1 Tesalonikabi 3 - BAIBLO ALOO NGMAMI KLƆUKLƆU Ɔ

A tsɔ Timoteo

¹ Benɛ wa nyɛ we hu ɔ, wa kplɛɛ kaa wa maa tlɔ Atene kɛkɛ.

² Lɔ ɔ he ɔ, wa tsɔ Timoteo, wa nyɛmi nɛ waa kɛ lɛ tsuɔ ní kaa Mawu sɔmɔlɔ kɛ fiɛɔ Kristo he sane kpakpa a. Wa tsɔ lɛ, konɛ e ba wo nyɛ he wami, nɛ e ha nyɛ fi si ngɛ nyɛ hemi kɛ yemi ɔ mi,

³ bɔ nɛ pee nɛ amanehlu nɛ ngɛ bae ɔ ko wo nyɛ ti nɔ ko he gbeye. Nyɛ nitsɛmɛ nyɛ le kaa nɔ́ nɛ Mawu to kɛ ha wɔ ji lɔ ɔ nɛ.

⁴ Benɛ waa kɛ nyɛ ngɛ ɔ, wa de nyɛ ngɔ to kaa wa maa na amanehlu. Nɛ kaa bɔ nɛ nyɛ le ɔ, lɔ ɔ pɛ lɛ ba mi nɛ ɔ nɛ.

⁵ Kaa bɔ nɛ i de ɔ, benɛ i nyɛ we tsui tomi hu ɔ, e hia kaa ma tsɔ Timoteo nyɛ ngɔ, nɛ́ e ba hyɛ kaa nyɛ hemi kɛ yemi ɔ mi wa kɛ mwɔɔ lo. I ya ye gbeye kaa alini Abosiami ba ka nyɛ, nɛ e ha nɛ wa dengme nɛ wa gbo ɔ maa pee yaka.

⁶ Amlɔ nɛ ɔ, Timoteo kpale kɛ ba, nɛ e ba bɔ wɔ amaniɛ saminyayoo nɛ kɔɔ nyɛ hemi kɛ yemi, kɛ nyɛ suɔmi ɔ he. E ba de wɔ ke nyɛ susuɔ wa he daa nɛ, nɛ nyɛ hɛ jaa ngɛ wa he kaa bɔ nɛ wɔ hu wa hɛ jaa ngɛ nyɛ he ɔ.

⁷ Lɔ ɔ he ɔ, nyɛmimɛ, nyɛ hemi kɛ yemi ɔ woɔ wɔ he wami ngɛ amanehlu, kɛ nɔ́ nɛ wa ngɛ nae nɛ ɔ mi.

⁸ Ke nyɛ maa ngɔ nyɛ he ngɔ mɛtɛ Nyɔmtsɛ ɔ kulaa a, wɔ hu wa ma na he wami he.

⁹ Nyɛ he ɔ, Mawu haa wɔ bua jɔmi babauu nɛ wa be nyɛe maa na lɛ si saasaa.

¹⁰ Daa nyɔ kɛ pia a, wa kpaa lɛ pɛɛ kɛ wa tsui tsuo kaa waa na nyɛ hɛ mi kɛ hɛ mi, konɛ waa wo nyɛ hemi kɛ yemi ɔ mi he wami.

¹¹ Wa Tsɛ Mawu ɔ nitsɛ, kɛ wa Nyɔmtsɛ Yesu nɛ a bli blɔ ha wɔ nɛ waa ba nyɛ ngɔ ekohu.

¹² Nyɔmtsɛ ɔ nɛ ha nyɛ suɔmi ɔ mi nɛ wa, konɛ nyɛɛ suɔ nyɛ sibi, kɛ nimli adesahi tsuo kaa bɔ nɛ wɔ hu wa suɔ nyɛ ɔ.

¹³ Nɛ e wo nyɛ he wami, nɛ nyɛɛ kɛ tsui nɛ he tsɔ nɛ ba nyɛ je mi bɔ nɛ piami ko be nyɛ he hie ngɛ wa Tsɛ Mawu ɔ hɛ mi be mi nɛ wa Nyɔmtsɛ Yesu kɛ e ni klɔuklɔu ɔmɛ tsuo maa ba a.