1 Tesalonikabi 2 - BAIBLO ALOO NGMAMI KLƆUKLƆU Ɔ

Paulo ní tsumi ngɛ Tesalonika

¹ Nyɛmimɛ, nyɛ nitsɛmɛ nyɛ le kaa slaami nɛ wa ba slaa nyɛ ɔ pee we yaka.

² Nyɛ le bɔ nɛ a wa wɔ yi mi, nɛ a jɛ wɔ kɛ pue wa hɛ mi si ngɛ Filipi loko wa ba nyɛ ngɔ ngɛ Tesalonika a. E ngɛ mi kaa níhi fuu ka wɔ blɔ tsimi, se wa Mawu ɔ wo wɔ kã kaa wa ba fiɛ e sane kpakpa a ngɔ tsɔɔ nyɛ.

³ Lɔ ɔ he ɔ, nyɛ maa na kaa munyu nɛ wa kɛ ba fɔ nyɛ hɛ mi ɔ, pi mu ní tsumi, loo juɛmi yayami mi nɛ e je; wa bɛ nɛ wa ba sisi nyɛ.

⁴ Mohu ɔ, wa tuɔ munyu kaa bɔ nɛ Mawu tsɔɔ wɔ ke waa pee ɔ; ejakaa e na wɔ kaa nihi nɛ sa nɛ a tu sane kpakpa a ngɔ wo a dɛ mi. Wa hla we kaa waa sa nimli a hɛ mi, se mohu kaa wa maa sa Mawu pɛ hɛ mi; ejakaa lɛ nɛ e le bɔ nɛ wa tsui mi ngɛ ha.

⁵ Kaa bɔ nɛ nyɛ le ɔ, wa bɛ nyɛ ngɔ kɛ nya mi ngɔngɔɛ munyuhi; jehanɛ hu, wa ba sisi we nyɛ nɛ wa kɛ na nyɛ he se. Mawu ji wa we odase!

⁶ Wa bɛ, konɛ nimli ba wo wa hɛ mi nyami, nyɛ jio, ni kpahi jio.

⁷ Pohu wa ngɛ he blɔ kaa wa biɔ enɛ kɛ enɛ ngɛ nyɛ dɛ, ejakaa Kristo bɔfohi ji wɔ. Se benɛ wa ngɛ nyɛ ngɔ ɔ, wa pee nyɛ dɔdɔɔdɔ kaa bɔ nɛ bimɛanyɛ hɛɛɔ lɛ nitsɛ e bimɛ ɔ.

⁸ Akɛnɛ wa suɔ nyɛ saminya a, wa na he tsui kaa pi Mawu sane kpakpa a kɛkɛ nɛ wa maa ngɔ ba ha nyɛ; se wɔ nitsɛmɛ wa wami tete wa ma ngɔ fɔ si ha nyɛ. Suɔmi nɛ wa ngɛ kɛ ha nyɛ ɔ nya wa!

⁹ Nyɛmimɛ, nyɛ ma kai bɔ nɛ wa tsu ní kɛ pɔtɔ! Benɛ wa ngɛ Mawu sane kpakpa a fiɛe kɛ ngɛ nyɛ hae ɔ, wa ngɛ ní tsue nyɔ kɛ pia, konɛ wa ko pee tlomi ngɔ ha nyɛ ti nɔ ko.

¹⁰ Nyɛɛ kɛ Mawu ji wa we odase kaa wa ba wa je mi saminya ngɛ nyɛ nihi nɛ nyɛ heɔ yeɔ ɔ nyɛ kpɛti. Wa peeɔ nɔ́ nɛ da blɔ nɛ piami ko be wa he.

¹¹ Nyɛ le bɔ nɛ waa kɛ nyɛ ti nɔ tsuaa nɔ hi si kaa tsɛ kɛ e bi.

¹² Wa wo nyɛ he wami; wa wo nyɛ bua, nɛ wa wo nyɛ ga kaa nyɛɛ ba nyɛ je mi bɔ nɛ sa Mawu hɛ mi. Lɛ nɛ e tsɛ nyɛ ke nyɛɛ ba lɛ nitsɛ e matsɛ yemi ɔ, kɛ e nyami ɔ mi.

¹³ Nɔ́ kake he hu nɛ wa naa Mawu si ngɛ daa ji nɛ ɔ nɛ. Benɛ wa ngɔ Mawu munyu ɔ ba ha nyɛ ɔ, nyɛ bu tue, nɛ nyɛ he lɛ atuu, pi kaa nɔmlɔ adesa sɛ gbi, se mohu kaa Mawu munyu kaa bɔ nɛ e ngɛ anɔkuale mi ɔ. Niinɛ nyɛ nihi nɛ nyɛ heɔ yeɔ ɔ, Mawu munyu ɔ ngɛ ní tsue ngɛ nyɛ mi.

¹⁴ Nyɛmimɛ, nɔ́ nɛ pee nyɛ nɛ ɔ, lɔ ɔ nɔuu nɛ pee Mawu asafo ɔmɛ nɛ ngɛ Yudea a mi bi nɛ ngɔ a he ngɔ ha Kristo Yesu ɔ. Nyɛ na amanehlu ngɛ nyɛ nitsɛmɛ nyɛ ma mi bi a dɛ mi kaa bɔ nɛ mɛ hu a na amanehlu ngɛ Yuda bi a dɛ mi ɔ.

¹⁵ Nimli nɛ ɔmɛ nɛ a gbe Nyɔmtsɛ Yesu, kɛ gbali ɔmɛ. Mɛ lɛ a wa wɔ yi mi. Mawu na we a he bua jɔmi; a te si wo nɔ tsuaa nɔ!

¹⁶ Ma je li tete po a ke wa ko fiɛ ha mɛ, konɛ a ko he a yi wami. Lɔ ɔ he ɔ, yayami ɔ, pe a ngɛ pee kɛ ngɛ nɔ toe babauu daa ligbi. Se jehanɛ lɛɛ Mawu kɛ e mi mi fumi ɔ kple a nɔ!

Paulo suɔ nɛ e ya slaa Tesalonika bi ɔmɛ ekohu

¹⁷ Nyɛmimɛ, e ngɛ mi kaa wa si nyɛ, nɛ waa kɛ nyɛ mi gba be kpiti ko ngɛ he lo mi, se wa hɛ ji nyɛ nɔ. Hɛja sɔuu ha nɛ wa bɔ mɔde wawɛɛ kaa waa na nyɛ hɛ mi ekohu.

¹⁸ Wa hla kaa waa kpale kɛ ba nyɛ ngɔ; ee, imi Paulo nitsɛ, i ka si abɔ kaa ma ba. Se Abosiami tsi wɔ blɔ.

¹⁹ Ejakaa ke wa Nyɔmtsɛ Yesu ba, nɛ wa ba pue ngɛ e hɛ mi ɔ, mɛni nɔ wa maa fĩa kɛ fɔ? Mɛni ma ha wɔ bua jɔmi? Nɛ mɛni jlasi waa kɛ maa fĩa kaa wa ye kunimi? Anɛ pi nyɛ lo?

²⁰ Ee, nyɛ lɛ nyɛ maa wo wa hɛ mi nyami; nyɛ lɛ nyɛ ma ha wɔ bua jɔmi.