Abɛ Womi 1 - BAIBLO ALOO NGMAMI KLƆUKLƆU Ɔ

Abɛhi a he se nami

¹ Israel matsɛ, Salomo, David bi ɔ abɛhi ji nɛ ɔmɛ nɛ.

² Abɛ nɛ ɔmɛ ma ha nɛ o maa le ní; a maa wo mo ga kpakpa, nɛ a ma ha nɛ o maa nu sanehi nɛ a mi kuɔ a sisi.

³ Abɛ ɔmɛ maa tsɔɔ mo anɔkuale yemi, dami sane yemi, kɛ nɔ́ nɛ da peemi.

⁴ Nɔ nɛ li nɔ́ ɔ, abɛ ɔmɛ ma ha nɛ e nɔ bɔ ma tsɔ; se niheyo lɛɛ e ma na juɛmi, kɛ hɛ mi si kami.

⁵ Ke ní lelɔ nu abɛ nɛ ɔmɛ ɔ, e nile ɔ maa hiɛ kɛ pue nɔ; juɛmitsɛ hu e juɛmi ɔ mi ma blɛke pe kekle ɔ,

⁶ konɛ a nyɛ nɛ a nu abɛhi, kɛ ní leli a munyuhi nɛ a mi kuɔ ɔ a sisi saminya.

A wo nihewi ga

⁷ Loko o ma na nile ɔ, ja o ye Yawɛ gbeye. Kuasiahi bui nile, nɛ slɔmi gbi hu a sume.

⁸ Ye bi, ke o tsɛ ngɛ mo tsɔsee ɔ, bu tue! Ke o nyɛ hu ngɛ mo ní tsɔɔe ɔ, ko kua!

⁹ Ejakaa lɔ ɔmɛ nɛ ma dla mo nɛ o ba o je mi saminya, kaa bɔ nɛ duku kpakpa, loo kuɛ ní haa nɔ he peeɔ fɛu ɔ.

¹⁰ Ye bi, ke yayami peeli ngɛ mo mlɔɔe ɔ, koo nyɛɛ a se.

¹¹ Ke a de mo ke, “Ha nɛ waa ho nɛ wa ya hla nɔ ko waa gbe! Ha wa ya wo nɔ ko nɛ pee we nɔ́ ko ka, nɛ waa gbe lɛ yaka gu!

¹² Waa mii mɛ hɛ ngmengmle kaa a yaa gbeje; waa ngɔ mɛ kaa yɔkɔ ngɔɔ gbogboe, be mi nɛ a ngɛ kpakpataa!

¹³ Wa ma na ní kpakpahi nɛ a he jua wa babauu, nɛ wa we ɔmɛ ma hyi tɔtɔɔtɔ kɛ níhi nɛ wa ha.

¹⁴ Ba piɛ wa he. Ke wa ná nɔ́ ko ɔ, wɔ tsuo wa maa dla lɛ fiee!”

¹⁵ Ye bi, o kɛ kikɛmɛ a nimli ko bɔ. Koo nyɛɛ a se.

¹⁶ A he sɔɔ kɛ yayami peemi; a he sɔɔ kɛ pueɔ muɔ si.

¹⁷ Ke lohwe pɛlitsɛ ngɛ mo hyɛe nɛ o tsɔ lɛ klama a, o tsu yaka ní.

¹⁸ Se nimli kaa kikɛ nɛ ɔmɛ lɛɛ mɛ nitsɛmɛ a he klama a tsɔ ɔ nɛ; mɛ nitsɛmɛ lɛ a maa du klama a, nɛ a ma gbo.

¹⁹ Nihi tsuo nɛ guu awi yemi mi kɛ naa ní ɔ, bɔ nɛ a nyagbe ya baa ji nɛ ɔ nɛ; awi yemi mi nɔuu a gboɔ ngɛ.

Nile wo gbi

²⁰ Nile ngɛ ngmlaa kpae boboobo ngɛ gbɛjegbɛ nɔ, kɛ jua mi.

²¹ E ngɛ kpae boboobo ngɛ ma agbo ɔmɛ a nya, kɛ hehi tsuo nɛ nihi buaa a he nya ngɛ. E ngɛ dee ke,

²² “Kuasiahi! Mɛni be nyɛ maa biɛ kɛ yaa si? Fɛu yeli! Mɛni be nyɛ maa ye fɛu kɛ yaa si? Anɛ nyɛ be ní kasee?

²³ Nyɛɛ bu tue nɛ ma ka nyɛ hɛ mi. Ma wo nyɛ ga kpakpa, nɛ i kɛ nyɛ maa tu nile munyu.

²⁴ I hla nyɛ se blɔ, nɛ i tsɛ nyɛ si abɔ ke nyɛɛ ba ye ngɔ. Se nyɛ bui fɛɛ.

²⁵ Ga tsuo nɛ i wo nyɛ ɔ, nyɛ ngɔɛ, nɛ nyɛ kplɛɛ we kaa ma kua nɔ́ ha nyɛ.

²⁶ Lɔ ɔ he ɔ, ke haomi ba nyɛ nɔ ɔ, imi hu ma muɔ nyɛ. Ke nyɛ hɛ dɔ ɔ, ma ye nyɛ he fɛu.

²⁷ Ke haomi ba nyɛ nɔ kaa nɔ́ nɛ kɔɔhiɔ nɛ nya wa lɛ ngɛ fiae, nɛ amanehlu ba na nyɛ kaa lasiogblee, nɛ nyɛ ngɛ nyɛ tsui yee ɔ,

²⁸ jamɛ a be ɔ mi ɔ, nyɛ ma tsɛ mi, se i be nɔ hee. Nyɛ ma hla ye se blɔ kɛ hɛdɔ, nɛ nyɛ be mi nae.

²⁹ Ejakaa nyɛ bui nile he akɔtaa; Yawɛ hu, nyɛ yi lɛ gbeye.

³⁰ Nyɛ sume ga womi; nɛ ke i ka nyɛ hɛ mi hu, nyɛ kplɛɛ we.

³¹ Lɔ ɔ he ɔ, nɔ́ nɛ nyɛ tsu ɔ, lɔ ɔ he hiɔwo nyɛ ma na; nyɛ ní yaya amɛ nɔuu maa hao nyɛ.

³² Kuasiahi gboɔ, ejakaa a bui nile; a heɔ mɛ nitsɛmɛ a he yeɔ, nɛ nɔ́ nɛ ɔ kpataa a hɛ mi.

³³ Se nɔ tsuaa nɔ nɛ buɔ mi tue ɔ, e maa hi si ngɛ he jɔmi mi, nɛ e be gbeye yee kaa haomi ko maa ba e nɔ.”