2 Korintobi 10 - BAIBLO ALOO NGMAMI KLƆUKLƆU Ɔ

Paulo tsɔɔ kaa bɔfo ji lɛ niinɛ

¹ Imi Paulo nitsɛ, i ngɛ nyɛ pɛɛ kpae! Ni komɛ deɔ ke ke i ba nyɛ ngɔ ɔ, i peeɔ kpoo, se ke i be nyɛ kasa nya kɛkɛ i hia kã. I suɔ nɛ ma pee kpoo, nɛ ye mi mi nɛ jɔ kaa Kristo.

² I kpa nyɛ pɛɛ, ke i ba nyɛ ngɔ ɔ, nyɛ ko ha nɛ ma pee nɔ́ ko nɛ maa tsɔɔ kaa i ngɛ nyɛ nɔ yee tsɔ. Nihi nɛ ngɛ ye he munyu tue ke i ngɛ ní tsue kaa je mi no ɔ, i le kaa ma nyɛ nɛ i kɛ mɛ maa to ní saminya.

³ E ngɛ mi kaa wa ngɛ he lo mi mohu, se kɛ̃ ɔ, wa pee we he lo nya ní.

⁴ Ta hwumi níhi nɛ wa hɛɛ ɔ, pi he lo mi níhi; se mohu Mawu nitsɛ e ta hwumi ní kpakpahi nɛ a kɛ kuɔ mɔ nguahi. Wa tsiɔ yi mi susumi yayami nya,

⁵ nɛ wa teɔ si woɔ ní yayamihi nɛ he nɔ woli deɔ kɛ siɔ bɔ nɛ Mawu ngɛ anɔkuale mi ɔ. Wa tsakeɔ adesa juɛmi, konɛ e susumi nɛ pee kaa bɔ nɛ Kristo ngɛ hlae ɔ.

⁶ Nɛ ke nyɛ tsake pee anɔkuale tue buli ɔ, wɔɔ lɛɛ wa pee klaalo nɛ wa maa gbla ni nɛmɛ nɛ tsakee we ɔ a tue.

⁷ Nyɛ juɛmi mi kuɔ we kulaa! Anɛ nɔ ko ngɛ hiɛ ɔ nɛ heɔ e he yeɔ kaa Kristo nɔ́ ji lɛ lo? Saminya! Jamɛ a nɔ ɔ nɛ susu e yi mi ekohu; ejakaa wɔ hu Kristo níhi ji wɔ kaa lɛ nɔuu.

⁸ Nyɔmtsɛ Yesu Kristo ha wɔ he wami ngɛ nyɛ nɔ, pi nɛ wa kɛ kpata nyɛ hɛ mi, se mohu nɛ wa kɛ ye bua nyɛ. Nɛ e ngɛ mi kaa he blɔ nɛ wa hɛɛ nɛ ɔ ha nɛ i fĩa tsɔ mohu, se kɛ̃ enɛ ɔ pee we mi zo.

⁹ I hla we nɛ nihi nɛ susu kaa i ngɛ hlae nɛ ma wo nyɛ he gbeye kɛ womi ɔmɛ nɛ i ngɛ ngmae ɔ.

¹⁰ Nihi deɔ ke, “Paulo womi ɔmɛ a mi munyuhi jiɔ, nɛ a mi wa hulɔ; se ke o na lɛ nitsɛ lɛɛ pi nɔ ko kulaa ji lɛ; munyu nitsɛ tete e li tumi.”

¹¹ Jamɛatsɛmɛ ɔmɛ nɛ a ná nɛ a le kaa nɔ́ nɛ wa ngmaa ngɔ woɔ womi mi kɛ maneɔ nyɛ ɔ, lɔ ɔ nɔuu wa peeɔ ke wa ba nyɛ ngɔ ɔ nɛ; slɔɔto be mi.

¹² Nihi nɛ woɔ a he nɔ, nɛ a buu a he kaa mɛɛ a pe ni kpahi ɔ, wa be wa he ngɔe ngɔ ta a he; ee, wa be wa he ngɔe ngɔ to a he. Bɔ nɛ a kaleɔ a he, nɛ a ngɔɔ a he ngɔ toɔ a sibi a he ɔ, juɛmi be mi.

¹³ Wɔɔ lɛɛ wa maa fĩa kɛ ya ta he ko pɛ; ní tsumi nɛ Mawu ha wɔ nɛ wa ngɛ tsue kɛ ba su nyɛ ngɔ hiɛmɛ nɛ ɔ, lɔ ɔ he wa maa fĩa ngɛ.

¹⁴ He nɛ Mawu ha wɔ ke wa tsu ní kɛ ya si ɔ, nyɛ hu nyɛ piɛ he. Lɔ ɔ he ɔ, nɛ́ wa ngɔ sane kpakpa a nɛ kɔɔ Kristo he ɔ kɛ ba nyɛ ngɔ ngɛ Korinto ɔ, ní tsumi nɛ a ha wɔ ɔ, lɔ ɔ pɛ wa tsu ɔ nɛ; nɔ́ kpa ko piɛ we he.

¹⁵ Ní tsumi nɛ ni kpahi tsu ɔ, wa fĩɛ ngɛ he. Niinɛ, wa heɔ yeɔ kaa nyɛ hemi kɛ yemi ɔ mi ma ba wa, nɛ wa ma tsu ní nguahi ngɛ nyɛ kpɛti pe bɔ nɛ wa ko nyɛ.

¹⁶ Jamɛ a be ɔ, wa ma nyɛ maa fiɛ sane kpakpa a ngɛ ma kpahi a nɔ ngɛ Korinto se je lokoo. Kɛkɛ ɔ, he ko nɛ nɔ ko ya tsu ní ngɛ momo ɔ, wɔɔ wa be yae, konɛ wɔ mohu wa ko ba na yi jemi.

¹⁷ Lɔ ɔ he ɔ, kaa bɔ nɛ ngmami ɔ deɔ ɔ, “Nɔ nɛ suɔ kaa e maa fĩa a, e fĩa ngɔ fɔ nɔ́ nɛ Nyɔmtsɛ ɔ pee ɔ pɛ nɔ.”

¹⁸ Ejakaa nɔ nɛ jeɔ lɛ nitsɛ e yi ɔ, Nyɔmtsɛ ɔ hla we lɛ; nɔ nɛ Nyɔmtsɛ ɔ nitsɛ jeɔ e yi ɔ, lɛ nɛ Nyɔmtsɛ ɔ suɔ.