Abɛ Womi 11 - BAIBLO ALOO NGMAMI KLƆUKLƆU Ɔ

¹ Susumi ní yayahi nɛ a kɛ sisiɔ nɔ ɔ, Yawɛ sume. Nɔ́ nɛ e suɔ ji nɔ́ susumi ní kpakpahi.

² Hɛ mi si puemi nyɛɛɔ he nɔ womi se. Nɔ nɛ baa e he si ɔ, e le nɔ́.

³ Nɔ́ nɛ hɛɛɔ nimli kpakpahi, nɛ tsɔɔ mɛ blɔ ngɛ je mi ji anɔkuale nɛ a yeɔ ɔ. Se ni nɛmɛ nɛ yi anɔkuale lɛɛ mɛ nitsɛmɛ a ní peemi ní yayamihi lɛ kpataa a hɛ mi.

⁴ Ní babauu nɛ nɔ ko na a be nyɛe ma he e yi wami ngɛ kojomi ligbi ɔ nɔ. Nɔ́ nɛ ma nyɛ he e yi wami ji anɔkuale nɛ e yeɔ ɔ.

⁵ Nɔ nɛ pee we nɔ́ ko nɛ dɛ ɔ, anɔkuale nɛ e yeɔ he je ɔ, e je mi si himi daa lɛ. Se yiwutsotsɛ lɛɛ lɛ nitsɛ e ní yayamihi lɛ ma kpata e hɛ mi.

⁶ Nɔ nɛ peeɔ nɔ nɛ da a, anɔkuale nɛ e yeɔ ɔ, jeɔ lɛ kɛ jeɔ níhi a mi. Se nihi nɛ yi anɔkuale ɔ, mɛ nitsɛmɛ a jiklɔɔ lɛ kpataa a hɛ mi.

⁷ Ke nɔmlɔ yayami gbo pɛ kɛkɛ nɔ́ ko nɛ e ngɔ e hɛ ngɔ fɔ nɔ ɔ hu laa. Nɔmlɔ nɛ li Mawu ɔ, ke e ngɛ nɔ kpakpa ko blɔ hyɛe ɔ, e peeɔ yaka.

⁸ Nɔ nɛ peeɔ nɔ nɛ da a, a jeɔ lɛ kɛ jeɔ haomi mi, nɛ haomi ɔ baa nɔmlɔ yayami mohu nɔ.

⁹ Nɔmlɔ nɛ li Mawu ɔ, e kɛ e nya mi munyu puɛɔ e nyɛmi. Se nɔ nɛ peeɔ nɔ́ nɛ da a, e juɛmi ma he e yi wami.

¹⁰ Ke níhi a mi hi ha nihi nɛ peeɔ nɔ nɛ da a, bua jɔmi baa ma a mi. Ke yiwutsotsɛmɛ a hɛ mi kpata a, ma a hwɔɔ lele.

¹¹ Nimli kpakpahi a ní peemi ní kpakpahi haa ma yaa nɔ. Se yiwutsotsɛmɛ a nya mi munyu haa ma hɛ mi kpataa.

¹² Nɔ nɛ gbeɔ e nyɛmi he guɛ ɔ, e be juɛmi; ní lelɔ ɔ, pe e maa e nya.

¹³ Nɔ nɛ hii sieku yee kɛ hii bee ɔ, e jeɔ laami sanehi kpo. Se nɔ nɛ heɔ nɔ yeɔ ɔ laa nɔ́ nɔ.

¹⁴ Ma nɛ na we ga woli kpakpa a, e ywiaa. Se ma, he nɛ ga woli kpakpa hiɛ ngɛ ɔ, tue mi jɔmi ngɛ lejɛ ɔ.

¹⁵ Nɔ nɛ daa nubwɔ se ɔ, e piaa e he. Se nɔ nɛ pee we ja lɛɛ e yeɔ e he.

¹⁶ Yo nɛ hɛ mi ngɛ nyami ɔ, a buu lɛ, se yo nɛ be subai ɔ lɛɛ hɛ mi si puemi e kɛ baa.

¹⁷ Nɔ nɛ naa mɔbɔ ɔ, lɛ nitsɛ e he kpakpa lɛ e ngɛ pee. Se nɔ nɛ yi mi wa a, e ngɛ lɛ nitsɛ e he plaae.

¹⁸ Nɔmlɔ yayami ɔ, nɔ́ ko bɔbɔyoo kɛkɛ e naa kɛ jeɔ e yi wu tso ní peemi níhi a mi. Nɔ nɛ peeɔ nɔ́ nɛ da lɛɛ e nine suu hiɔwo kpakpa nɔ kɛ̃.

¹⁹ Nɔ nɛ peeɔ nɔ́ nɛ da kpamisa nɛ e kpa we ɔ, e yi ma na wami. Se nɔ nɛ dii yayami se ɔ, e ma gbo.

²⁰ Nihi nɛ a juɛmi mi hyi tɔ kɛ yayami ɔ, Yawɛ sume mɛ saasaa; nihi nɛ e suɔ ji ni nɛmɛ nɛ peeɔ nɔ́ nɛ da.

²¹ Anɔkuale sane ji kaa yayami peelɔ ɔ, ja a gbla e tue kokooko. Se nihi nɛ peeɔ nɔ́ nɛ da a, mɛɛ lɛɛ a maa ye a he.

²² Yo nɛ e he ngɛ fɛu, se e juɛmi mi kuɔ we ɔ, e ngɛ kaa sika tsu ga ngɛ kpotoo gugwɔ mi.

²³ Nihi nɛ peeɔ nɔ́ nɛ da a, nɔ́ nɛ a suɔ ji kaa nɔ́ ko tsuaa nɔ́ ko ɔ, kpakpa pɛ nɛ je mi. Se yiwutsotsɛmɛ lɛɛ abofu kɛkɛ ji nɔ́ nɛ a hii blɔ hyɛe.

²⁴ Ni komɛ haa nɔ nɔ́, se kɛ̃ ɔ, a naa ní babauu. Ni komɛ hu, nɔ́ nɛ sa kaa a ha nɔ ɔ, a peeɔ he kpɛle, se a yeɔ ohia.

²⁵ Nɔ nɛ haa nɔ nɔ́ ɔ, e bɔɔ; nɔ nɛ haa nɛ nihi tɔɔ ɔ, lɛ nitsɛ hu e tɔɔ.

²⁶ Nɔ nɛ tsiɔ blɛfo nya a, ma a maa gbiɛ lɛ. Se nɔ nɛ juaa blɛfo lɛɛ a maa gbaa lɛ.

²⁷ Nɔ nɛ hlaa nɔ́ kpakpa se blɔ ɔ, e hɛ mi baa nyami. Nɔ nɛ dii yayami se ɔ, e kɛ yayami kpeɔ.

²⁸ Nihi nɛ ngɔɔ a hɛ kɛ fɔɔ ní nami nɔ ɔ, a hɛ mi ma kpata. Ni nɛmɛ nɛ peeɔ nɔ́ nɛ da a, mɛɛ lɛɛ a maa bɔ kaa ba mumu.

²⁹ Nɔ nɛ ngɔɔ haomi kɛ baa e weku li a nɔ ɔ, nyagbe ɔ, e jeɔ mi dɛ gu. Kuasia ma sɔmɔ ní lelɔ daa.

³⁰ Nɔ́ nɛ da peemi haa nɔ wami; basabasa lɛɛ gbenɔ e kɛ baa.

³¹ Nɔ nɛ peeɔ nɔ́ nɛ da a, e naa e hiɔwo ngɛ zugba nɛ ɔ nɔ tete po. Lɔ ɔ he ɔ, yiwutsotsɛmɛ, kɛ yayami peeli hu ja a gbla a tue kɛ̃.