1 Timoteo 3 - BAIBLO ALOO NGMAMI KLƆUKLƆU Ɔ

Subai nɛ sa Mawu we asafo nɔ hyɛli

¹ Anɔkuale sane ji kaa ke nɔ ko suɔ kaa e maa hyɛ Mawu asafo nɔ ɔ, e na ní tsumi kpakpa.

² Asafo nya dalɔ ɔ, sé kó hi e he. É hi yo kake; é le e he nɔ hyɛmi; e hɛ mi nɛ ka si, nɛ bu nɛ hi e he. É le nubwɔ peemi, nɛ e nyɛ nɛ e tsɔɔ ní hulɔ.

³ E ko pee e he dã delɔ; nɛ e ko pee nɔ nɛ hɛ mi jɔɛ, loo nɔ nɛ suɔ pɛ. E ko pee e he sika suɔlɔ.

⁴ E pee nɔ ko nɛ le lɛ nitsɛ e we nɔ hyɛmi saminya, nɔ nɛ maa hyɛ nɛ e bimɛ maa ba a he si, nɛ a bu nɔ bɔ nɛ sa.

⁵ Ejakaa ke nɔ ko nyɛ we nɛ e hyɛ lɛ nitsɛ e we nɔ ɔ, kɛ e maa pee kɛɛ nɛ e ma nyɛ hyɛ Mawu asafo ɔ nɔ.

⁶ E ko pee nɔ ko nɛ tsake e tsui kɛ we. Ke pi ja a, e ma wo e he nɔ, nɛ Mawu maa gbla e tue kaa bɔ nɛ e pee Abosiami ɔ.

⁷ Asafo nɔ hyɛlɔ ɔ, é ba e je mi saminya, konɛ ni nɛmɛ nɛ ja we Mawu tete po nɛ a hɛɛ e biɛ kpakpa mi. Ke pi ja a, e ma pue e hɛ mi si, kɛkɛ e sɛ Abosiami klama mi.

Asafo ɔ mi sɔmɔli kpahi

⁸ Asafo ɔ mi sɔmɔli nɛ yeɔ bua a, e hia kaa a pee nihi nɛ tsuɔ ní kɛ hɛdɔ, pi nihi nɛ a nya ngɛ enyɔɔnyɔ. A ko nu wai tsɔ, nɛ a hɛ ko tsu ngɛ sika he hulɔ.

⁹ Anɔkuale nɛ kɔɔ hemi kɛ yemi nɛ Mawu je tsɔɔ ɔ he ɔ, á hɛɛ mi bɔ nɛ a he nile be mɛ fɔ bue.

¹⁰ A ka mɛ hu nɛ a hyɛ a subai kekle, nɛ ke sane ko be a he ɔ, a sɔmɔ.

¹¹ Sɔmɔli yi ɔmɛ hu ja nɔuu a pee nihi nɛ tsuɔ ní kɛ hɛdɔ, nɛ a ko ye sieku. A pee nihi nɛ a hɛ ka si, nɛ a yeɔ anɔkuale ngɛ nɔ́ tsuaa nɔ́ mi.

¹² Asafo mi sɔmɔlɔ ɔ, é hi yo kake pɛ, nɛ e nyɛ nɛ e hyɛ e we, kɛ e bimɛ a nɔ saminya.

¹³ Sɔmɔli nɛ ɔmɛ a ti ni nɛmɛ nɛ tsuɔ ní saminya a, a naa biɛ kpakpa. Nɛ hemi kɛ yemi nɛ a ngɛ ngɛ Kristo Yesu mi ɔ, a tuɔ he munyu kɛ kã.

Laami sane nguaa

¹⁴ I ngɛ mo ní nɛ ɔmɛ ngmae, se e be kɛe nɛ ma ba o ngɔ.

¹⁵ Se ke ye se ya kɛ ɔ, womi nɛ ɔ maa tsɔɔ mo bɔ nɛ sa nɛ wɔ Kristo we bi waa ba wa je mi ha. Mawu weku ɔ mi bi ji wɔ, nɛ wɔ ji Mawu hɛ kalɔ ɔ we asafo. Anɔkuale ɔ nɛ kɔɔ Mawu he ɔ, asafo ɔ nɔ nɛ a fia ngɔ fɔ, nɛ asafo ɔ nɛ faa he.

¹⁶ Anɔkuale ɔ nɛ kɔɔ wa jami ɔ he ɔ ji laami sane nguaa; nɔ ko nɔ ko be nyɛe maa je he nɔ́. Kristo ba je nɛ ɔ mi kaa nɔmlɔ adesa; E ye nguɔ ngɛ mumi mi; E je e he kpo ngɔ tsɔɔ Mawu bɔfohi. A fiɛ lɛ ngɛ je ma amɛ a kpɛti; A he lɛ ye ngɛ je ɔ mi tsuo. A ngɔ lɛ kɛ ho hiɔwe ya ngɛ nyami mi.