1 Korintobi 16 - BAIBLO ALOO NGMAMI KLƆUKLƆU Ɔ

Korinto asafo ɔ tsu sika nɛ a kɛ hyɛ Kristo se nyɛɛli kpahi a nɔ

¹ Jehanɛ lɛɛ ma suɔ nɛ ma de nɔ́ ko ngɛ sika nɛ nyɛ to nɛ nyɛ ma tsu kɛ mane ni klɔuklɔu ɔmɛ ngɛ Yerusalem ɔ he. Nɔ́ nɛ i tsɔɔ asafo ɔmɛ nɛ ngɛ Galatia ke a pee ɔ, nyɛ hu nyɛɛ pee jã nɔuu.

² Daa otsi mi kekleekle ligbi ɔ, sika nɛ nyɛ ti nɔ tsuaa nɔ naa ngɛ otsi ɔ mi ɔ, e je eko ngɔ to, nɛ e hi nya buae. Kɛkɛ ɔ, ke i ba a, e be hiae kaa a tsu sika hu.

³ Ke i ba a, ma tsɔ nihi nɛ nyɛ nitsɛmɛ nyɛ buu mɛ kɛ womi, konɛ a ngɔ nyɛ nike ní ɔ kɛ ya Yerusalem.

⁴ Nɛ ke e hia kaa imi hu ma ya a, i kɛ mɛ maa ya.

Paulo yi mi tomi

⁵ Ma ya gu Makedonia loko ma ba nyɛ ngɔ, ejakaa i to ye yi mi kaa ma ya gu lejɛ ɔ.

⁶ Eko ɔ, ma hi nyɛ ngɔ be saii, nɛ ma ye fĩɛ be ɔ po ngɛ nyɛ ngɔ. Lɔ ɔ se ɔ, nyɛ maa wo mi blɔ kɛ ya he tsuaa he nɛ ma yaa.

⁷ Enɛ ɔ lɛɛ i sume kaa ma ba na nyɛ kpiti kɛkɛ nɛ ma je. Ke Nyɔmtsɛ ɔ maa ngmɛ blɔ ɔ, i heɔ yeɔ kaa ma kɛ ngɛ nyɛ ngɔ.

⁸ Ma hi Efeso hiɛmɛ nɛ ɔ kɛ yaa si Pentekoste ligbi ɔ.

⁹ Blɔ bli ha mi ngɛ hiɛ ɔ nɛ ma tsu ní saminya, se kɛ̃ ɔ, nihi nɛ teɔ si woɔ mi ɔ, mɛ hu a ngɛ hiɛ ɔ babauu.

¹⁰ Ke Timoteo ba nyɛ ngɔ ɔ, nyɛ he lɛ hɛmuɔ nɛ e ko ye gbeye, ejakaa lɛ hu Nyɔmtsɛ ɔ ní tsumi ɔ nɔuu nɛ e ngɛ tsue kaa imi.

¹¹ Nyɛ ti nɔ ko nɛ ko bu lɛ kaa pi nɔ ko ji lɛ. Se mohu nyɛɛ hyɛ, konɛ e tsa e blɔ hiami ɔ nɔ ngɛ tue mi jɔmi mi. I ngɛ blɔ hyɛe kaa e kɛ nyɛmimɛ ɔmɛ maa kpale kɛ ba.

¹² Jehanɛ ɔ, nɔ́ nɛ kɔɔ wa nyɛmi Apolo ɔ he ji nɛ ɔ nɛ. I kpa lɛ pɛɛ hluu kaa e kɛ nyɛmimɛ kpa amɛ nɛ a ba slaa nyɛ ngɛ Korinto, se e to kaa amlɔ nɛ ɔ lɛɛ e be nyɛe maa ba. Pee se ke e ba na blɔ hu e maa ba.

Nyagbe munyuhi

¹³ Nyɛɛ huɔ; nyɛɛ hɛɛ hemi kɛ yemi ɔ mi wawɛɛ; nyɛɛ pee kã, nɛ nyɛ he nɛ wa.

¹⁴ Nyɛɛ kɛ suɔmi nɛ pee nɔ́ tsuaa nɔ́.

¹⁵ Tse nyɛ le Stefana, kɛ e we mi bi ɔmɛ. Mɛ ji kekleekle nihi nɛ tsake pee Kristo se nyɛɛli ngɛ Akaya, nɛ a ngɔ a he ngɔ ha kaa a ma sɔmɔ ni klɔuklɔu ɔmɛ. Ye nyɛmimɛ, i kpa nyɛ pɛɛ,

¹⁶ nyɛɛ ba nyɛ he si ha nihi kaa kikɛ nɛ ɔ, kɛ ni nɛmɛ tsuo nɛ i kɛ mɛ tsuɔ ní ɔ.

¹⁷ I na bua jɔmi babauu kaa Stefana, kɛ Fortunato, kɛ Akaiko ba hiɛmɛ nɛ ɔ. Ejakaa nɛ nyɛ be ye ngɔ ngɛ hiɛmɛ nɛ ɔ, nɔ́ nɛ nyɛ ko pee ha mi ɔ, a ngɛ pee pɛpɛɛpɛ.

¹⁸ A ba wo mi bua kaa bɔ nɛ a wo nyɛ hu bua a. E hia kaa nyɛɛ le nihi kaa kikɛ nɛ ɔ saminya.

¹⁹ Asafo ɔmɛ nɛ a ngɛ Asia a ke a biɔ nyɛ. Akuila, kɛ Priskila, kɛ asafo ɔ nɛ kpee ngɛ a we ɔ mi ɔ ke a biɔ nyɛ saminya ngɛ Nyɔmtsɛ ɔ biɛ mi.

²⁰ Nyɛmimɛ ɔmɛ tsuo nɛ ngɛ hiɛ ɔ ke a biɔ nyɛ. Ke nyɛ kpe ɔ, nyɛ nga nyɛ sibi kɛ suɔmi nɛ sa Kristo se nyɛɛli kɛ je nyɛ tsui mi.

²¹ Imi Paulo nitsɛ nɛ́ i ngma nyɛ enɛ ɔ, i biɔ nyɛ.

²² Nɔ tsuaa nɔ nɛ sume Nyɔmtsɛ ɔ, a gbiɛ lɛ! Wa Nyɔmtsɛ, ba!

²³ Nyɔmtsɛ Yesu Kristo dloomi ɔ kɛ nyɛ nɛ hi si.

²⁴ Ye suɔmi ɔ kɛ nyɛ tsuo nɛ hi si ngɛ Kristo Yesu biɛ mi! Amen.