1 Timoteo 4 - BAIBLO ALOO NGMAMI KLƆUKLƆU Ɔ

Lakpa tsɔɔmihi

¹ Mawu mumi ɔ deɔ paa ke, nyagbe ligbi ɔmɛ a mi ɔ, ni komɛ ma kua Kristo, nɔ nɛ a he ye ɔ, nɛ a ma ya nyɛɛ mumi yayamihi mohu a se; a maa bu lakpa munyuhi, kɛ tsɔɔmi yayamihi tue.

² A maa pee a he lakpatsɛmɛ, kɛ nɔ sisili nɛ a he nile gbo pɛsɛpɛsɛ.

³ Kikɛmɛ a nɔ sisili nɛ ɔmɛ deɔ ke Kristo we bi be he blɔ kaa a sɛɛ gba si himi mi; kɛ jehanɛ hu, niye ní komɛ ngɛ nɛ e sɛ kaa a yeɔ. Se wɔ nɛ wa heɔ Kristo yeɔ saminya a, wa le anɔkuale ɔ kaa Mawu bɔ niye ní tsuo ha wɔ kaa waa ye faa, nɛ waa na lɛ si ngɛ he.

⁴ Nɔ́ tsuaa nɔ́ nɛ Mawu bɔ ɔ hi. Wa ko kua ekoeko; mohu ɔ, wa sɔ́le nɔ́ tsuaa nɔ́, nɛ waa na Mawu si ngɛ he.

⁵ Ejakaa Mawu munyu ɔ, kɛ si nɛ wa naa Mawu ɔ haa niye ní ɔ he tsɔɔ.

Kristo Yesu tsɔlɔ kpakpa

⁶ Mawu munyu ɔ kasemi, kɛ Kristo hemi kɛ yemi nɛ mo nitsɛ o hɛɛ mi kpɛii ɔ ma ha mo mumi mi he wami. Ke o tsɔɔ nyɛmimɛ ɔmɛ ní nɛ ɔmɛ nɛ mɛ hu a le ɔ, lɛɛ Kristo Yesu tsɔlɔ kpakpa ji mo.

⁷ Se yimowi a yakayaka nyaziahi nɛ se nami be he ɔ, koo di se. Bɔɔ Mawu jami he mɔde mohu.

⁸ Nɔmlɔ tso ɔ he mi kami ɔ, se nami bɔɔ kɛkɛ lɛ ngɛ he, se mumi mi nɔ́ ɔ lɛɛ kaa bɔ nɛ a wo si ɔ, e he ngɛ se nami babauu ngɛ je nɛ ɔ mi, kɛ nɔ́ nɛ maa ba a mi tete.

⁹ Anɔkuale munyu nɛ sa kaa a pɛtɛ he kulaa, nɛ a he ye ji nɛ ɔ nɛ.

¹⁰ Wa gboɔ dengme kɛ tsuɔ ní wawɛɛ, ejakaa wa ngɔ wa hɛ ngɔ fɔ Mawu hɛ kalɔ ɔ nɔ. Lɛ ji nihi tsuo a yi wami helɔ, titli ɔ, ni nɛmɛ nɛ heɔ yeɔ ɔ.

¹¹ Tsɔɔ nyɛmimɛ ɔmɛ blɔ nya tomi nɛ ɔmɛ, nɛ o wo mɛ a he kita.

¹² Ko ha nɛ nɔ ko nɛ gbe o he guɛ kaa niheyo kɛkɛ ji mo. Se mohu bɔɔ mɔde nɛ o munyu tumi, o je mi bami, suɔmi nɛ o ngɛ, o hemi kɛ yemi, kɛ bɔ nɛ o he tsɔ ɔ nɛ pee nɔ hyɛmi nɔ́ ha ni nɛmɛ nɛ heɔ yeɔ ɔ.

¹³ Yaa nɔ nɛ o hi ngmami ɔ kanee ha asafo ɔ; hii munyu ɔ fiɛe, nɛ o hi mɛ ní nɛ ɔmɛ tsɔɔe kɛ yaa si be nɛ ma ba.

¹⁴ Mumi mi níhi nɛ Mawu kɛ dloo mo kɛ gu gbali ɔmɛ a nɔ benɛ asafo nikɔtɔma amɛ ngɔ a nine kɛ pue o yi mi ɔ, yaa nɔ nɛ o tsu a he ní daa.

¹⁵ Ngɔɔ o he wami tsuo kɛ tsu ní nɛ ɔmɛ be tsuaa be, konɛ nihi tsuo nɛ a na o mɔde bɔmi.

¹⁶ Timoteo, hyɛ mo nitsɛ o he nɔ saminya; nɔ́ nɛ o ngɛ tsɔɔe ɔ hu hyɛ nɔ bɔ nɛ sa. Ejakaa ke o pee ja a, o ma he mo nitsɛ o yi wami, kɛ nihi nɛ buɔ mo tue ɔ hulɔ.