolɔ ji lɛ; nɛ nɔ nɛ fĩaa hu, hɛ mi kpatami e ngɛ hlae ɔ nɛ.

²⁰ Nɔ nɛ nɔ́ yayami lɛ e susuɔ ɔ, e yɛ nɔ; nɔ nɛ munyu yaya jeɔ e nya mi ɔ, haomi lɛ baa e nɔ.

²¹ Bi nɛ biɛ haa e tsɛ yeɔ e tsui; tsɛ nɛ fɔ bi kuasia a, e na we bua jɔmi.

²² Ke nɔ ko bua jɔ e he be tsuaa be ɔ, e ngɛ kaa tsopa nɛ haa nɔ he wami. Se daa nɛ ke nɔ pee vii ɔ, e ngɛ lɛ nitsɛ e he gbee.

²³ Yiwutsotsɛ heɔ nyɔ mi ní ngɛ laami mi nɛ́ e kɛ plɛ dami sane hɛ mi ngɔ bu si.

²⁴ Ní lelɔ ngɔɔ níhi nɛ a he ngɛ se nami kɛ fɔɔ e hɛ mi; kuasia lɛɛ daa nɛ ɔ, e hɛ ngɛ je ɔ tsuo nɔ kɔe.

²⁵ Bi kuasia haa e tsɛ yeɔ tsui, nɛ e haa e nyɛ yeɔ kɔmɔ.

²⁶ Nɔ nɛ sane da a, e sɛ kaa a bɔɔ lɛ hiɔ. Odehehi hu e sɛ kaa a fiaa mɛ ní yaka.

²⁷ Nɔ nɛ tu we munyu puu ɔ, juɛmitsɛ ji lɛ. Nɔ nɛ hɛ mi ka si ɔ, e le ní.

²⁸ Kuasia tete, ke e ma e nya nɛ e tu we munyu ɔ, a buɔ lɛ ní lelɔ.