2 Yohane 1 - BAIBLO ALOO NGMAMI KLƆUKLƆU Ɔ

¹ Imi nɔkɔtɔma a, i ngɛ womi nɛ ɔ ngmae kɛ ha mo awenyɛ nɛ a hla mo ɔ, kɛ o bimɛ ɔmɛ nɛ i suɔ nyɛ akɛnɛ nyɛ hɛɛ anɔkuale ɔ mi ɔ. Pi imi nɔ kake too nɛ i suɔ nyɛ; nɔ tsuaa nɔ nɛ le anɔkuale ɔ suɔ nyɛ.

² Ejakaa anɔkuale ɔ ngɛ wa mi, nɛ anɔkuale ɔ kɛ wɔ maa hi si kɛ maa ya neneene.

³ Dloomi, mɔbɔ nami, kɛ he jɔmi nɛ je Tsɛ Mawu ɔ, kɛ Tsɛ ɔ Bi Nyɔmtsɛ Yesu Kristo dɛ mi ɔ kɛ wɔ nɛ hi si ngɛ anɔkuale kɛ suɔmi mi.

Anɔkuale kɛ suɔmi

⁴ I na bua jɔmi babauu, benɛ i nu kaa o bimɛ ɔmɛ ekomɛ baa a je mi ngɛ anɔkuale ɔ nya kaa bɔ nɛ Tsɛ ɔ fa wɔ ke waa pee ɔ.

⁵ Lɔ ɔ he ɔ, awenyɛ nɛ i suɔ! I kpa mo pɛɛ, nyɛ ha nɛ waa suɔ wa sibi. Nɔ́ nɛ i ngɛ ngmae nɛ ɔ, pi mlaa he, se mohu mlaa a nɛ a wo wɔ kɛ je sisije ɔ.

⁶ Suɔmi nɛ i ngɛ he munyu tue ɔ tsɔɔ kaa waa ye Mawu mlaa amɛ a nɔ. Kaa bɔ nɛ nyɛ nu kɛ je sisije ɔ, mlaa a ji kaa nyɛ tsuo nyɛɛ suɔ nyɛ he.

⁷ Sisili fuu ngɛ je ɔ mi he tsuaa he. Mɛ ji nihi nɛ kplɛɛ we kaa Yesu Kristo ba je ɔ mi kaa nɔmlɔ adesa. Nimli kaa kikɛ nɛ ɔ ji sisili, kɛ Kristo he nyɛli ɔ nɛ.

⁸ Lɔ ɔ he ɔ, nyɛɛ hyɛ nyɛ he saminya, konɛ ní nɛ wa tsu ɔ, nyɛ ko je mi dɛ gu; se mohu nyɛ ná hiɔwo nɛ sa.

⁹ Nɔ tsuaa nɔ nɛ maa je Kristo sane kpakpa a se ya tsɔɔ nɔ́ kpa a, e li Mawu. Nɔ nɛ tsɔɔ sane kpakpa a pɛpɛɛpɛ kaa bɔ nɛ e ngɛ kɛ je sisije ɔ, jamɛ a nɔ ɔ le Tsɛ ɔ, kɛ Bi ɔ tsuo.

¹⁰ Lɔ ɔ he ɔ, ke nɔ ko ba nyɛ ngɔ, nɛ e ba tsɔɔ we ní kaa bɔ nɛ Kristo tsɔɔ ɔ, nyɛ ko he lɛ atuu, nɛ nyɛ ba de lɛ ke, “He manye!” tete po.

¹¹ Ke nɔ ko ha lɛ hɛ mi ɔ, e tsɔɔ kaa e kɛ lɛ peeɔ kake kɛ tsuɔ ní yayamihi.

Nyagbe sɛ yemi

¹² I ngɛ níhi fuu nɛ ma ngma nyɛ mohu, se i sume kaa i kɛ ningma nyu ngmaa ngɔ fɔ womi hɛ mi. Mohu ɔ, i ngɛ blɔ hyɛe kaa ma ba slaa nyɛ. Ke i ba a, i kɛ nyɛ maa sɛɛ ní hɛ mi kɛ hɛ mi, nɛ wa ma na bua jɔmi babauu.

¹³ Nyɛ nyɛmiyo nɛ nyɛ suɔ lɛ ɔ bimɛ ɔmɛ ke a biɔ nyɛ.