1 Tesalonikabi 4 - BAIBLO ALOO NGMAMI KLƆUKLƆU Ɔ

Si himi nɛ saa Mawu hɛ mi

¹ Nyagbe ɔ, nyɛmimɛ, nyɛ kase kɛ je wa ngɔ bɔ nɛ nyɛ maa ba nyɛ je mi nɛ e sa Mawu hɛ mi; nɛ jã nyɛ ngɛ pee ɔ nɛ. Se kɛ̃, ngɛ Nyɔmtsɛ Yesu biɛ mi ɔ, wa ngɛ nyɛ pɛɛ kpae, nɛ wa ngɛ nyɛ ga woe kaa nyɛɛ pee kɛ ya nɔ pe jã po.

² Ejakaa mlaa nɛ wa wo nyɛ ngɛ Nyɔmtsɛ Yesu biɛ mi ɔ, nyɛ le.

³ Mawu suɔmi nya ji kaa nyɛ he nɛ tsɔ, nɛ nyɛ ko fiɛ nyumu kɛ yo yakayaka fiɛmi.

⁴ E sa kaa nyɛ ti nɔ tsuaa nɔ nɛ le bɔ nɛ e maa ye e he nɔ ha nɛ nyɛ he ma tsɔ, nɛ bu maa hi nyɛ he.

⁵ Nyɛ ko di akɔnɔ se kaa bɔ nɛ nihi nɛ li Mawu ɔ peeɔ ɔ.

⁶ Lɔ ɔ he ɔ, nɔ ko kó ya pee e nyɛmi yayami kaa e ma ya ngɔ e nyɛmi e yo. Wa de nyɛ enɛ ɔ momo, nɛ wa bɔ nyɛ kɔkɔ wawɛɛ kaa nihi nɛ peeɔ jã a, Nyɔmtsɛ ɔ maa gbla a tue.

⁷ Mawu tsɛ we wɔ nɛ wa ba tsu mu ní, se mohu bɔ nɛ pee nɛ wa he nɛ tsɔ.

⁸ Lɔ ɔ he ɔ, nɔ tsuaa nɔ nɛ bui tsɔɔmi nɛ ɔ, pi nɔmlɔ adesa nɛ e bui, se mohu Mawu, nɔ nɛ ha nyɛ e Mumi Klɔuklɔu ɔ.

⁹ Jehanɛ, suɔmi nɛ sa kaa e hi nyɛmimɛ nɛ heɔ yeɔ ɔ a kpɛti ɔ, e hia we kaa ma ngma nyɛ womi ngɛ lɔ ɔ he hu. Mawu tsɔɔ nyɛ momo kaa nyɛɛ suɔ nyɛ he,

¹⁰ nɛ niinɛ ɔ, nyɛ suɔ nyɛmimɛ ɔmɛ tsuo pɛpɛɛpɛ nɛ ngɛ Makedonia a saminya. Se wa kpa nyɛ pɛɛ nyɛmimɛ, nyɛɛ ya nɔ nɛ nyɛɛ pee pe ja po.

¹¹ Nyɛɛ bɔ mɔde nɛ nyɛɛ pee nyɛ he kpoo, nɛ nyɛɛ kɛ nyɛ he ko wo ni kpahi a sane mi. Nyɛɛ kɛ nyɛ nine nɛ tsu ní kaa bɔ nɛ wa de nyɛ ɔ.

¹² Ke nyɛ pee jã a, nihi nɛ li Kristo lolo ɔ maa bu nyɛ, nɛ nyɛ be nyɛ he ngɔe kɛ fɔ nɔ ko nɔ.

Nyɔmtsɛ ɔ ma

¹³ Nyɛmimɛ, wa suɔ kaa nyɛɛ le anɔkuale sane nɛ kɔɔ nihi nɛ gbo ɔ a he, konɛ nyɛ ko ye kɔmɔ kaa nihi nɛ be hɛ kɛ nɔ fɔmi.

¹⁴ Wa heɔ yeɔ kaa Yesu gbo, nɛ e te si ekohu. Jã kɛ̃, wa heɔ yeɔ kaa ke Yesu ma a, Mawu maa ngɔ nihi nɛ gbo ɔ ngɔ piɛ e he kɛ ba.

¹⁵ Nɔ́ nɛ Nyɔmtsɛ ɔ nitsɛ de ɔ, lɔ ɔ wa ngɛ nyɛ dee nɛ ɔ nɛ. Ligbi ɔ nɛ Nyɔmtsɛ ɔ maa ba a, wɔ nihi nɛ wa hɛ ngɛ, nɛ wa maa hi wami mi kɛ mwɔɔ ɔ, wa be ni nɛmɛ nɛ gbo ɔ a hlami sɛe kɛ ya kpee lɛ.

¹⁶ Ejakaa Nyɔmtsɛ ɔ nitsɛ ma kple si kɛ je hiɔwe kɛ ba kɛ ose nɛ nya wa. Bɔfo nɔkɔtɔma a maa wo gbi, nɛ Mawu titimati ɔ maa pɛ. Nihi nɛ he Yesu ye loko a gbo ɔ maa te si kekle.

¹⁷ Lɔ ɔ se ɔ, wɔ ni nɛmɛ nɛ wa hɛ ngɛ nɛ maa hi wami mi jamɛ a be ɔ, a ma sa waa kɛ mɛ tsuo kɛ ya kɔɔhiɔ mi ngɛ bɔku ɔmɛ a mi kɛ ya kpee Nyɔmtsɛ ɔ. Nɛ waa kɛ Nyɔmtsɛ ɔ maa hi si daa.

¹⁸ Lɔ ɔ he ɔ, nyɛɛ kɛ kikɛmɛ a munyu nɛ ɔmɛ nɛ wo nyɛ sibi a bua.