2 Korintobi 13 - BAIBLO ALOO NGMAMI KLƆUKLƆU Ɔ

Nyagbe kɔkɔ bɔmi kɛ sɛ yemi

¹ Enɛ ɔ ji si etɛne nɛ i ma nyɛ slaami. Ngmami ɔ ke, “Ni enyɔ, loo etɛ nɛ a ye odase loko a buá sane tsuaa sane he.”

² Nihi tsuo nɛ pee yayami sa a, i bɔ mɛ kɔkɔ momo benɛ i ba slaa nyɛ si enyɔne ɔ. Amlɔ nɛ ɔ, i be nyɛ ngɔ, se i ngɛ mɛ, kɛ ni kpa amɛ tsuo kɔkɔ bɔe ekohu. Jehanɛ lɛɛ ke i ba a, ma gbla a tue wawɛɛ.

³ Ma pee enɛ ɔ, ejakaa nyɛ ngɛ hlae nɛ nyɛɛ na okadi nɛ tsɔɔ kaa Kristo ngɛ munyu tue kɛ gu ye nɔ. Ke Kristo kɛ nyɛ ngɛ ní tsue ɔ, pi kaa e gbɔjɔ; mohu ɔ, e jeɔ e he wami kpetekpleenyɛ ɔ kpo ngɛ nyɛ kpɛti.

⁴ E ngɛ mi kaa benɛ a sɛu Kristo ɔ, e gbɔjɔ lɛɛ, se Mawu he wami ɔ nya a, e ba wami mi ekohu. Wɔ hu akɛnɛ waa kɛ Kristo pee kake ɔ, waa gbɔjɔɔ, se Mawu he wami nya a, wa ma nyɛ ma tsu nɔ́ nɛ sa nɛ waa kɛ nyɛ nɛ tsu ɔ.

⁵ Nyɛɛ ka nyɛ nitsɛmɛ nyɛ he nɛ nyɛɛ hyɛ kaa nyɛ heɔ Kristo yeɔ niinɛ lo. Nyɛɛ hyɛ nyɛ nitsɛmɛ nyɛ he nɛ hi. Anɛ nyɛ nitsɛmɛ nyɛ li kaa Yesu Kristo he wami ɔ ngɛ nyɛ mi lo? Ee, ke nyɛ sɛ́ ɔ, nyɛ be enɛ ɔ lee.

⁶ I heɔ yeɔ kaa nyɛ ma na maa le kaa wɔɔ lɛɛ a ka wɔ, nɛ wa je kpo kaa nihi nɛ sa niinɛ.

⁷ Wa ngɛ Mawu pɛɛ kpae ha nyɛ nɛ nyɛ ko pee nɔ́ ko nɛ sɛ́. Waa kɛ enɛ ɔ tsɔɔ we kaa wɔɔ lɛɛ wa hi; se mohu nɛ nyɛɛ pee nɔ́ nɛ sa; pohu e maa pee nihi kaa wɔɔ lɛɛ wa nyɛ we kulaa.

⁸ Ejakaa wa blɔ nya ji kaa waa hyɛ nɛ anɔkuale ɔ nɛ gbɛ fĩa; se pi kaa wa maa pee nɔ́ ko kɛ si anɔkuale ɔ.

⁹ Ke wa gbɔjɔ, nɛ nyɛɛ lɛɛ nyɛ ngɛ he wami ɔ, wa naa bua jɔmi. Enɛ ɔ he je nɛ wa ngɛ Mawu pɛɛ kpae ha nyɛ ɔ nɛ, konɛ nyɛɛ ya nɔ nɛ nyɛɛ hi kɛ pi si.

¹⁰ Enɛ ɔ he hu lɛ i ngɛ nyɛ womi nɛ ɔ ngmae benɛ i be nyɛ ngɔ ɔ nɛ. Kɛkɛ ɔ, ke i ba a, e be hiae kaa i kɛ nyɛ nɛ ye wawɛɛ. He wami nɛ Nyɔmtsɛ ɔ ha mi ɔ, pi nɛ ma kɛ kpata nyɛ hɛ mi, se mohu nɛ ma kɛ ye bua nyɛ.

¹¹ Nyagbe ɔ, ye nyɛmimɛ, i biɔ nyɛ! Nyɛɛ ba nyɛ je mi saminya; nyɛɛ bu ye ga womi ɔ tue; nyɛ juɛmi nɛ pee kake, nɛ nyɛɛ hi si ngɛ he jɔmi mi. Nɛ Mawu nɛ suɔ wɔ, nɛ haa wɔ tue mi jɔmi ɔ kɛ nyɛ maa hi si.

¹² Nyɛɛ fua nyɛ sibi atuu nɛ nyɛ kɛ nga nyɛ he. Ni klɔuklɔu ɔmɛ tsuo ke a biɔ nyɛ.

¹³ Wa Nyɔmtsɛ Yesu Kristo dloomi ɔ, kɛ Mawu suɔmi ɔ, kɛ Mumi Klɔuklɔu huɛ bɔmi ɔ kɛ nyɛ tsuo nɛ hi si.