2 Petro 1 - BAIBLO ALOO NGMAMI KLƆUKLƆU Ɔ

¹ Imi Simon Petro, Yesu Kristo tsɔlɔ, kɛ e bɔfo ɔ, i ngɛ womi nɛ ɔ ngmae kɛ yaa ha nihi nɛ a nine su hemi kɛ yemi nɛ he jua wa saminya kaa wɔ hu wa nɔ́ ɔ nɔ. Wa Mawu ɔ, kɛ wa kpɔlɔ Yesu Kristo, nɔ nɛ peeɔ nɔ́ nɛ da a, lɛ ha mɛ kikɛmɛ a hemi kɛ yemi ɔ nɛ.

² Dloomi kɛ he jɔmi nɛ hiɛ babauu ha nyɛ, konɛ nyɛɛ le Mawu, kɛ wa Nyɔmtsɛ Yesu Kristo saminya.

Mawu tsɛ wɔ, nɛ e hla wɔ

³ Mawu ha wɔ níhi tsuo nɛ maa hia wɔ ɔ, konɛ waa ba wa jemi kaa Mawu jali nitsɛnitsɛmɛ. E pee nɔ́ nɛ ɔ, ejakaa wa le lɛ Mawu ɔ nɛ tsɛ wɔ kɛ gu lɛ nitsɛ e nyami, kɛ e mi mi himi ɔ mi ɔ.

⁴ E ha wɔ nike ní nguanguahi nɛ a he jua wa, kaa bɔ nɛ e wo si ɔ. Kɛ gu nike ní nɛ ɔmɛ a nɔ ɔ, nyɛ maa tu je nɛ ɔ mi akɔnɔ níhi nɛ kpataa nɔ hɛ mi ɔ a nya fo, konɛ nyɛ na lɛ Mawu ɔ e su ɔ eko.

⁵ Enɛ ɔ tutuutu he je ɔ, nyɛɛ bɔ mɔde wawɛɛ nɛ nyɛɛ ngɔ kpakpa peemi ngɔ piɛ nyɛ hemi kɛ yemi ɔ he; nyɛɛ ngɔ nile ngɔ piɛ kpakpa peemi ɔ he.

⁶ Nyɛɛ ngɔ he nɔ yemi ngɔ piɛ nile ɔ he; nyɛɛ ngɔ hɛ si kami ngɔ piɛ he nɔ yemi ɔ he; nyɛɛ ngɔ Mawu gbeye yemi ngɔ piɛ hɛ si kami ɔ he;

⁷ nyɛɛ ngɔ nyɛmi peemi ngɔ piɛ Mawu gbeye yemi ɔ he, nɛ nyɛɛ ngɔ suɔmi ngɔ piɛ nyɛmi peemi ɔ he.

⁸ Kikɛmɛ a su nɛ ɔmɛ a he hia nyɛ, nɛ ke nyɛ na mɛ bɔ nɛ sa a, nyɛ ma tsu ní nɛ maa wo yiblii saminya, nɛ nyɛ he maa ba se nami, akɛnɛ nyɛ le wa Nyɔmtsɛ Yesu Kristo ɔ.

⁹ Se nɔ nɛ be ní nɛ ɔmɛ ɔ, lɛɛ e ngɛ kaa nɔ nɛ hyɛ we nɔ́ kɛ yɛ tsitsaa; e hɛ je nɔ kaa a tsukɔ e he kɛ je e sá yayami ɔmɛ a he.

¹⁰ Lɔ ɔ he ɔ, nyɛmimɛ, nyɛɛ ya nɔ nɛ nyɛɛ bɔ mɔde, konɛ nyɛɛ ma nɔ mi kaa niinɛ, nihi nɛ Mawu tsɛ, nɛ e hla ji nyɛ. Ke nyɛ pee ja a, nyɛ be si gbee ngɛ hemi kɛ yemi ɔ nɛ nyɛ na a mi gblegbleegble.

¹¹ Kɛkɛ ɔ, Mawu ma ha nyɛ blɔ nɛ nyɛ maa sɛ wa Nyɔmtsɛ, kɛ wa kpɔlɔ Yesu Kristo matsɛ yemi ɔ mi.

¹² E ngɛ mi kaa nyɛ le kikɛmɛ a ní nɛ ɔmɛ momo, nɛ anɔkuale ɔ hu nyɛ pɛtɛ he lɛɛ, se kɛ̃ i to kaa ma ya nɔ ma hi nyɛ kaie ngɛ ní nɛ ɔmɛ a he.

¹³ Be abɔ nɛ i ngɛ je mi kɛ mwɔɔ ɔ, i susu kaa e sa kaa ma ya nɔ ma hɛli nyɛ si ngɛ ní nɛ ɔmɛ a he.

¹⁴ I le kaa e be kɛe kulaa nɛ ma gbo kaa bɔ nɛ wa Nyɔmtsɛ Yesu Kristo je tsɔɔ mi ɔ.

¹⁵ Se ma bɔ mɔde ma to blɔ nya ha nyɛ, konɛ ye gbenɔ se ɔ, nyɛ hɛ nɛ hi ní nɛ ɔmɛ a nɔ be tsuaa be.

Nihi nɛ na Kristo hɛ mi nyami ɔ

¹⁶ Nɛ wa fiɛ tsɔɔ nyɛ ke wa Nyɔmtsɛ Yesu Kristo maa ba ekohu kɛ he wami kpetekpleenyɛ ɔ, pi sanehi nɛ a po de nɔ nɛ wa da. Se wa na e he wami kpetekpleenyɛ ɔ kɛ wɔ nitsɛmɛ wa hɛngmɛ.

¹⁷ Wa ngɛ lejɛ ɔ benɛ Tsɛ Mawu wo e hɛ mi nyami ɔ. Jamɛ a be ɔ, gbi pɛ kɛ je hɛ mi nyami kpetekpleenyɛ ɔ ngɔ ke, “Nɔ nɛ ɔ ji ye Bi nɛ i suɔ, nɛ i naa e he tsui!”

¹⁸ Wɔ nitsɛmɛ wa nu gbi nɛ ɔ kɛ je hiɔwe, benɛ waa kɛ lɛ ngɛ yo klɔuklɔu ɔ nɔ ɔ.

¹⁹ Lɔ ɔ he ɔ, wa na kaa munyuhi nɛ gbali ɔmɛ tu ɔ ba mi niinɛ. Nyɛ hu ke nyɛ bɔ mɔde nɛ nyɛ bu tue ɔ, e maa hi ha nyɛ; ejakaa e ngɛ kaa la nɛ ngɛ tsoe ngɛ diblii mi kɛ yaa si je maa na, nɛ nɔkɔ la a ma kpɛ ngɛ nyɛ tsui mi.

²⁰ Se enɛ ɔ tsuo se ɔ, nyɛ na nɛ nyɛɛ le kaa nɔ ko nɔ ko be nyɛe maa ngɔ lɛ nitsɛ e juɛmi kɛ tsɔɔ gbami ko sisi ngɛ ngmami ɔ mi.

²¹ Ejakaa gbami sɛ gbi ko bɛ hyɛ nɛ adesa po de kɛkɛ ngɛ lɛ nitsɛ e suɔmi nya. Se mohu Mumi Klɔuklɔu ɔ lɛ baa nihi a nɔ nɛ a tuɔ munyu kɛ jeɔ Mawu ngɔ.