1 Korintobi 6 - BAIBLO ALOO NGMAMI KLƆUKLƆU Ɔ

Nyɛɛ kɛ nyɛ nyɛmimɛ ngɛ munyu yee

¹ Ke nyɛ ti nɔ ko kɛ e nyɛmi asafo mi no na sane ɔ, e be he blɔ nɛ e kɛ sane ɔ ya haa nihi nɛ ja we Mawu nɛ a hyɛ mi ha mɛ. E sa nɛ e kɛ ya ha ni klɔuklɔu ɔmɛ.

² Anɛ nyɛ li kaa ni klɔuklɔu ɔmɛ lɛ maa kojo je ɔ lo? Saminya! Ke nyɛ lɛ nyɛ maa kojo je ɔ, lɛɛ sane wawi kojomi pi nɔ́ ko kulaa ha nyɛ.

³ Tse nyɛ le kaa nyɛ lɛ nyɛ maa kojo hiɔwe bɔfo ɔmɛ! Nɛ daa ligbi munyu tsɔwitsɔwi ɔ lɛɛ nyɛ be nyɛe maa kojo?

⁴ Ke sanehi kaa kikɛ nɛ ɔ ba a, nyɛ maa ngɔ ya ha nihi nɛ asafo ɔ kɛ mɛ be nɔ ko peemi nɛ a hyɛ mi lo? Nyɛ ha nɛ ma bi nyɛ munyu nɛ zo nɛ gbe nyɛ.

⁵ Anɛ juɛmitsɛ kake too be nyɛ kpɛti nɛ ma nyɛ maa hyɛ nyɛmimɛ a kpɛti sane mi ha mɛ lo?

⁶ Se mohu, nɔ kɛ e nyɛmi yaa kojomi he, nɛ nihi nɛ li Kristo ɔ ya hyɛɛ a sane mi ha mɛ.

⁷ Kaa nyɛ nyɛ nɛ nyɛɛ kɛ nyɛ he ngɛ munyu yee ɔ, lɔ ɔ kɛkɛ tsɔɔ kaa nyɛ je mi bami sɛ́ Kristo se nyɛɛli saasaa. Nyɛ ha nɛ ni kpahi pee nyɛ yayami mohu jinɛ tse e ko hi! Nyɛ ha nɛ ni kpahi sisi nyɛ mohu jinɛ tse e ko hi!

⁸ Se nyɛ mohu nyɛ ngɛ nyɛ sibi yayami pee, nɛ nyɛ ngɛ nyɛ sibi sisie, nyɛ nitsɛmɛ nyɛ nyɛmimɛ tete po.

⁹ Anɛ nyɛ li kaa yayami peeli be blɔ nya ko ngɛ Mawu matsɛ yemi ɔ mi lo? Nyɛ ko sisi nyɛ he! Yaholi, loo amaga jali, loo gba puɛli, loo nyumuhi kɛ yihi sɔuu nɛ kɛ a sibi peeɔ yakayaka ní,

¹⁰ loo juli, loo hɛ tsuli, loo dã tɔli, loo nihi a biɛ puɛli, loo ojo fiali a nine be Mawu matsɛ yemi ɔ nɔ sue kɔkɔɔkɔ.

¹¹ Be ko ɔ, kikɛ nɛ ɔ nyɛ ti ni komɛ ba a je mi. Se jehanɛ ɔ, a du nyɛ he, nɛ a kpale tsukɔ nyɛ he, nɛ a wo nyɛ nguɔ ngɛ Nyɔmtsɛ Yesu Kristo biɛ ɔ, kɛ wa Mawu ɔ mumi ɔ mi.

Nyɛɛ ngɔ nyɛ nimli tso ɔmɛ kɛ wo Mawu hɛ mi nyami

¹² Nɔ ko ma de ke, “I ngɛ he blɔ nɛ i peeɔ nɔ́ tsuaa nɔ́ nɛ i suɔ nɛ mlaa ko mlaa ko tsí ye nya.” Ee, se tsa pi nɔ́ tsuaa nɔ́ nɛ hi ha mo. Imi hu i ko de ke i ngɛ he blɔ nɛ i peeɔ nɔ́ tsuaa nɔ́ nɛ i suɔ jã nɔuu. Se i be hae nɛ nɔ́ ko nɔ́ ko nɛ ye ye nɔ.

¹³ Nɔ ko hu ma de ke, “Ngma ngɛ ha muklii, nɛ muklii hu ngɛ ha ngma.” Ee, se Mawu ma kpata nɔ́ enyɔ nɛ ɔmɛ tsuo a hɛ mi. Nɔmlɔ tso ɔ, pi nyumu kɛ yo yakayaka ní peemi nɛ e ngɛ kɛ ha; se mohu e ngɛ ngɛ Nyɔmtsɛ ɔ he. Nɛ Nyɔmtsɛ ɔ hu ngɛ ha nɔmlɔ tso ɔ.

¹⁴ Mawu tle Nyɔmtsɛ ɔ si kɛ je gbeje, nɛ e kɛ e he wami ɔ ma tle wɔ hu si kɛ ba wami mi ekohu.

¹⁵ Anɛ nyɛ li kaa nyɛ nɔmlɔ tso ɔ, Kristo nɔmlɔ tso ɔ he níhi ji mɛ lo? Lɛɛ ma ngɔ Kristo nɔmlɔ tso ɔ he ní komɛ kɛ ya pee yaholɔ hu e nɔmlɔ tso he níhi lo? Dɛbi!

¹⁶ Anɛ nyɛ li kaa nɔ nɛ kɛ yaholɔ ya naa bɔmi ɔ, e kɛ lɛ plɛ pee nɔmlɔ tso kake lo? Kaa bɔ nɛ ngmami ɔ deɔ ɔ, “Mɛ ni enyɔ ɔmɛ tsuo ma plɛ pee nɔmlɔ tso kake.”

¹⁷ Ke nɔ ko ngɔ e he ngɔ ha Nyɔmtsɛ ɔ, lɔ ɔ lɛɛ e kɛ lɛ pee kake ngɛ mumi mi.

¹⁸ Nyɛɛ tu yahomi nya fo. Yayami tsuaa yayami nɛ adesa peeɔ ɔ, pee we nɔmlɔ tso ɔ nɔ́ ko tsɔ. Se nɔ nɛ fiɛɔ yo kɛ nyumu yakayaka fiɛmi ɔ, yeɔ lɛ nitsɛ e nɔmlɔ tso ɔ awi.

¹⁹ Mumi Klɔuklɔu ɔ nɛ Mawu ha nyɛ, nɛ ngɛ nyɛ mi ɔ, anɛ nyɛ li kaa e sɔlemi tsu ji nɔmlɔ tso ɔ lo? Nyɛ be nyɛ dɛ he; Mawu níhi ji nyɛ.

²⁰ Mawu hé nyɛ kɛ jua wawɛ. Lɔ ɔ he ɔ, nyɛɛ ngɔ nyɛ nɔmlɔ tso ɔ kɛ wo Mawu hɛ mi nyami.