2 Tesalonikabi 3 - BAIBLO ALOO NGMAMI KLƆUKLƆU Ɔ

Nyɛɛ sɔle ha wɔ

¹ Nyagbe ɔ, nyɛmimɛ, nyɛɛ sɔle ha wɔ, konɛ Nyɔmtsɛ ɔ munyu ɔ nɛ ya nɔ nɛ e gbɛ fĩa, nɛ a he lɛ kɛ manye ngɛ he tsuaa he kaa bɔ nɛ nyɛ hu nyɛ pee ɔ.

² Nyɛɛ sɔle, konɛ Mawu nɛ je wɔ kɛ je yiwutsotsɛmɛ, kɛ nimli yayamihi a dɛ mi; ejakaa pi nɔ tsuaa nɔ nɛ heɔ yeɔ.

³ Se Nyɔmtsɛ ɔ yeɔ anɔkuale. E maa wo nyɛ he wami, nɛ e maa bu nyɛ he, nɛ dikalɔ ɔ be nyɛe maa pee nyɛ nɔ́ ko.

⁴ Nyɔmtsɛ ɔ ha wa he nyɛ ye saminya. Enɛ ɔ he je ɔ, wa ngɛ nɔ mi mami kaa nɔ́ nɛ wa de ke nyɛɛ pee ɔ, nyɛ ngɛ pee, nɛ nyɛ maa ya nɔ maa pee.

⁵ Nyɔmtsɛ ɔ nɛ ha nɛ nyɛɛ nu Mawu suɔmi ɔ, kɛ Kristo tsui si tomi ɔ sisi saminya.

E hia kaa a tsu ní

⁶ Nyɛmimɛ, wa ngɛ nyɛ fae ngɛ wa Nyɔmtsɛ Yesu biɛ mi ke nyɛɛ kɛ nihi nɛ tsu we ní, kɛ ni nɛmɛ nɛ bɛ a je mi saminya kaa bɔ nɛ wa tsɔɔ mɛ ɔ kó bɔ.

⁷ Nyɛ nitsɛmɛ nyɛ le veveeve kaa e hia kaa nyɛɛ kase wɔ. Benɛ waa kɛ nyɛ ngɛ ɔ, wa pee we hejɔ.

⁸ Wa yi nɔ ko ní yaka nɛ́ wa wui he hiɔ; mohu ɔ, wa tsu ní kɛ pɔtɔ. Wa tsu ní nyɔ kɛ pia, konɛ wa ko pee tlomi ha nyɛ ti nɔ ko.

⁹ Wa pee enɛ ɔ, pi kaa wa be jamɛ a blɔ nya a, se mohu, konɛ waa ngɔ wa he ngɔ pee nɔ hyɛmi nɔ́ ha nyɛ nɛ nyɛɛ kase wɔ.

¹⁰ Benɛ waa kɛ nyɛ ngɛ ɔ, wa wo nyɛ mlaa nɛ ɔ ke, “Ke nɔ ko sume kaa e ma tsu ní ɔ, e ko ye ní.”

¹¹ Wa ngɛ enɛ ɔ dee, ejakaa wa nu kaa ni komɛ ngɛ nyɛ kpɛti nɛ peeɔ hejɔ; a tsu we ní, se mohu a ngɔɔ a nya ngɔ woɔ nihi a sanehi a mi.

¹² Wa ngɛ kikɛmɛ a nimli nɛ ɔmɛ mlaa woe, nɛ wa ngɛ mɛ kɔkɔ bɔe ngɛ Nyɔmtsɛ Yesu Kristo biɛ mi kaa a ba a je mi saminya, nɛ a kɛ a nine nguɛ nyɔngma nɛ tsu ní nɛ a ye.

¹³ Nyɛmimɛ, nyɛ ko ha pɔ nɛ tɔ nyɛ kɛ nɔ́ kpakpa peemi.

¹⁴ Ke nɔ ko sume kaa e maa ye nɔ́ nɛ wa ngma nyɛ nɛ ɔ nɔ ɔ, nyɛ kadi lɛ, nɛ nyɛɛ kɛ lɛ ko bɔ. Kɛkɛ ɔ, zo maa gbe lɛ.

¹⁵ Nyɛ ko bu lɛ he nyɛlɔ, se mohu nyɛɛ tu munyu ngɔ tsɔɔ lɛ kaa nyɛmi.

Nyagbe munyuhi

¹⁶ Nyɔmtsɛ, nɔ nɛ haa wɔ he jɔmi ɔ, lɛ nitsɛ nɛ ha nyɛ he jɔmi daa ngɛ nɔ́ tsuaa nɔ́ nɛ nyɛ ngɛ pee mi. Nyɔmtsɛ ɔ kɛ nyɛ tsuo nɛ hi si.

¹⁷ Imi Paulo nitsɛ, ye nine nya womi ji nɛ ɔ nɛ. Womi tsuaa womi nɛ ma ngma a, bɔ nɛ i gbeɔ nya ji nɛ ɔ nɛ. Kikɛ nɛ ɔ i ngmaa womi. I biɔ nyɛ saminya.

¹⁸ Wa Nyɔmtsɛ Yesu Kristo dloomi ɔ kɛ nyɛ kulaa nɛ hi si.