1 Timoteo 6 - BAIBLO ALOO NGMAMI KLƆUKLƆU Ɔ

¹ Sɔmɔli tsuo nɛ ngɛ nyɔguɛ yemi mi ɔ, ha nɛ a bu a nyɔmtsɛmɛ ɔmɛ, nɛ a sɔmɔ mɛ saminya, konɛ nɔ ko nɔ ko kó ná he blɔ nɛ e tu munyu yaya kɛ si Mawu, loo Kristo jami ɔ.

² Nyɔguɛhi nɛ le Kristo, nɛ a nyɔmtsɛmɛ ɔmɛ hu le Kristo ɔ, a ko susu kaa akɛnɛ mɛ tsuo Kristo we bi ji mɛ he je ɔ, e hia we kaa a buɔ a nyɔmtsɛmɛ ɔmɛ tue. Mɛ mohu nɛ e sa kaa a bu a nyɔmtsɛmɛ ɔmɛ, nɛ a sɔmɔ mɛ saminya; ejakaa a nyɔmtsɛmɛ ɔmɛ nɛ naa a he se ɔ, mɛ hu wa nyɛmimɛ Kristo we bi ji mɛ. Tsɔɔ mɛ ní nɛ ɔmɛ, nɛ a tsu he ní bɔ nɛ sa.

Lakpa tsɔɔmi kɛ sika suɔmi

³ Ni komɛ ngɛ tsɔɔmi kpa komɛ tsɔɔe nɛ pi wa Nyɔmtsɛ Yesu Kristo sane kpakpa a nitsɛ, loo Mawu jami tsɔɔmi tutuutu.

⁴ Kikɛmɛ a nimli nɛ ɔmɛ ɔ, a he nɔ kɛkɛ nɛ a ngɛ woe; a li nɔ́ ko nɔ́ ko fɛɛ. A suɔ nɛ a wo pɛ, nɛ a sã nya babauu ngɛ níhi a he. Enɛ ɔ haa nɛ a hɛ kɔɔ a sibi a nɔ; a nɔɔ kunɔ, nɛ a jɛɔ a he basabasa; yayami sɔuu a susuu ngɛ a sibi a he;

⁵ nɛ a sãã nya be tsuaa be. A juɛmi be tutuutu, nɛ a li nɔ nɛ ji anɔkuale hu. E peeɔ mɛ kaa Mawu jami ji blɔ ko nɛ a guu nɔ kɛ naa ní kpɔtɔɔ.

⁶ Se niinɛ, ní nami agbo ji Mawu jami, ke nɔ ko bua jɔ e níhi a he ɔ.

⁷ Ejakaa waa kɛ nɔ́ ko bɛ je nɛ ɔ mi; nɛ e fɔɔ si paa kaa wa be nyɛe waa kɛ nɔ́ ko maa ya hulɔ.

⁸ Lɔ ɔ he ɔ, ke wa ngɛ nya mi ngma, kɛ heha ní kɛkɛ ɔ, e hiɛ ha wɔ hluu.

⁹ Nihi nɛ hlaa kaa a na ní ɔ, a sɛɛ ka mi. A ya dii kuasia níhi, kɛ akɔnɔ yayami se. Enɛ ɔ haa nɛ a hemi kɛ yemi taa, nɛ a hɛ mi kpataa.

¹⁰ Ejakaa sika suɔmi ji yayamihi tsuo a sipoku. Ni komɛ kɛ hɛdɔ ya di sika se, nɛ a ngmɛɛ a hemi kɛ yemi ɔ he. Nɔ́ nɛ je mi kɛ ba kɛkɛ ji tsui yemi babauu.

Paulo wo Timoteo ga

¹¹ Se moo lɛɛ Mawu nɔmlɔ ji mo; lɔ ɔ he ɔ, bɔɔ ní nɛ ɔmɛ a he mɔde: dami sane yemi, Mawu suɔmi nya ní peemi, hemi kɛ yemi, suɔmi, tsui si tomi, kɛ he si bami.

¹² Hwuu hemi kɛ yemi ɔ he ta kpakpa a, konɛ o nine nɛ su neneene wami ɔ nɔ. Enɛ ɔ he nɛ Mawu tsɛ mo nɛ o ba ye Kristo he odase wawɛɛ ngɛ nihi babauu a hɛ mi ɔ nɛ.

^13-14 I ngɛ mo fae ngɛ Mawu, kɛ Kristo Yesu hɛ mi kaa o ye mlaa nɛ ɔmɛ a nɔ veveeve kɛ yaa si ligbi ɔ nɛ wa Nyɔmtsɛ Yesu Kristo maa ba. Mawu lɛ haa nɔ tsuaa nɔ wami, nɛ Kristo Yesu ye Mawu he odase wawɛɛ ngɛ Pontio Pilato hɛ mi. Ke be ɔ su ɔ, Mawu ma ha Kristo Yesu maa ba.

¹⁵ Mawu pɛ ji je ɔ tsuo nɔ yelɔ nɛ pe kulaa. Lɛ ji matsɛmɛ a matsɛ, kɛ nyɔmtsɛmɛ tsuo a nyɔmtsɛ. E ma je Kristo kpo kɛ tsɔɔ ngɛ lɛ nitsɛ e be nɛ e to nɛ sa a mi.

¹⁶ Lɛ nɔ kake pɛ ji nɔ nɛ ngɛ daa nɛ e be gboe gblegbleegble; nɛ la nɛ nɔ ko nɔ ko be nyɛe maa hɛ lɛ kɛ su he ɔ bɔle lɛ kɛ kpe. Nɔmlɔ adesa ko adesa ko nɛ́ lɛ hyɛ, nɛ adesa ko be nyɛe maa na lɛ hulɔ. A je e yi daa; e maa ye tsɛ kɛ maa ya neneene! Amen.

¹⁷ Niatsɛmɛ nɛ ngɛ nyɛ kpɛti ɔ, nyɛɛ a nɔ nɛ a ko wo a he nɔ. Á ko ngɔ a hɛ ngɔ fɔ ní nɛ a na a nɔ, ejakaa ní nami se maa po. Á ngɔ a hɛ ngɔ fɔ Mawu mohu nɔ. Lɛ nɛ e haa wɔ ní kpakpahi babauu nɛ wa yeɔ faa.

¹⁸ A ko pee kpɛle, se a bɔle nine ha nɔ tsuaa nɔ.

¹⁹ Ke a pee ja a, a maa to juetli kpakpa si ha a he kɛ ha hwɔɔ se; nɛ a nine maa su wami nɛ ngɛ kɛ yaa neneene ɔ nɔ.

²⁰ Timoteo, níhi nɛ a tu ngɔ wo o dɛ mi ɔ, baa yi saminya. Yakayaka ní sɛɛmi nɛ tsɔɔ we Mawu gbeye yemi, kɛ nya sami tslalaa nɛ juɛmi be mi ɔ, yu o he ngɛ he. Kikɛmɛ a ní nɛ ɔmɛ lɛ ni komɛ buu ke nile.

²¹ Enɛ ɔmɛ nɛ ni komɛ susu kaa a nine su nɔ ɔ ha nɛ a hemi kɛ yemi ɔ bɔ mɛ. Mawu dloomi ɔ kɛ nyɛ tsuo nɛ hi si!