1 Yohane 2 - BAIBLO ALOO NGMAMI KLƆUKLƆU Ɔ

Wa he piɛlɔ Kristo

¹ Ye bimɛ tsɔwi, i ngɛ nyɛ womi nɛ ɔ ngmae, konɛ nyɛ ko pee yayami. Se ke nɔ ko pee yayami pohu ɔ, wa ngɛ nɔ nɛ daa mi kɛ haa wɔ ngɛ Tsɛ ɔ ngɔ. Lɛ ji Yesu Kristo, nɔ nɛ peeɔ nɔ́ nɛ da a.

² Nɛ Kristo ɔ ji nɔ nɛ a kɛ pee kpatami kɛ je wa he yayami ɔmɛ; pi wɔ kɛkɛ, se je ɔ tsuo he yayami.

³ Ke wa yeɔ Mawu mlaa amɛ a nɔ ɔ, lɔ ɔ waa kɛ naa anɔkuale mi kaa wa le lɛ.

⁴ Ke nɔ ko ke e le Mawu, se e yi e mlaa amɛ a nɔ ɔ, lakpatsɛ ji lɛ; e tu we anɔkuale.

⁵ Se nɔ tsuaa nɔ nɛ yeɔ Mawu mlaa a nɔ ɔ, lɛ ji nɔ nɛ suɔ Mawu anɔkuale mi. Enɛ ɔ waa kɛ maa le kaa niinɛ, waa kɛ Mawu ngɛ huɛ bɔe.

⁶ Nɔ nɛ deɔ ke e ngɛ Mawu mi ɔ, e ba e je mi kaa bɔ nɛ Yesu Kristo ba e je mi ɔ.

Mlaa he ɔ

⁷ Ye nyɛmimɛ nɛ i suɔ, mlaa nɛ i ngɛ ngmae nɛ nyɛɛ ye nɔ nɛ ɔ, pi mlaa he; mlaa momo ɔ nɛ nyɛ ná kɛ je sisije ɔ, lɔ ɔ nɔuu. Sɛ gbi nɛ nyɛ nu momo ɔ, lɔ ɔ ji mlaa momo ɔ nɛ.

⁸ Se kɛ̃ ɔ, mlaa nɛ i ngɛ ngmae nɛ nyɛɛ ye nɔ nɛ ɔ, mlaa he, ejakaa a naa e we anɔkuale ɔ nɛ ngɛ ní tsue ngɛ nyɛ mi kaa bɔ nɛ e tsu ní ngɛ Kristo mi ɔ. Diblii ɔ ngɛ bee kɛ yaa, nɛ la nitsɛ ɔ bɔni kpɛmi momo.

⁹ Ke nɔ ko de ke e ngɛ Kristo mi, se e sume e nyɛmi ɔ, lɛɛ e ngɛ diblii ɔ mi, kɛ mwɔɔ.

¹⁰ Nɔ tsuaa nɔ nɛ suɔ e nyɛmi ɔ, e ngɛ Kristo mi. Lɔ ɔ he ɔ, nɔ́ ko nɔ́ ko be e he nɛ ma ha nɔ ko nane ma kpata.

¹¹ Se nɔ nɛ nyɛɛ e nyɛmi ɔ, e ngɛ diblii ɔ mi, nɛ e ngɛ diblii ɔ mi nyɛɛe nɛ́ e li he nɛ e yaa. Ejakaa diblii ɔ yu e hɛ.

¹² Ye bimɛ tsɔwi, i ngɛ nyɛ womi nɛ ɔ ngmae, ejakaa Kristo he ɔ, a ngɔ nyɛ he yayami ɔmɛ ngɔ pa nyɛ.

¹³ Tsaatsɛmɛ! I ngɛ nyɛ womi nɛ ɔ ngmae, ejakaa nyɛ le nɔ nɛ ngɛ kɛ je sisije ɔ. Nihewi! I ngɛ nyɛ womi nɛ ɔ ngmae, ejakaa nyɛ ye nɔ yayami ɔ nɔ kunimi.

¹⁴ Bimɛ tsɔwi, i ngɛ nyɛ womi nɛ ɔ ngmae, ejakaa nyɛ le Tsɛ ɔ. Tsaatsɛmɛ! I ngɛ nyɛ womi nɛ ɔ ngmae, ejakaa nyɛ le nɔ nɛ ngɛ kɛ je sisije ɔ. Nihewi! I ngɛ nyɛ womi nɛ ɔ ngmae, ejakaa nyɛ he wa; Mawu we anɔkuale ɔ ngɛ nyɛ mi, nɛ nyɛ ye nɔ yayami ɔ nɔ kunimi.

¹⁵ Nyɛ ko suɔ je ɔ, loo níhi nɛ ngɛ je ɔ mi ɔ. Ke nɔ ko suɔ je ɔ, lɛɛ e sume Tsɛ ɔ.

¹⁶ Nɔ́ tsuaa nɔ́ nɛ ngɛ je nɛ ɔ mi ɔ, je ɔ mi e je. Níhi nɛ he lo ɔ dii se, níhi nɛ hɛngmɛ dii se, kɛ níhi nɛ nihi fĩaa kɛ fɔɔ nɔ ɔ, lɛ tsuo je je nɛ ɔ mi; ekoeko ji Tsɛ ɔ ngɔ.

¹⁷ Je ɔ, kɛ e mi níhi nɛ peeɔ nɔ akɔnɔ ɔ ngɛ bee kɛ yaa. Se nɔ nɛ peeɔ Mawu suɔmi nya ní ɔ, lɛɛ e ngɛ kɛ yaa neneene.

Kristo he nyɛlɔ ɔ

¹⁸ Ye bimɛ tsɔwi, nyagbe be ɔ su ta! A de nyɛ ke Kristo he nyɛlɔ ɔ ma; se amlɔ nɛ ɔ, Kristo he nyɛli fuu ba momo. Enɛ ɔ he ɔ, wa le kaa nyagbe ɔ su ta.

¹⁹ Anɔkuale mi ɔ, pi wa kpɛti nɛ nimli nɛ ɔmɛ je; nɛ lɔ ɔ he je nɛ a si wɔ ɔ nɛ. Kaa wa kpɛti nɛ a je jinɛ a kɛ wɔ ko hi si. Se a si wɔ, bɔ nɛ pee nɛ e fɔ si paa kaa a ti nɔ ko nɔ ko kɛ wɔ bɔɛ.

²⁰ Se nyɛɛ lɛɛ, Kristo ha nyɛ Mumi Klɔuklɔu ɔ, nɛ lɔ ɔ he ɔ, nyɛ tsuo nyɛ le anɔkuale ɔ.

²¹ Pi kaa anɔkuale ɔ nɛ nyɛ li nɛ i ngɛ nyɛ womi nɛ ɔ ngmae. Dɛbi! Akɛnɛ nyɛ le anɔkuale ɔ, lɔ ɔ he mohu nɛ i ngɛ nyɛ womi ɔ ngmae ɔ nɛ; nɛ nyɛ le hu kaa anɔkuale ɔ, lakpa be mi.

²² Lɛɛ mɛnɔ ji lakpatsɛ? Ee, nɔ tsuaa nɔ nɛ deɔ ke pi Yesu ji Kristo ɔ, lɛ ji lakpatsɛ ɔ nɛ. Kikɛmɛ a nɔmlɔ nɛ ɔ ji Kristo he nyɛlɔ ɔ nɛ; e kua Tsɛ ɔ, kɛ Bi ɔ tsuo.

²³ Ejakaa nɔ tsuaa nɔ nɛ ma kua Bi ɔ, e kua Tsɛ ɔ hulɔ. Se nɔ nɛ ma he Bi ɔ, e he Tsɛ ɔ hulɔ.

²⁴ Lɔ ɔ he ɔ, sɛ gbi ɔ nɛ nyɛ na kɛ je sisije ɔ, nyɛɛ pɛtɛ he wawɛɛ. Ke nyɛ pɛtɛ jamɛ a sɛ gbi ɔ he wawɛɛ ɔ, lɔ ɔ lɛɛ nyɛɛ maa hi Bi ɔ, kɛ Tsɛ ɔ mi daa.

²⁵ Nɛ nɔ́ nɛ Kristo nitsɛ wo wɔ he si ɔ ji neneene wami.

²⁶ I ngɛ nyɛ womi nɛ ɔ ngmae ngɛ nihi nɛ hlaa kaa a puɛ nyɛ tue ɔ a he.

²⁷ Se nyɛɛ lɛɛ Kristo ha e mumi ɔ ba nyɛ nɔ. Be abɔ nɛ e mumi ɔ ngɛ nyɛ nɔ ɔ, e hia we nɛ nɔ ko nɛ ba tsɔɔ nyɛ ní. Ejakaa mumi ɔ ngɛ nyɛ nɔ́ tsuaa nɔ́ tsɔɔe; nɛ anɔkuale ɔ mumi ɔ ngɛ nyɛ tsɔɔe ɔ nɛ, pi lakpa. Lɔ ɔ he ɔ, nyɛɛ bu nɔ́ nɛ mumi ɔ ngɛ tsɔɔe ɔ tue, konɛ nyɛɛ ya nɔ nɛ nyɛɛ hi Kristo mi.

²⁸ Ye bimɛ tsɔwi, nyɛɛ ya nɔ nɛ nyɛɛ hi Kristo mi, bɔ nɛ pee nɛ ke e je e he kpo ɔ, wa nɔ gbagba nɛ te. Kɛkɛ ɔ, ligbi ɔ nɛ e maa ba a, zo be wɔ gbee ngɛ e hɛ mi.

²⁹ Tse nyɛ le kaa Kristo ɔ, nɔ́ nɛ da e peeɔ. Lɛɛ e hia kaa nyɛɛ le kaa nɔ tsuaa nɔ nɛ peeɔ nɔ́ nɛ da a, Mawu bi ji lɛ.