1 Korintobi 4 - BAIBLO ALOO NGMAMI KLƆUKLƆU Ɔ

Kristo bɔfohi

¹ Nyɛɛ bu wɔ kaa Kristo tsɔli nɛ Mawu ngɔ laami sɛ gbi ɔ ngɔ ha wɔ ke waa fiɛ.

² Nɔ́ nɛ a ngɛ hlae ngɛ tsɔli kaa kikɛ nɛ ɔ a dɛ ji kaa a ye anɔkuale ha a nyɔmtsɛ ɔ.

³ Imi lɛɛ nɔ́ nɛ nyɛ, aloo ni kpahi susuɔ ngɛ ye he ɔ hɛwi mi; imi nitsɛ po, i kojo we ye he.

⁴ Ye he nile tete bui mi fɔ, se enɛ ɔ tsɔɔ we kaa lɔ ɔ he ɔ, i yeɔ nguɔ. Nyɔmtsɛ ɔ ji nɔ nɛ kojoɔ mi.

⁵ Lɔ ɔ he ɔ, nyɛ ko kojo nɔ ko loko be ɔ nɛ su. Nyɛɛ mlɛ kɛ yaa si Nyɔmtsɛ ɔ maa ba. Ke e ba a, e ma je diblii mi níhi, kɛ tsui mi ní yayahi nɛ a kɛ laa a tsuo kpo. Jamɛ a be ɔ, nɔ tsuaa nɔ ma na yi jemi nɛ sa lɛ ɔ kɛ je Mawu dɛ mi.

⁶ Ye nyɛmimɛ, nyɛ he ɔ, i ngɔ imi, kɛ Apolo ngɔ pee nɔ hyɛmi nɔ́ ha nyɛ, konɛ nyɛɛ kase wɔ, nɛ nyɛ ko je nɔ́ nɛ a ngma a se ya pee nɔ́ kpa ko. Nyɛ ti nɔ ko nɔ ko kó wó e he nɔ; nɔ ko kó bu nɔ ko nɔmlɔ ngua pe nɔ ko.

⁷ Mɛnɔ lɛ pee mo slɔɔto pe ni kpahi? Mɛni ngɛ o dɛ nɛ pi Mawu nɛ ha mo? Ke Mawu lɛ ha mo ɔ, lɛɛ mɛni he je mɔ nɛ o fĩaa kaa nɔ́ nɛ pi nɛ a kɛ ke mo ɔ?

⁸ Tse nyɛ ná nɔ́ tsuaa nɔ́ nɛ hia nyɛ! Tse nyɛ ná ní momo! Nyɛ ngɛ matsɛ yee, be mi nɛ wɔɔ lɛɛ wa be nɔ́ ko mi; pi jã? I na nɛ nyɛ ngɛ matsɛ yee niinɛ, konɛ waa piɛ nyɛ he kɛ ye.

⁹ Ejakaa e peeɔ mi kaa Mawu ngɔ wɔ bɔfo ɔmɛ ngɔ pee sekpɛli. Wa ngɛ kaa nihi nɛ a bu mɛ gbenɔ fɔ, konɛ a gbe mɛ ngɛ ma hɛ mi, nɛ je ɔ, hiɔwe bɔfohi, kɛ adesahi tsuo nɛ na mɛ.

¹⁰ Kristo he ɔ, wa plɛ kuasiahi, se nyɛɛ lɛɛ nyɛ ba pee ní leli! Wa gbɔjɔ, se nyɛɛ lɛɛ nyɛ he mi ba wa nyɛ! Nyɛ hɛ mi ba nyami, se wɔɔ lɛɛ wa hɛ mi pue si.

¹¹ Kɛ ba si amlɔ nɛ ɔ tete po hwɔ kɛ kuma yee wɔ; wa heha níhi híaa ngɛ wa he; a kongoɔ wɔ, nɛ wa hii kpae kɛ hii bee.

¹² Waa kɛ wa nine nguɛ nyɔngma tsuɔ ní. Ke nihi ngɛ wɔ jɛe ɔ, wɔɔ lɛɛ wa gbaa mɛ; ke a ngɛ wɔ yi mi wae ɔ, wa toɔ wa tsui si.

¹³ Ke a ngɛ wa biɛ puɛe ɔ, wa bɔɔ mɔde kaa wɔɔ lɛɛ wa maa tu he jɔmi munyu. Je ɔ buu wɔ kaa kuku kɛ ba si mwɔnɛ ɔ.

¹⁴ I ngmɛ́ nyɛ ní nɛ ɔmɛ nɛ ma kɛ pue nyɛ hɛ mi si, se mohu nɛ ma kɛ tu munyu kɛ tsɔɔ nyɛ kaa imi nitsɛ ye bimɛ nɛ i suɔ.

¹⁵ Nyɛ ngɛ nihi akpeakpe nɛ a ngɛ nyɛ nɔ hyɛe mohu, se nɛ nyɛ ba le Kristo ɔ, tsɛ kake pɛ lɛ nyɛ ngɛ. Ejakaa kɛ gu sane kpakpa a nɛ i ngɔ ba ha nyɛ ɔ nɔ ɔ, nyɛɛ kɛ Yesu Kristo ba bɔni bɔmi, nɛ i ba pee nyɛ tsɛ.

¹⁶ Lɔ ɔ he ɔ, i kpa nyɛ pɛɛ nɛ nyɛ wo ye nane.

¹⁷ I ngɛ Timoteo nyɛ ngɔ tsɔe ngɛ enɛ ɔ he. E ngɛ kaa imi nitsɛ ye bi fɔfɔɛ; e yeɔ mi anɔkuale, nɛ i suɔ lɛ, ejakaa e le Kristo. Ke Timoteo ba a, e ma kai nyɛ bɔ nɛ i plɛ kɛ ngɛ Yesu Kristo se nyɛɛe ha, kaa bɔ nɛ a naa ngɛ ye ní tsɔɔmi mi ngɛ asafo ɔmɛ a mi he tsuaa he ɔ.

¹⁸ Nyɛ ti ni komɛ susu kaa i be bae ba slaa nyɛ, nɛ lɔ ɔ he ɔ, a bɔni a he nɔ womi.

¹⁹ Ke Nyɔmtsɛ ɔ suɔ ɔ, e be kɛe nɛ ma ba slaa nyɛ. Ke i ba a, pi munyu nɛ kikɛmɛ a he nɔ woli nɛ ɔmɛ ngɛ tue ɔ kɛkɛ nɛ ma ba nu, se he wami nɛ a kɛ ngɛ ní tsue ɔ, ma ba na paa.

²⁰ Ejakaa Mawu matsɛ yemi ɔ jeɔ e he kpo ngɛ adesa ní tsumi mi, se pi munyu tumi mi.

²¹ Te nɔ nɛ nyɛ suɔ nɛɛ? Ke i ma nyɛ ngɔ ɔ, ma hɛɛ kpa kɛ ba, aloo ma ba ngɛ suɔmi, kɛ he jɔmi mi?