1 Yohane 4 - BAIBLO ALOO NGMAMI KLƆUKLƆU Ɔ

Anɔkuale mumi kɛ lakpa mumi

¹ Ye nyɛmimɛ nɛ i suɔ, nyɛ ko he nɔ tsuaa nɔ ko kɛkɛ nɛ deɔ ke e ná Mawu mumi ɔ nyɛɛ ye. Se mohu nyɛɛ ka nɔ tsuaa nɔ nɛ nyɛɛ hyɛ kaa mumi nɛ e ngɛ ɔ je Mawu ngɔ lo. Ejakaa je ɔ hyi tɔ kɛ lakpa gbali sɔuu.

² Nɔ́ nɛ nyɛɛ kɛ ma yo Mawu mumi ɔ ji nɛ ɔ nɛ. Nɔ tsuaa nɔ nɛ maa jaje kaa Yesu Kristo ba je ɔ mi kaa adesa a, mumi nɛ je Mawu ngɔ ɔ ngɛ e mi.

³ Se nɔ nɛ jajeɔ kaa nɔ́ nɛ a de ngɛ Yesu he nɛ ɔ be mi ɔ, e mumi ɔ ji Mawu ngɔ. Mumi nɛ ngɛ e mi ɔ je Kristo he nyɛlɔ ɔ ngɔ. Nyɛ nu kaa e ma, pi jã? Ee, amlɔ nɛ ɔ, e ná ba je ɔ mi momo.

⁴ Bimɛ tsɔwi, nyɛɛ lɛɛ Mawu níhi ji nyɛ, nɛ nyɛ ye lakpa gbali ɔmɛ a nɔ kunimi. Ejakaa mumi nɛ ngɛ nyɛ mi ɔ, e he wa kulaa pe mumi nɛ ngɛ ni nɛmɛ nɛ a kɛ je ɔ ngɛ bɔe ɔ a mi.

⁵ Jamɛ a lakpa gbali ɔmɛ ɔ, munyu nɛ kɔɔ je nɛ ɔ mi níhi a he nɛ a tuɔ. Nɛ je ɔ buɔ mɛ tue, ejakaa je ɔ mi nɛ a je.

⁶ Se wɔɔ lɛɛ Mawu níhi ji wɔ. Nɔ tsuaa nɔ nɛ le Mawu ɔ, e buɔ wɔ tue; nihi nɛ kɛ Mawu be ɔ, mɛɛ a bui wɔ tue. Enɛ ɔ waa kɛ naa slɔɔto nɛ ngɛ anɔkuale mumi ɔ, kɛ lakpa mumi ɔ a kpɛti.

Mawu ɔ suɔmi ji lɛ

⁷ Ye nyɛmimɛ nɛ i suɔ! Nyɛ ha waa suɔ wa sibi, ejakaa suɔmi ɔ, Mawu ngɔ nɛ e je. Nɔ tsuaa nɔ nɛ suɔ nɔmlɔ ɔ, Mawu bi ji lɛ, nɛ e le Mawu.

⁸ Nɔ tsuaa nɔ nɛ sume nɔmlɔ ɔ, e li Mawu; ejakaa Mawu ɔ, suɔmi ji lɛ.

⁹ Blɔ nɔ nɛ Mawu gu kɛ je e suɔmi ɔ kpo kɛ tsɔɔ wɔ ji nɛ ɔ nɛ: e tsɔ e Bi kake too ɔ kɛ ba je ɔ mi, konɛ kɛ gu e Bi ɔ nɔ ɔ, wa na wami.

¹⁰ Bɔ nɛ suɔmi ngɛ ji nɛ ɔ nɛ: pi wɔ nɛ wa sɛ hlami kɛ suɔ Mawu; Mawu mohu lɛ suɔ wɔ. Enɛ ɔ he ɔ, e tsɔ e Bi ɔ kɛ ba, konɛ e ba dla waa kɛ Mawu wa kpɛti, nɛ a ngɔ wa he yayami ɔmɛ ngɔ pa wɔ.

¹¹ Ye nyɛmimɛ nɛ i suɔ, ke kikɛ nɛ ɔ Mawu suɔ wɔ ɔ, wɔ hu e sa kaa waa suɔ wa sibi.

¹² Mawu ɔ, nɔ ko nɛ lɛ hyɛ. Se ke wa suɔ wa sibi ɔ, Mawu hii wa mi, nɛ suɔmi nɛ e ngɛ kɛ ha wɔ ɔ mi waa.

¹³ Mawu ngɔ lɛ nitsɛ e mumi ɔ ngɔ ha wɔ. Nɛ enɛ ɔ waa kɛ na kaa niinɛ, Mawu ngɛ wa mi; nɛ wɔ hu wa ngɛ e mi.

¹⁴ Wa na enɛ ɔ, nɛ wa ngɛ odase yee kaa Tsɛ ɔ tsɔ e Bi ɔ kɛ ba kaa je ɔ yi wami helɔ.

¹⁵ Nɔ tsuaa nɔ nɛ jajeɔ paa kaa Yesu ɔ, Mawu Bi ji lɛ ɔ, Mawu hii e mi, nɛ lɛ hu e hii Mawu mi.

¹⁶ Suɔmi nɛ Mawu ngɛ kɛ ha wɔ ɔ, wɔ nitsɛmɛ wa le, nɛ wa ji he nɔ́. Mawu ɔ, suɔmi ji lɛ, nɛ nɔ tsuaa nɔ nɛ suɔ nɔmlɔ kɛ e tsui tsuo ɔ, e hii Mawu mi, nɛ Mawu hu hii e mi.

¹⁷ Suɔmi nɛ Mawu ngɛ kɛ ha wɔ ɔ mi wa wawɛɛ, bɔ nɛ pee nɛ kojomi ligbi ɔ, wa ko ye gbeye. Ejakaa wa je mi bami ngɛ kaa bɔ nɛ Kristo nitsɛ ba e je mi.

¹⁸ He nɛ suɔmi ngɛ ɔ, gbeye yemi be lejɛ ɔ; suɔmi nɛ mi wa a fieɔ gbeye tsuo kɛ yaa se. Lɔ ɔ he ɔ, nɔ tsuaa nɔ nɛ yeɔ gbeye ɔ, Mawu suɔmi nɛ mi wa a be e mi. Ejakaa gbeye yemi, kɛ tue gblami lɛ nyɛɛɔ.

¹⁹ Wa suɔ Mawu, ejakaa lɛ nɛ suɔ wɔ kekle.

²⁰ Ke nɔ ko ke e suɔ Mawu, se e nyɛɛ e nyɛmi ɔ, lakpatsɛ ji lɛ. Ejakaa nɔ nɛ sume e nyɛmi nɛ e naa kɛ hɛngmɛ ɔ, kɛ e maa pee kɛɛ nɛ e maa suɔ Mawu nɛ e nɛ ɔ.

²¹ Mlaa nɛ Kristo wo wɔ ji nɔ tsuaa nɔ nɛ suɔ Mawu ɔ, e sa kaa e suɔ e nyɛmi hulɔ.