1 Korintobi 9 - BAIBLO ALOO NGMAMI KLƆUKLƆU Ɔ

Bɔfo blɔ nya, kɛ e ní tsumi

¹ Anɛ i be ye dɛ he lo? Anɛ pi bɔfo ji mi lo? Anɛ i nɛ Yesu, wa Nyɔmtsɛ ɔ lo? Nɛ nyɛ nɛɛ? Ní nɛ i tsu ha Nyɔmtsɛ ɔ, anɛ pi nyɛ ji nɔ́ nɛ je mi kɛ ba lo?

² Ke ni kpahi bui kaa bɔfo ji mi ɔ, i heɔ yeɔ kaa nyɛɛ lɛɛ nyɛ he mi kaa bɔfo; ejakaa ní tsumi nɛ i ngɛ tsue ɔ, nyɛ ji okadi kaa Nyɔmtsɛ ɔ bɔfo ji mi.

³ Ke nihi de níhi ngɛ ye he ɔ, nɔ́ nɛ i kɛ faa ye he ji nɛ ɔ nɛ.

⁴ Anɛ wa be he blɔ kaa wa naa niye ní kɛ jeɔ nyɛ ngɔ ngɛ ní nɛ wa ngɛ tsue ɔ he lo?

⁵ Ke wa yaa he ko ɔ, anɛ wa be he blɔ kaa wa yihi nɛ le Kristo ɔ, waa kɛ mɛ nyɛɛɔ kaa bɔ nɛ bɔfo kpa amɛ, kɛ Nyɔmtsɛ ɔ nyɛminyumu ɔmɛ, kɛ Petro peeɔ ɔ lo?

⁶ Aloo i kɛ Barnaba kɛkɛ nɛ e sa kaa wa tsu ní loko waa ye ní?

⁷ Ta bulɔ te nɔ nɛ tsuɔ ní nɛ lɛ nitsɛ e woɔ e he hiɔ nɛɛ? Mɛnɔ lɛ peeɔ wai ngmɔ, nɛ e yi e mi yiblii ɔ eko? Mɛnɔ nɛ lɛɛ to, nɛ e nui to nyɔ nyu ɔ eko?

⁸ Pi níhi nɛ a naa ngɛ adesa wami si himi mi daa ligbi kɛkɛ a he munyu nɛ i ngɛ tue. Nyɛ maa na nɔ́ nɛ i de nɛ ɔ nɔuu ngɛ Mawu mlaa womi ɔ mi.

⁹ A ngma ngɛ Mose mlaa a mi ke, “Na nɛ ngɛ blɛfo gblɛe ɔ, koo fi e nya.” Mawu ɔ, anɛ nahi a he nɔ́ nɛ ngɛ lɛ dɔe?

¹⁰ Munyu nɛ e tu ɔ, anɛ pi wɔ tutuutu wa he nɛ e kɔɔ lo? Nihi nɛ gbaa ní, kɛ ni nɛmɛ nɛ kpaa ní ɔ, e sa kaa a tsu ní kɛ hɛ kɛ nɔ fɔmi kaa mɛ hu a maa ye niba ní ɔ eko.

¹¹ Ke wa ba du mumi mi níhi ngɛ nyɛ tsui mi ɔ, anɛ e ji nɔ́ ko nɛ he wa tsɔ kaa wɔ hu wa na he lo ɔ hiami níhi kɛ je nyɛ dɛ lo?

¹² Ke ni kpahi ngɛ he blɔ kaa a hyɛɔ níhi kaa kikɛ nɛ ɔ blɔ kɛ jeɔ nyɛ dɛ ɔ, anɛ wɔɔ lɛɛ wa be he blɔ kulaa pe mɛ lo? Se waa kɛ he blɔ nɛ ɔ tsu we ní. Mohu ɔ, wa to wa tsui si ngɛ nɔ́ tsuaa nɔ́ mi, konɛ wa ko pee nɔ́ ko nɛ maa tsi Kristo he sane kpakpa a fiɛmi ɔ nya.

¹³ I heɔ yeɔ kaa nyɛ le kaa nihi nɛ tsuɔ ní ngɛ sɔlemi we ɔ, sɔlemi we ɔ a naa a nya mi ngma kɛ jeɔ. Ni nɛmɛ nɛ a ní tsumi ji kaa a sã bɔ ngɛ bɔ sami la tɛ ɔ nɔ ɔ, mɛ hu níhi nɛ a kɛ ba sã bɔ ɔ eko a yeɔ.

¹⁴ Jã nɔuu kɛ̃ Nyɔmtsɛ ɔ wo mlaa ke, nihi nɛ fiɛɔ sane kpakpa a, a na a nya mi ngma kɛ je munyu ɔ fiɛmi mi.

¹⁵ He blɔ nɛ ɔmɛ ngɛ mohu, se imi lɛɛ i bi we nyɛ nɔ́ ko hyɛ. Womi nɛ i ngɛ nyɛ ngmae nɛ ɔ hu, pi ye juɛmi ji kaa ma kɛ kai nyɛ kaa jehanɛ e sa kaa nyɛ bɔni mi nɔ́ hami. Afani nɛ ma gbo mohu, pe nɛ ma pee nɔ́ ko kaa kikɛ nɛ ɔ, nɛ́ nɔ́ nɛ nɔ nɛ ma da kɛ fĩa a ba bɔ mi!

¹⁶ Niinɛ, sane kpakpa a nɛ i fiɛɛ ɔ, lɔ ɔ kɛkɛ ha we mi he blɔ kaa ma fĩa, ejakaa Mawu nitsɛ nɛ fa mi ke ma pee jã. Kaa i fiɛ we sane kpakpa a, jinɛ musu tloo mi pɛ!

¹⁷ Ní nɛ i ngɛ tsue ɔ, imi nitsɛ nɛ i suɔ kaa ma tsu jinɛ i ko hyɛ hiɔwo blɔ. Se Mawu nitsɛ nɛ hla mi, nɛ e ngɔ ní tsumi ɔ ngɔ wo ye dɛ kaa nɔmlɔ nɛ yeɔ anɔkuale.

¹⁸ Lɛɛ mɛni hiɔwo sa mi mɔ? Hiɔwo ɔ kɛkɛ ji he blɔ nɛ i na kaa ma fiɛ sane kpakpa a yaka nɛ i he we nɔ́ ko. Jehanɛ hu, he blɔ nɛ i ngɛ kaa ma hyɛ nɔ́ ko blɔ kɛ je nyɛ dɛ mi ngɛ sane kpakpa a nɛ i ngɛ fiɛe ɔ he ɔ, i kɛ jamɛ a he blɔ ɔ tsu we ní.

¹⁹ I ngɛ ye dɛ he; pi nɔ ko nyɔguɛ ji mi. Se kɛ̃ ɔ, i pee ye he nihi tsuo a nyɔguɛ, bɔ nɛ pee nɛ ye nine nɛ su nihi babauu a nɔ.

²⁰ I peeɔ ye ní kaa Yuda no ngɛ Yuda bi a kpɛti, bɔ nɛ pee nɛ ye nine nɛ su a nɔ. Ngɛ ni nɛmɛ nɛ yeɔ mlaa a nɔ a kpɛti ɔ, i peeɔ ye ní kaa nɔ nɛ sa kaa lɛ hu e yeɔ mlaa a nɔ, bɔ nɛ pee nɛ ye nine nɛ su a nɔ.

²¹ Jã kɛ̃ ngɛ ma je li a kpɛti ɔ, i peeɔ ye ní kaa ma je no, nɛ i yi Yuda mlaa a nɔ. I peeɔ enɛ ɔ, bɔ nɛ pee nɛ ye nine nɛ su ma je li ɔmɛ a nɔ. Se enɛ ɔ tsɔɔ we kaa i kɛ Mawu mlaa a be nɔ́ ko peemi. Dɛbi! Kristo mlaa a nɔ i yeɔ.

²² Ngɛ nihi nɛ a hemi kɛ yemi gbɔjɔ a kpɛti ɔ, i peeɔ ye ní kaa nɔ nɛ lɛ hu e hemi kɛ yemi gbɔjɔ, bɔ nɛ pee nɛ ye nine nɛ su a nɔ. Ee, bɔ tsuaa bɔ nɛ nɔ ko ngɛ ɔ, imi hu i peeɔ ye he kaa lɛ. I peeɔ enɛ ɔ, bɔ nɛ pee nɛ ma gu blɔ tsuaa blɔ nɔ kɛ he nihi a yi wami.

²³ I peeɔ enɛ ɔmɛ tsuo, konɛ ma kɛ ha nɛ Yesu he sane kpakpa a nɛ gbɛ fĩa. Kɛkɛ ɔ, ní kpakpahi nɛ maa je sɛ gbi ɔ mi kɛ ba a, imi hu ma na eko.

²⁴ Anɛ nyɛ li kaa ke nihi babauu tu fo ɔ, nɔ kake too lɛ naa ayekoo ní ɔ lo? Lɔ ɔ he ɔ, nyɛɛ tu fo ɔ jã nɔuu, konɛ nyɛ hu nyɛ nine nɛ su ayekoo ní ɔ nɔ.

²⁵ Nihi nɛ kaa a kpɔhi a mi ɔ, a hɛ mi kaa si be tsuaa be, bɔ nɛ pee nɛ a ná jlasi nɛ puɛɔ. Se wɔɔ lɛɛ wa peeɔ jã, konɛ wa nine nɛ su jlasi nɛ puɛ we gblegbleegble ɔ nɔ.

²⁶ Lɔ ɔ he ɔ, fo nɛ i ngɛ tue nɛ ɔ, i ngɛ tue tɛɛ kɛ yaa nyagbe; kunɔ nɛ i ngɛ nɔe ɔ, i nɔɛ kaa nɔ ko nɛ ngɛ kɔɔhiɔ gbee.

²⁷ Se mohu ɔ, i waa ye nɔmlɔ tso ɔ yi mi, nɛ i haa nɛ e peeɔ ye suɔmi nya ní. I peeɔ jã, bɔ nɛ pee nɛ ke i fiɛ ha ni kpahi se ɔ, imi nitsɛ lɛɛ Mawu ko sake mi ngɔ fɔ he.