1 Timoteo 5 - BAIBLO ALOO NGMAMI KLƆUKLƆU Ɔ

Bɔ nɛ sa nɛ Timoteo kɛ nyɛmimɛ ɔmɛ nɛ a hi si

¹ Ko ka nyumu nɔkɔtɔma hɛ mi; se mohu tu munyu kɛ tsɔɔ lɛ kaa bɔ nɛ o kɛ o tsɛ maa tu munyu. Nihewi hu o kɛ mɛ nɛ hi si kaa bɔ nɛ o kɛ mo nitsɛ o nyɛminyumuhi maa hi si.

² Yi nikɔtɔma amɛ ɔ, o kɛ mɛ nɛ hi si kaa mo nitsɛ o nyɛmɛ, nɛ o kɛ yihewi ɔmɛ nɛ hi si kaa o nyɛmiyihi; se hyɛ nɛ yakayaka fiɛmi kó ba je mi.

³ Yalɔyihi nɛ be nɔ ko ɔ, moo bu mɛ bɔ nɛ sa.

⁴ Se ke yalɔyo ko ngɛ bimɛ, loo bibimɛ ɔ, bimɛ ɔmɛ, kɛ bibimɛ ɔmɛ nɛ a le kaa ngɛ Mawu jami blɔ nya tomi nya a, kekleekle nɔ́ nɛ sa nɛ a peeɔ ha a fɔli ji a hyɛ a nɔ. A pee enɛ ɔ kɛ to fɔli ɔmɛ nane mi, ejakaa enɛ ɔ saa Mawu hɛ mi.

⁵ Yalɔyo nɛ lɛ nɔ kake too e ngɛ, nɛ e be nɔ ko nɛ maa hyɛ e nɔ ɔ, ngɔɔ e hɛ ngɔ fɔɔ Mawu nɔ. E sɔlee nyɔ kɛ pia kɛ kpaa Mawu pɛɛ nɛ e ye bua lɛ.

⁶ Se yalɔyo nɛ fiɛɔ e yi nɔ ɔ, e hɛ ngɛ lɛɛ, se e gbo momo.

⁷ Tsɔɔ yalɔyi ɔmɛ ní nɛ ɔmɛ, konɛ nɔ ko nɔ ko kó tu a he munyu yaya.

⁸ Kristo se nyɛɛlɔ nɛ hyɛ we e nyɛmimɛ a nɔ, titli ɔ, lɛ nitsɛ e we mi bimɛ ɔ, blɔɔ e ngmɛɛ e hemi kɛ yemi ɔ he. Afani nɔ nɛ he we Kristo yi ngɛ kikɛmɛ a nɔmlɔ nɛ ɔ he.

⁹ A ko ngma yalɔyo ko biɛ, lɛɛ ja nɔ nɛ ye jeha nyingmi ekpa, nɛ e gba si kake pɛ.

¹⁰ É pee yo nɛ he biɛ kaa e peeɔ kpakpa, yo nɛ nyɛ tsɔse bimɛ saminya, yo nɛ nyɛ hyɛ nibwɔhi nɛ ba to lɛ, yo nɛ sɔmɔ ni klɔuklɔu ɔmɛ kɛ he si bami, yo nɛ je nihi kɛ je haomi mi, nɛ ngɔ e be tsuo kɛ tsu ní kpakpahi.

¹¹ Se yalɔyi nɛ wɛ ɔ, koo ngma a biɛ, ejakaa ke gba ngɛ mɛ jloe ɔ, a maa ngmɛɛ Kristo he ma ya gba.

¹² Kɛkɛ ɔ, a yeɔ fɔ kaa si nɛ a wo Kristo ke a be gbae kulaa hu ɔ, a yi nɔ.

¹³ Enɛ ɔ se hu a puɛɔ be kɛ hii nihi a we mi kpae. Nɔ́ nɛ pe enɛ ɔ po ji kaa a yeɔ sieku; a jeɔ si, nɛ a ngɔɔ a nya kɛ woɔ nihi a munyu mi; nɛ nɔ́ nɛ sɛ́ kaa a deɔ hu, a maa hi dee putɛputɛɛ.

¹⁴ Lɔ ɔ he ɔ, ma suɔ mohu kaa yalɔyihi nɛ wɛ lolo ɔ, a gba nɛ a fɔ bimɛ; nɛ a hyɛ a we nɔ saminya, konɛ wa he nyɛli ko na he blɔ ko kulaa kɛ tu munyu yaya kɛ si wɔ.

¹⁵ I ngɛ enɛ ɔ dee, ejakaa yalɔyi komɛ kpale ya nyɛɛ Satan se momo.

¹⁶ Se ke yo Kristo se nyɛɛlɔ ko ngɛ yalɔyihi nɛ peeɔ e weku li ɔ, e hyɛ a nɔ, nɛ e ko ngɔ tlomi ngɔ fɔ asafo ɔ nɔ. Yalɔyihi nɛ be nɔ ko nɛ maa hyɛ a nɔ ɔ, asafo ɔ nɛ bɔ a he mɔde.

¹⁷ Asafo nikɔtɔmahi nɛ tsuɔ ní saminya, titli ni nɛmɛ nɛ fiɛɔ, nɛ a tsɔɔ ní hulɔ ɔ, a hyɛ nɛ a wo a hɛ mi nyami totoe enyɔ.

¹⁸ Ejakaa ngmami ɔ deɔ ke, “Na nɛ ngɛ blɛfo gblɛe ha mo ɔ, koo fi e nya.” Ngmami kpa hu deɔ ke, “Ní tsulɔ ɔ, e hiɔwo sa lɛ.”

¹⁹ Ke nɔ ko ba po asafo nɔkɔtɔma ko nya ha mo ɔ, koo nu, ja nihi enyɔ, loo etɛ ba ye odase kɛ si lɛ.

²⁰ Nihi nɛ peeɔ yayami ɔ, ka a hɛ mi ngɛ asafo ɔ tsuo hɛ mi, kɛkɛ ɔ, ni nɛmɛ nɛ piɛ ɔ maa ye gbeye.

²¹ Ngɛ Mawu, kɛ Kristo Yesu, kɛ bɔfo klɔuklɔu ɔmɛ tsuo a hɛ mi ɔ, i ngɛ mo kita kae nɛ o ye mlaa nɛ ɔmɛ a nɔ pɛpɛɛpɛ. Ke o ngɛ nɔ́ ko pee ɔ, koo hyɛ nɔ hɛ mi. Jehanɛ hu, ko ha nɛ nɔ ko ní peepee nɛ sa o hɛ mi pe nɔ kpa nɔ́.

²² Koo ye esɔ kaa o maa ngɔ o nine kɛ pue nɔ ko nɔ kɛ wo lɛ asafo nɔkɔtɔma nɛ e tsu ní ha Nyɔmtsɛ ɔ. Ke nɔ ko ngɛ yayami pee ɔ, ko ya piɛ e he. Pee o he klɔuklɔu.

²³ Akɛnɛ o muklii mi haoɔ mo, nɛ o pɔɔ hiɔ numi kpitikpiti he je ɔ, koo nu nyu sɔuu hu, se mohu nuu wai bɔɔ.

²⁴ Ni komɛ a yayami jeɔ kpo paa, nɛ a kɛ buu mɛ fɔ nɔuu, se ni komɛ lɛɛ pee se loko a nɔ́ jeɔ kpo.

²⁵ Jã kɛ̃ nɔ́ kpakpa hu jeɔ kpo paa nɛ a naa; nɛ níhi nɛ ji kpo paa hu, a nyɛ we nɛ a laa nɔ.