Abɛ Womi 12 - BAIBLO ALOO NGMAMI KLƆUKLƆU Ɔ

¹ Nɔ nɛ le ní ɔ, e suɔ nɛ ke e ngɛ nɔ́ ko pee nɛ dɛ ɔ, a de lɛ. Se kuasia lɛɛ e sume nɛ a kaa e hɛ mi.

² Yawɛ náá nɔmlɔ kpakpa he bua jɔmi. Se nɔ nɛ toɔ ga yaya lɛɛ e buɔ lɛ fɔ.

³ Yayami peemi ha we nɛ nɔ yaa nɔ. Nɔ nɛ peeɔ kpakpa lɛɛ e daa si kpɛii.

⁴ Yo kpakpa ngɛ kaa jlasi ngɛ e huno yi mi. Yo nɛ pueɔ e huno hɛ mi si lɛɛ e ngɛ kaa hiɔ ngɛ e huno wuhi a mi.

⁵ Nihi nɛ peeɔ nɔ́ nɛ da a, ní kpakpahi a he a susuɔ. Se ga nɛ yayami peeli toɔ ɔ, sisimi sɔuu.

⁶ Yayami peeli a nya mi munyu kpataa nɔ hɛ mi. Se nihi nɛ peeɔ nɔ́ nɛ da lɛɛ a nya mi munyu heɔ nɔ yi wami.

⁷ A ma kpata yayami peeli a hɛ mi, nɛ a be mɛ nae hu. Se nihi nɛ peeɔ nɔ́ nɛ da lɛɛ a nina maa hi si daa.

⁸ Ke o ngɛ juɛmi ɔ, a ma je o yi. Se ke o biɛ lɛɛ a maa gbe o he guɛ.

⁹ Nɔ nɛ nɔ́ ko be e dɛ, se e tsuɔ ní nɛ e yeɔ ɔ, e hi kulaa pe nɔ nɛ peeɔ e he agbo, nɛ e nya mi ngma po bɔɔ lɛ.

¹⁰ Nɔmlɔ kpakpa hyɛɛ e lohwehi a nɔ saminya. Se nimli yayamihi lɛɛ mɔbɔ nɛ a naa a lohwehi po, yi mi wami sɔuu.

¹¹ Ngmɔ hulɔ nɛ tsuɔ ní wawɛɛ ɔ ma na niye ní babauu. Se nɔ nɛ ya nyɛɛɔ yakayaka níhi a se lɛɛ kuasia ji lɛ.

¹² Yayami peeli a suɔmi nya ní ji kaa a hi yayami pee kpamisa. Nimli kpakpahi lɛɛ a daa si kpɛii.

¹³ Nɔmlɔ yayami nya mi munyuhi peeɔ klama ha lɛ nɛ e duɔ. Se nɔmlɔ kpakpa lɛɛ e he jee sane mi.

¹⁴ Munyu kpakpahi nɛ jeɔ nɔ ko nya mi, kɛ níhi nɛ e tsuɔ ɔ, lɔ ɔmɛ a he hiɔwo e naa.

¹⁵ Kuasia susuɔ kaa be tsuaa be ɔ, e nɔ́ da. Ní lelɔ lɛɛ e buɔ ga womi tue.

¹⁶ Ke kuasia mi mi fu ɔ, e kɛ́ we nɛ a naa. Ní lelɔ lɛɛ ke o jɛ lɛ tete po, e bui.

¹⁷ Ke anɔkualetsɛ ye odase ɔ, a yeɔ dami sane. Lakpa odase yelɔ lɛɛ nɔ e sisiɔ.

¹⁸ Munyu nɛ a tuɔ kɛkɛ nɛ juɛmi be mi ɔ, e yeɔ nɔ awi kaa klaate. Se ní lelɔ nya mi munyu tsaa nɔ.

¹⁹ Lakpa hii si be bɔɔ kɛkɛ, se anɔkuale lɛɛ e ngɛ daa.

²⁰ Nihi nɛ toɔ ga yayami ɔ, mɛ nitsɛmɛ a he lɛ a ngɛ sisie. Se nihi nɛ susuɔ nɔ́ kpakpa a, mɛɛ lɛɛ a ma na bua jɔmi.

²¹ Nihi nɛ peeɔ nɔ́ nɛ da a, nɔ́ yayami ko be a he sae. Se yiwutsotsɛmɛ lɛɛ haomi sɔuu ji nɔ́ nɛ maa ba a nɔ.

²² Yawɛ hiee lakpatsɛmɛ. Se nihi nɛ yeɔ anɔkuale ɔ, mɛɛ lɛɛ e naa a he bua jɔmi.

²³ Ní lelɔ maa e nya kɛ toɔ e nile nɔ. Kuasia lɛɛ e tuɔ munyu puu, nɛ lɔ ɔ nihi kɛ naa kaa kuasia ji lɛ.

²⁴ Nɔ nɛ tsuɔ ní wawɛɛ ɔ, e ma na nɔkɔtɔma blɔ nya; nɔ nɛ peeɔ hejɔ lɛɛ e ma sɔmɔ.

²⁵ Tsui yemi ha we nɔ bua jɔmi, se munyu kpakpa haa nɔ bua jɔɔ e he.

²⁶ Nɔmlɔ kpakpa tsɔɔ e nyɛmi blɔ kpakpa. Se nɔmlɔ yayami ní peemi níhi haa mɛ tsuo a laa blɔ.

²⁷ Nɔ nɛ peeɔ hejɔ ɔ, nɔ́ nɛ e ngɛ hlae ɔ, e nine be nɔ sue ligbi ko ligbi ko. Se nɔ nɛ tsuɔ ní wawɛɛ lɛɛ e ma na ní babauu.

²⁸ Nɔ́ nɛ da peemi ji blɔ nɛ kɛ nɔ yaa wami mi. Nɔ nɛ nyɛɛɔ kikɛmɛ a blɔ nɛ ɔ nɔ ɔ, e be gboe.