1 Timoteo 2 - BAIBLO ALOO NGMAMI KLƆUKLƆU Ɔ

Mawu jami he blɔ nya tomi

¹ Kekleekle nɔ́ nɛ i ngɛ hlae nɛ nyɛɛ pee ji kaa daa ligbi ɔ, nyɛ kpa Mawu pɛɛ, nɛ nyɛɛ sɔle, nɛ nyɛɛ da mi ha nihi, konɛ nyɛɛ na lɛ si ha nihi tsuo.

² Nyɛɛ sɔle ha matsɛmɛ, kɛ nihi tsuo nɛ hɛɛ blɔ nya, konɛ wɔ nɛ wa ji Kristo we bi ɔ, waa pee wa he kpoo, nɛ waa hi si ngɛ tue mi jɔmi mi. Waa ye Mawu gbeye saminya, nɛ waa ba wa je mi bɔ nɛ sa.

³ Sɔlemi kaa kikɛ nɛ ɔ hi, nɛ e saa Mawu, wa kpɔlɔ ɔ hɛ mi.

⁴ Ejakaa Mawu suɔ kaa nimli tsuo nɛ le anɔkuale ɔ, konɛ a he a yi wami.

⁵ Mawu kake kɛkɛ lɛ ngɛ, kɛ nɔ kake nɛ dlaa Mawu kɛ adesa a kpɛti. Jamɛ a nɔ ɔ ji Kristo Yesu.

⁶ Kristo ngɔ e he kɛ sã bɔ ngɛ be nɛ sa mi, konɛ nimli tsuo nɛ a ye a he kɛ je yayami mi.

⁷ Enɛ ɔ he hu nɛ Mawu tsɔ mi kaa bɔfo, konɛ ma fiɛ sane kpakpa a ha ma je li ɔmɛ, nɛ ma tsɔɔ mɛ bɔ nɛ a he Kristo nɛ a ye anɔkuale mi. Nɔ́ nɛ i ngɛ dee nɛ ɔ, anɔkuale sisiisi; i yi lakpa.

⁸ He tsuaa he nɛ asafo ɔ ma bua a he nya ngɛ kɛ ja Mawu ɔ, nyumuhi nɛ a sɔle. E hia kaa a pee Kristo se nyɛɛli nɛ ngɔ a he kɛ ha Mawu kulaa. Ke a ngɛ sɔlee ɔ, a wo a nine nɔ, nɛ mi mi la kó hi mi; nɛ a ko hla kaa a maa sã nya ngɛ nɔ́ ko he.

⁹ Jã kɛ̃ i suɔ kaa yihi hu nɛ a ngɔ juɛmi kɛ to a he dlami he. A dla a he bɔ nɛ sa kɛkɛ kaa humi. A gbɔ a yi ngɛ hɛngmɛ nɔ. A ko ngɔ sika tsu, loo adiagba kɛ hɔɔ a yi mi; nɛ a ko wo tade nɛ he jua wa tsɔ hulɔ.

¹⁰ Se mohu a tsu ní tsumi kpakpa nɛ sa yihi nɛ ngɔ a he kɛ ha Mawu kulaa a.

¹¹ E sa kaa yo nɛ ba e he si, nɛ e pee kpoo kɛ kase ní.

¹² I ngmɛ́ blɔ kaa yo nɛ tsɔɔ ní, loo e ye nyumu nɔ; e pee dii.

¹³ Ejakaa Adam nɛ a bɔ kekle loko a bɔ Hawa.

¹⁴ Jehanɛ hu, pi Adam nɛ a sisi; yo ɔ mohu nɛ a sisi, nɛ e tɔ Mawu mlaa a.

¹⁵ Se ke yo ɔ kɛ hɛdɔ he Mawu ye, nɛ e suɔ nyɛmimɛ ɔmɛ, nɛ e pee e he klɔuklɔu kɛ humi ɔ, Mawu ma he e yi wami kɛ gu bimɛ nɛ e ma fɔ ɔ a nɔ.