2 Tesalonikabi 2 - BAIBLO ALOO NGMAMI KLƆUKLƆU Ɔ

Dikalɔ ɔ

¹ Jehanɛ, nɔ́ nɛ kɔɔ wa Nyɔmtsɛ Yesu Kristo bami ɔ, kɛ bɔ nɛ a ma bua wa nya nɛ waa kɛ lɛ ya kpe ɔ he ji nɛ ɔ nɛ. Wa kpa nyɛ pɛɛ, nyɛmimɛ,

² ke nyɛ nu kaa mumi mi sɛ gbi ko je kpo, aloo munyu ko ngɛ pɛe, aloo kaa a ngɛ dee ke womi ko je wa ngɔ kaa Nyɔmtsɛ ɔ ligbi ɔ ba momo ɔ, nyɛ juɛmi mi ko pee nyɛ enyɔɔnyɔ, nɛ nyɛ ko hao hulɔ.

³ Nyɛ ko ha nɛ nɔ ko nɛ sisi nyɛ ngɛ blɔ ko blɔ ko nɔ. Ja nyagbe atuã tsɔmi ɔ ba kekle loko ligbi ɔ maa ba. Dikalɔ ɔ nɛ hɛ mi ma kpata a maa je kpo.

⁴ E maa te si ngɔ wo nɔ́ tsuaa nɔ́ nɛ a tsɛɛ mawu, loo nɔ́ ko nɛ a jaa a, nɛ e ma wo e he nɔ ngɛ mɛ tsuo a nɔ. E ma ya hi Mawu sɔlemi we ɔ mi tete po, nɛ e ma de ke lɛ ji Mawu.

⁵ Anɛ nyɛ kaii we kaa benɛ i kɛ nyɛ ngɛ ɔ, i de nyɛ kikɛmɛ a ní nɛ ɔmɛ tsuo lo?

⁶ Se nyɛ le nɔ́ nɛ tsi e nya nɛ e ba je we e he kpo lolo ɔ? Ke be ɔ su ɔ, dikalɔ ɔ ma ba hia kpo kɛ̃.

⁷ Yi wu tso ní nɛ a tsuɔ ngɛ laami mi ɔ, a je sisi momo. Se nɔ́ nɛ maa ba a be bae, ja a je nɔ nɛ ngɛ lɛ blɔ tsie ɔ ngɛ blɔ ɔ mi lolo.

⁸ Kɛkɛ ɔ, a ma je dikalɔ ɔ kpo paa. Se ke Nyɔmtsɛ Yesu ba a, e kɛ mumi nɛ maa je e nya mi ɔ maa gbe lɛ, nɛ e hɛ mi kpɛmi ɔ ma kpata dikalɔ ɔ hɛ mi pɛsɛpɛsɛ.

⁹ Dikalɔ ɔ maa ba kɛ Abosiami he wami, nɛ e ma ba pee lakpa nyakpɛ ní, kɛ okadi slɔɔtohi.

¹⁰ E maa gu yi wu tso ga blɔ nɔ kɛ sisi nihi nɛ a hɛ mi ma kpata a. Ee, a hɛ mi ma kpata, ejakaa a sume nɛ a ngɔ anɔkuale ɔ, konɛ a he a yi wami.

¹¹ Lɔ ɔ he ɔ, Mawu ma tsaka a juɛmi, nɛ a ma he lakpa munyu maa ye.

¹² Kɛkɛ ɔ, nihi tsuo nɛ he we anɔkuale ɔ yi, se yayami mohu he a bua jɔɔ ɔ, a maa bu mɛ fɔ.

A hla nyɛ, konɛ a he nyɛ yi wami

¹³ Se nyɛmimɛ nɛ Nyɔmtsɛ ɔ suɔ, e hia kaa waa na Mawu si daa ha nyɛ. Ejakaa kɛ je sisije lokoo ɔ, Mawu hla nyɛ, nɛ e he nyɛ yi wami kɛ gu mumi ɔ nɛ maa tsu nyɛ he ɔ, kɛ anɔkuale ɔ nɛ nyɛ he ye ɔ nɔ.

¹⁴ Mawu tsɛ nyɛ kɛ gu sane kpakpa a nɛ wa fiɛ ha nyɛ ɔ nɔ, konɛ wa Nyɔmtsɛ Yesu hɛ mi nyami ɔ, nyɛ hu nyɛ na nyɛ blɔ fa mi nɔ́.

¹⁵ Lɔ ɔ he ɔ, nyɛmimɛ, nyɛɛ da si kpɛii! Anɔkuale ɔ nɛ wa tsɔɔ nyɛ ɔ, níhi nɛ wa de nyɛ, kɛ ní nɛmɛ nɛ wa ngma nyɛ ɔ, nyɛɛ pɛtɛ he wawɛɛ.

¹⁶ Wa Nyɔmtsɛ Yesu Kristo nitsɛ, kɛ wa Tsɛ Mawu, nɔ nɛ suɔ wɔ kikɛ nɛ ɔ, nɛ e gu e dloomi ɔ nɔ, nɛ e wo wɔ he wami, nɛ e ha wɔ hɛ kɛ nɔ fɔmi nɛ nya wa a,

¹⁷ e wo nyɛ bua, nɛ e ha nyɛ he wami nɛ nyɛ tsu ní kpakpa, nɛ nyɛɛ tu munyu kpakpa daa.