1 Yohane 5 - BAIBLO ALOO NGMAMI KLƆUKLƆU Ɔ

Wa ye je ɔ nɔ kunimi

¹ Nɔ tsuaa nɔ nɛ heɔ yeɔ kaa Yesu ji Kristo ɔ, Mawu bi ji lɛ; nɛ nɔ tsuaa nɔ nɛ suɔ nɔ ko tsɛ ɔ, e suɔ nɔ ɔ bi hulɔ.

² Nɔ́ nɛ waa kɛ maa na kaa wa suɔ Mawu bimɛ ɔmɛ ji wa maa bu Mawu tue, nɛ wa maa ye e mlaa amɛ a nɔ.

³ Ejakaa ke wa suɔ Mawu ɔ, wa yeɔ e mlaa amɛ a nɔ. Nɛ e mlaa amɛ a nɔ yemi wɛ kulaa,

⁴ ejakaa Mawu bimɛ tsuo ma nyɛ maa ye je ɔ nɔ kunimi; ee, wa hemi kɛ yemi waa kɛ yeɔ je ɔ nɔ kunimi.

⁵ Mɛnɔ ma nyɛ maa ye je ɔ nɔ kunimi? Ja nɔ nɛ heɔ yeɔ kaa Yesu ɔ, Mawu Bi ji lɛ.

Yesu Kristo he odase

⁶ Benɛ Yesu Kristo ba a, a sɔle lɛ kɛ nyu, nɛ e plɛ e muɔ ngɔ pue si, nɛ e gbo. Pi nyu ɔ kɛkɛ nɛ e kɛ ba, se nyu kɛ muɔ tsuo. Nɛ mumi ɔ nitsɛ yeɔ odase kaa nɔ́ nɛ ɔ ngɛ mi, ejakaa mumi ɔ, anɔkualetsɛ ji lɛ.

⁷ Odase yeli etɛ lɛ ngɛ;

⁸ mumi ɔ, kɛ nyu ɔ, kɛ muɔ ɔ; nɛ nɔ́ etɛ ɔmɛ tsuo yeɔ odase kake too ɔ.

⁹ Wa heɔ adesa we odase yeɔ, se Mawu we odase ɔ mi jiɔ kulaa pe adesa nɔ́. Nɛ Mawu ɔ nitsɛ lɛ ye odase nɛ ɔ ngɛ e Bi ɔ he.

¹⁰ Lɔ ɔ he ɔ, nɔ tsuaa nɔ nɛ heɔ Mawu Bi ɔ yeɔ ɔ ngɔɔ odase nɛ ɔ kɛ toɔ lɛ nitsɛ e tsui mi, nɛ e hii he susue. Se nɔ nɛ he we Mawu yi ɔ ha nɛ Mawu plɛ lakpatsɛ; ejakaa nɔ́ nɛ Mawu de ngɛ e Bi ɔ he ɔ, nɔ ɔ he we yi.

¹¹ Odase ɔ ji nɛ ɔ nɛ: Mawu ha wɔ neneene wami kɛ gu e Bi ɔ nɔ.

¹² Nɔ tsuaa nɔ nɛ ngɛ Bi ɔ, e ngɛ wami; nɔ nɛ be Mawu Bi ɔ, e be wami hulɔ.

Neneene wami

¹³ I ngɛ nyɛ womi nɛ ɔ ngmae, konɛ nyɛ nihi nɛ nyɛ heɔ Mawu Bi ɔ yeɔ ɔ, nyɛ ná nɛ nyɛɛ le kaa nyɛ ngɛ neneene wami.

¹⁴ Wa yi gbeye ngɛ Mawu hɛ mi, ejakaa wa le kaa ke waa kɛ juɛmi kpakpa bi lɛ nɔ́ ko ɔ, e buɔ wɔ tue.

¹⁵ Be tsuaa be nɛ wa bi lɛ nɔ́ ko ɔ, e buɔ wɔ tue. Nɛ akɛnɛ wa le kaa e ngɛ mi jã niinɛ he je ɔ, wa le hu kaa níhi nɛ wa biɔ lɛ ɔ, e haa wɔ.

¹⁶ Ke o na o nyɛmi nɛ ngɛ yayami pee, nɛ pi yayami nɔ́ nɛ ma ha nɛ e hɛ mi nɛ kpata a, moo fa kue ha Mawu, konɛ e ha lɛ wami. Nihi tsuo nɛ peeɔ yayami nɔ́ nɛ ha we nɛ nɔ hɛ mi kpataa a, enɛ ɔ kɔɔ a he. Se yayami ngɛ nɛ haa nɔ hɛ mi kpataa, nɛ lɔ ɔ lɛɛ i de we ke nyɛɛ fa kue ha Mawu ngɛ he.

¹⁷ Nɔ́ tsuaa nɔ́ nɛ dɛ blɔ ɔ, e ji yayami; se yayami ngɛ nɛ ha we nɛ nɔ hɛ mi kpataa.

¹⁸ Wa le kaa nɔ tsuaa nɔ nɛ ji Mawu bi ɔ, e bua jɔɛ yayami peemi he. Ejakaa Mawu Bi ɔ baa e yi, nɛ Abosiami na we e he blɔ.

¹⁹ Wa le kaa Mawu níhi ji wɔ, pohu je ɔ, Abosiami lɛ ngɛ nɔ yee.

²⁰ Wa le kaa Mawu Bi ɔ ba, nɛ e ba bli wa juɛmi nya, konɛ waa le anɔkuale Mawu ɔ. Amlɔ nɛ ɔ, waa kɛ anɔkuale Mawu ɔ ngɛ, ejakaa wa ngɛ e Bi Yesu Kristo ɔ mi. Lɛ ji anɔkuale Mawu ɔ nɛ, nɛ enɛ ɔ ji neneene wami.

²¹ Ye bimɛ nɛ i suɔ! Nyɛɛ hyɛ nyɛ he nɛ hi ngɛ amagahi a he!