1 Yohane 1 - BAIBLO ALOO NGMAMI KLƆUKLƆU Ɔ

Munyu nɛ haa nɔ wami

¹ Wa ngɛ nyɛ munyu nɛ haa nɔ wami ɔ ngmae. Munyu ɔ ngɛ kɛ je sisije. Wa nu, nɛ wa na kɛ wɔ nitsɛmɛ wa hɛngmɛ; ee, wa na lɛ, nɛ wa nine ta he.

² Benɛ wami ɔ jé e he kpo ɔ, wa na lɛ. Enɛ ɔ he ɔ, wa ngɛ odase yee, nɛ wa ngɛ jajee ke lɛ ji neneene wami ɔ nɛ. E kɛ Tsɛ ɔ lɛ ngɛ, nɛ e jé e he kpo ngɔ tsɔɔ wɔ.

³ Nɔ́ nɛ wa na, kɛ nɔ́ nɛ wa nu ɔ, lɔ ɔ wa ngɛ fiɛe kɛ ngɛ nyɛ hae. Wa ngɛ enɛ ɔ pee, konɛ nyɛ ba piɛ wa he, nɛ waa kɛ Tsɛ ɔ, kɛ e Bi Yesu Kristo ɔ nɛ bɔ huɛ.

⁴ Wa ngɛ nyɛ enɛ ɔ ngmae, konɛ wa bua nɛ jɔ kɛ pi si.

Mawu ji la

⁵ Jehanɛ, sɛ gbi nɛ wa nu kɛ je e Bi ɔ nya, nɛ wɔ hu wa ngɛ fiɛe ɔ ji kaa Mawu su ngɛ kaa la, nɛ diblii ko kulaa be e mi.

⁶ Lɔ ɔ he ɔ, ke wa de ke waa kɛ lɛ ngɛ huɛ bɔe, se kɛ̃ wa ngɛ diblii ɔ mi ɔ, wa ngɛ lakpa yee; munyu nɛ jeɔ wa nya, kɛ wa ní peemi tsuo anɔkuale be mi.

⁷ Se ke wa ba wa je mi saminya ngɛ Mawu hɛ mi kaa bɔ nɛ lɛ Mawu ɔ e su ngɛ ɔ, lɔ ɔ lɛɛ waa kɛ wa sibi ngɛ huɛ bɔe. Kɛkɛ ɔ, e Bi Yesu Kristo muɔ ɔ maa tsukɔ wa he, nɛ e ma je wa he yayami ɔmɛ tsuo.

⁸ Ke wa de ke yayami ko be wa he ɔ, wɔ nitsɛmɛ wa he wa ngɛ sisie; nɛ Mawu we anɔkuale ɔ be wa mi.

⁹ Se ke wa jaje wa he yayami ɔmɛ ha Mawu ɔ, e maa ye e siwo ɔ nɔ, nɛ e maa pee bɔ nɛ sa. E kɛ wa he yayami ɔmɛ maa pa wɔ; e maa tsu wa he, nɛ e ma je ní yayahi nɛ wa pee ɔ tsuo.

¹⁰ Ke wa ke wa pee we yayami ɔ, lɛɛ wa ngɛ tsɔɔe kaa Mawu mohu ji lakpatsɛ; nɛ Mawu we anɔkuale ɔ be wa mi.