Abɛ Womi 16 - BAIBLO ALOO NGMAMI KLƆUKLƆU Ɔ

¹ Nɔmlɔ ma nyɛ maa to nɔ́ ko he ga ngɛ e yi mi. Se kaa nɔ́ ɔ maa hi, loo e be hie ɔ, lɔ ɔ lɛɛ e ngɛ Yawɛ dɛ mi.

² Nɔ́ tsuaa nɔ́ nɛ nɔmlɔ adesa ngɛ pee ɔ da ha lɛ; se Yawɛ lɛɛ nɔmlɔ tsui mi lɛ e hyɛɔ.

³ Ke o ma tsu nɔ́ ko ɔ, ha nɛ Yawɛ nɛ gbaa o yi mi tomi ɔ nɔ. Ke o pee ja a, e maa hi ha mo.

⁴ Nɔ́ tsuaa nɔ́ nɛ Yawɛ pee ɔ, nɔ́ ko he kɛ̃ lɛ e pee ngɛ; yayami peeli tete po, a ngɛ kɛ ha hɛ mi kpatami.

⁵ Nɔ tsuaa nɔ nɛ woɔ e he nɔ ɔ, e he peeɔ Yawɛ tai. Bɔ tsuaa bɔ nɛ pee ɔ, ja a gbla e tue; e be e he yee.

⁶ Naa mɔbɔ nɛ o ye anɔkuale, kɛkɛ ɔ, Mawu kɛ o he yayami maa pa mo. Ye Yawɛ gbeye, nɛ yayami ko be o he sae.

⁷ Ke Yawɛ ná o he bua jɔmi ɔ, o he nyɛli tete po e ma ha o kɛ mɛ maa hi si ngɛ tue mi jɔmi mi.

⁸ E hi kaa o maa ye anɔkuale nɛ o nine nɛ su nɔ́ bɔbɔyoo nɔ, pe kaa o maa ye amimi kɛ na ní babauu.

⁹ Nɔmlɔ adesa toɔ ga ngɛ e yi mi, se Mawu ji nɔ nɛ tsɔɔ lɛ nɔ́ nɛ sa kaa e pee.

¹⁰ Ke matsɛ buá sane he ɔ, tɔmi ko kulaa be he; ejakaa matsɛ ɔ, Mawu biɛ mi e tuɔ munyu ngɛ.

¹¹ Yawɛ suɔ kaa jua yeli nɛ a ngɔ sɛni, kɛ sɛni tɛ kpakpahi kɛ jua ní, konɛ a ko sisi nɔ.

¹² Matsɛmɛ hiɔ yayami peemi; ejakaa matsɛ sɛ ɔ, dami sane yemi nɔ lɛ a to lɛ sisi ngɛ.

¹³ Nihi nɛ tuɔ anɔkuale ɔ, matsɛmɛ naa a he bua jɔmi; ejakaa nɔ́ nɛ matsɛmɛ suɔ ji anɔkuale.

¹⁴ Ní lelɔ bɔɔ mɔde kaa e ma ha nɛ matsɛ nɛ na bua jɔmi daa; ke matsɛ mi mi fu ɔ, nɔ ko ma gbo.

¹⁵ Nihi nɛ matsɛ suɔ mɛ ɔ, e naa mɛ mɔbɔ. A wami si himi peeɔ kpakpa, kaa bɔ nɛ bɔku haa nɛ gbo nyu nɛɔ pueɔ si ɔ.

¹⁶ Ke o le ní ɔ, e hi hluu pe sika tsu; juɛmi hi pe sika hiɔ.

¹⁷ Blɔ nɛ kɛ nɔ yɛ yayami mi ɔ, lɔ ɔ nɔ nimli kpakpahi nyɛɛɔ. Nɔ nɛ hyɛɛ e he nɔ saminya a, e he lo yi lɛ e ngɛ baae ɔ nɛ.

¹⁸ Nɔ nɛ woɔ e he nɔ ɔ, e hɛ mi kpataa; nɔ nɛ tsɔɔ e he ɔ, e blɔ nya jeɔ e dɛ.

¹⁹ E hi kaa o maa pee o he humi nɛ a na mo ngɛ ohiatsɛmɛ a kpɛti, pe nɔ́ nɛ a maa na mo nɛ o kɛ he nɔ woli ngɛ ní nɛ a ha dlae.

²⁰ Bu nɔ́ nɛ a ngɛ mo tsɔɔe ɔ tue, nɛ e maa hi ha mo; ngɔɔ o hɛ ngɔ fɔ Yawɛ nɔ, nɛ o ma na bua jɔmi.

²¹ Nɔ nɛ nuɔ nɔ́ sisi ɔ, ní lelɔ ji lɛ. E kɛ munyu blɛuu gblaa nihi a juɛmi se kɛ baa anɔkuale ɔ he.

²² Juɛmi ngɛ kaa vu nɛ haa nɔ wami kɛ ha ní leli, se kuasia lɛɛ lɛ nitsɛ e biɛmi ji nɔ́ nɛ gblaa e tue.

²³ Ní leli susuɔ a yi mi saminya loko a tuɔ munyu, nɛ ke a de nɔ́ ko ɔ, munyu ɔ taa nɔ tsui mi wawɛɛ nitsɛ.

²⁴ Munyu kpakpa ngɔɔ kaa hwo; e haa nɔmlɔ tso ɔ he wami.

²⁵ Blɔ nɛ moo o susu kaa e da a, nyagbe ɔ, e kɛ mo yaa gbenɔ mi.

²⁶ Mi mi hwɔ nɛ yeɔ ní tsulɔ ɔ, lɔ ɔ haa e tsuɔ ní kɛ hɛdɔ, konɛ e nya mi ngma ko bɔ lɛ.

²⁷ Yakayaka nimli toɔ ga nɛ a kɛ maa ye a nyɛmimɛ awi; a nya mi munyu tete po ngɛ kaa la nɛ ngɛ nɔ́ sãe.

²⁸ Nimli yayamihi woɔ pɛ; siekutsɛmɛ puɛɔ huɛmɛ kpakpahi a kpɛti.

²⁹ Yiwutsotsɛ sisiɔ e nyɛmi, nɛ e ngɔɔ lɛ kɛ ya woɔ haomi mi.

³⁰ Nihi nɛ muɔɔ nɛ a jeɔ a lungu kpo kɛ tsɔɔ mo, nɛ a hii a hɛngmɛ fiae kɛ ha mo ɔ, ga yayami a ngɛ toe ɔ nɛ. Moo hyɛ mɛ saminya.

³¹ Yi mi mua ngɛ kaa jlasi nɛ woɔ nɔ hɛ mi nyami; nihi nɛ peeɔ nɔ́ nɛ da lɛ a naa lɔ ɔ.

³² Nɔ nɛ mi mi fu we mla a, e hi pe katsɛ; nɔ nɛ yeɔ e he nɔ ɔ, e hi pe tatsɛ nɛ ya ye ma ko nɔ kunimi.

³³ Nimli adesahi fɔɔ sɔ nɛ a kɛ le Mawu yi mi tomi. Se bɔ nɛ níhi ma ya ba ha a, Yawɛ pɛ lɛ e tsɔɔ.