Abɛ Womi 14 - BAIBLO ALOO NGMAMI KLƆUKLƆU Ɔ

¹ Yo ní lelɔ haa nɛ we bɔɔ, se yo kuasia ní peemi níhi ywiaa we.

² Ke o peeɔ nɔ́ nɛ da a, lɔ ɔ tsɔɔ kaa o yeɔ Yawɛ gbeye. Se ke o yi anɔkuale ɔ, lɔ ɔ tsɔɔ kaa o ngɛ e he guɛ gbee.

³ Kuasia nya mi munyu fiaa lɛ kpa. Ní lelɔ lɛɛ e nya mi munyu jeɔ lɛ kɛ jeɔ haomi mi.

⁴ He nɛ na be nɛ a kɛ maa gbla na kpakplaa kɛ hu ɔ, blɛfo gba mi fɔɔ si gu. Ke na ngɛ ɔ, lɔ ɔ lɛɛ gba a mi hyiɔ tɔ.

⁵ Anɔkuale odase yelɔ ngɔɛ nya. Lakpa odase yelɔ lɛɛ lakpa pɛ e yeɔ.

⁶ Nɔ buili hlaa kaa a maa le ní, se nile bɔɔ mɛ. Nihi nɛ nuɔ nɔ́ sisi ɔ, mɛɛ a leɔ ní mla.

⁷ O kɛ kuasia ko bɔ; o be nile munyu ko nue kɛ je e nya mi.

⁸ Ní lelɔ juɛmi tsɔɔ lɛ blɔ nɛ hi. Kuasiahi lɛɛ a juɛmi sisiɔ mɛ.

⁹ Yayami gba we kuasia nya kulaa. Se nihi nɛ peeɔ nɔ́ nɛ da a, mɛɛ a suɔ kaa a kɛ a he yayami nɛ pa mɛ.

¹⁰ Mo nitsɛ nɛ o le o hɛdɔ be, kɛ be nɛ o naa bua jɔmi; nɔ kpa ko li.

¹¹ A maa ku yayami peeli a we kɛ pue si. Se ni kpakpahi lɛɛ a we maa bɔ.

¹² Blɔ nɛ nɔmlɔ susuɔ kaa e da a, nyagbe ɔ, e kɛ nɔ yaa gbenɔ mi.

¹³ Muɔmi haa kɔmɔ yemi nɔ; ke bua jɔmi se po ɔ, aywilɛho lɛɛ e tɛ gblegbleegble.

¹⁴ A maa gbla yayami peelɔ tue ngɛ e yayamihi a he; nɔmlɔ kpakpa hu ma na e ní kpakpahi a he hiɔwo.

¹⁵ Kuasia heɔ nɔ́ tsuaa nɔ́ yeɔ. Ní lelɔ lɛɛ e le e nane nya hyɛmi.

¹⁶ Ní lelɔ yeɔ sane gbeye; e hyɛɛ e he nɔ saminya nɛ e ko pee yayami. Kuasia lɛɛ e heɔ e he yeɔ, nɛ e peeɔ e níhi basabasa.

¹⁷ Nihi nɛ a mi mi kɛ́ fumi peeɔ a níhi basabasa kaa kuasiahi. Se ní leli lɛɛ a toɔ a tsui si.

¹⁸ Nihi nɛ be juɛmi ɔ, biɛmi ji nɔ́ nɛ a naa ngɛ a he. Juɛmitsɛmɛ lɛɛ nile haa a hɛ mi baa nyami.

¹⁹ Yayami peeli ma kpla si ha ni nɛmɛ nɛ peeɔ nɔ́ nɛ da, nɛ a ma bi mɛ a hiami níhi.

²⁰ Ohiatsɛ ɔ, e nyɛmi tete po sume lɛ. Se niatsɛ lɛɛ e ngɛ huɛmɛ babauu.

²¹ Nɔ nɛ gbeɔ e nyɛmi he guɛ ɔ, yayami e ngɛ pee ɔ nɛ. Se nɔ nɛ naa ohiatsɛ mɔbɔ ɔ, a gbaa lɛ.

²² Nihi nɛ toɔ ga yayami ɔ, a hɛ mi ma kpata. Se ni nɛmɛ nɛ susuɔ nɔ́ kpakpa a, a maa na mɛ mɔbɔ, nɛ a blɔ maa da mɛ.

²³ Ke o tsu ní ɔ, o ma na nɔ́ ko kɛ je mi. Se ke o hii si nɛ o ngɛ munyu tue puu kɛkɛ ɔ, o maa ye ohia.

²⁴ Ní lelɔ ɔ, e se nami ji ní nami; kuasia lɛɛ e hiɔwo ji biɛmi.

²⁵ Anɔkuale odase yelɔ heɔ nɔ yi wami; lakpa odase yelɔ lɛɛ nɔ se blɔ e tsɔɔ.

²⁶ Nɔ nɛ yeɔ Yawɛ gbeye ɔ, e kɛ e bimɛ tsuo hiɔ si ngɛ he jɔmi mi.

²⁷ Yawɛ gbeye yemi ngɛ kaa nyu vu nɛ haa nɔ wami; e jeɔ nɔ kɛ jeɔ gbenɔ mi.

²⁸ Matsɛ nɛ e we bihi a he hiɛ babauu ɔ, e naa biɛ. Se ganɔ nɛ be nihi ngɛ e sisi ɔ lɛɛ tsa pi nɔ ko kulaa ji lɛ.

²⁹ Nɔ nɛ mi mi fu we mla a, ní lelɔ agbo ji lɛ. Nɔ nɛ be tsui ɔ, e jeɔ kuasia.

³⁰ Tue mi jɔmi haa nɛ nɔmlɔ tso ɔ naa he wami, se kuasia jemi woɔ nɔ hiɔ.

³¹ Nɔ nɛ waa ohiatsɛ yi mi ɔ, Mawu ɔ nɛ bɔ ohiatsɛ ɔ e ngɛ jɛe ɔ nɛ. Se nɔ nɛ naa ni nɛmɛ nɛ e fi mɛ mɔbɔ ɔ, e ngɛ Mawu hɛ mi nyami woe.

³² Yayami peelɔ ɔ, lɛ nitsɛ e ní yayamihi nɛ ngɔɔ lɛ kɛ woɔ haomi mi. Se nɔmlɔ kpakpa lɛɛ gbenɔ mi tete po e ngɛ hɛ nɔ kami.

³³ Nɔ nɛ nuɔ nɔ́ sisi ɔ, ní lelɔ ji lɛ. Kuasia lɛɛ nɔ́ nɛ a tsɛɛ nile tete e li.

³⁴ Dami sane yemi haa nɛ ma yaa nɔ; yayami peemi ɔ, ma hɛ mi si e pueɔ.

³⁵ Tsɔlɔ nɛ le ní ɔ, matsɛ suɔ lɛ. Se tsɔlɔ nɛ tsuɔ zo ní ɔ, lɛɛ matsɛ gblaa e tue.