1 Korintobi 10 - BAIBLO ALOO NGMAMI KLƆUKLƆU Ɔ

Amagahi a he kɔkɔ bɔmi

¹ Ye nyɛmimɛ, i suɔ kaa ma kai nyɛ nɔ́ nɛ ba wa nɛmɛ ɔmɛ nɛ nyɛɛ Mose se ɔ a nɔ. Mɛ tsuo a hi bɔku ɔ sisi, nɛ mɛ tsuo a po Wo Tsu ɔ.

² Benɛ a ngɛ bɔku ɔ sisi, kɛ wo ɔ mi ɔ, a sɔle mɛ kaa Mose se nyɛɛli.

³ Mɛ tsuo a ye mumi mi ní kake,

⁴ nɛ mɛ tsuo a nu mumi mi nyu kake ɔ nɛ je mumi mi tɛ sa nɛ nyɛɛ a se ɔ mi. Jamɛ a tɛ sa a ji Kristo.

⁵ Se enɛ ɔ tsuo se ɔ, Mawu na we a ti nihi fuu a he tsui. Lɔ ɔ he ɔ, a kpata a hɛ mi ngɛ nga a nɔ.

⁶ Ní nɛ ɔmɛ tsuo ba mi kaa okadihi nɛ a to wɔ, konɛ wa ko ha yayami nɛ pee wɔ akɔnɔ kaa bɔ nɛ e pee mɛ ɔ.

⁷ Nyɛ ko ja amaga kaa bɔ nɛ a ti ni komɛ pee ɔ. Kaa bɔ nɛ ngmami ɔ deɔ ɔ, “Ma a pue si, nɛ a ye ní, nɛ a nu ní, nɛ a fiɛ yakayaka fiɛmihi.”

⁸ Wa ko fiɛ yakayaka fiɛmi kaa bɔ nɛ a ti ni komɛ pee, nɛ nimli akpe nyingmi enyɔ kɛ etɛ gbo ligbi kake ɔ.

⁹ Wa ko ka Nyɔmtsɛ ɔ kaa bɔ nɛ a ti ni komɛ pee, nɛ sinɔ kpata a hɛ mi ɔ.

¹⁰ Wa ko tu munyu huitihuiti kaa bɔ nɛ a ti ni komɛ pee, nɛ bɔfo nɔ́ puɛlɔ ɔ kpata a hɛ mi ɔ.

¹¹ Níhi nɛ ba a nɔ ɔ peeɔ okadi kɛ ha ni kpahi. A ngma ní nɛ ɔmɛ kɛ ngɛ wɔ kɔkɔ bɔe, ejakaa be nɛ wa ngɛ mi nɛ ɔ kɛ nyagbe be ɔ kɛ we kulaa.

¹² Lɔ ɔ he ɔ, nɔ nɛ susuɔ kaa e daa si ɔ, e hyɛ e he nɛ hi, konɛ e ko nɔ si.

¹³ Kahi nɛ baa nyɛ nɔ ɔ, ekoeko be nɛ bɛ adesa nɔ hyɛ. Se Mawu yeɔ e siwo nɔ, nɛ e be hae nɛ a ka nyɛ pe bɔ nɛ nyɛ ma nyɛ. Ke ka ba nyɛ nɔ ɔ, Mawu ma ha nyɛ he wami nɛ nyɛ kɛ da nya, konɛ nyɛɛ je mi.

¹⁴ Lɔ ɔ he ɔ, ye huɛmɛ nɛ i suɔ, nyɛɛ yu nyɛ he kɛ je amaga jami he kulaa.

¹⁵ I kɛ nyɛ ngɛ munyu tue kaa a kɛ juɛmitsɛmɛ tuɔ munyu; nɔ́ nɛ i ngɛ dee ɔ, nyɛ nitsɛmɛ nyɛ kɔ se.

¹⁶ Nyɔmtsɛ ɔ niye ní kplu ɔ nɛ wa naa Mawu si ngɛ he ɔ, anɛ e ha we nɛ wɔ tsuo wa naa gbaami nɛ jeɔ Kristo muɔ mi ɔ eko lo? Jã kɛ̃ ke wa ku abolo ɔ nɛɛ, anɛ wɔ tsuo wa na we gbaami nɛ jeɔ Kristo nɔmlɔ tso ɔ mi ɔ eko lo?

¹⁷ Bɔ tsuaa bɔ nɛ wa hiɛmi ngɛ ɔ, wɔ tsuo wa yeɔ abolo kake ɔ eko. Enɛ ɔ tsɔɔ kaa Kristo nɔmlɔ tso ɔ he níhi ji wɔ tsuo.

¹⁸ Yuda bi a kusumi, kɛ a hemi kɛ yemi ko tsɔɔ kaa nihi nɛ yeɔ ní nɛ a kɛ sã bɔ ɔ, guu enɛ ɔ peemi mi nɛ a kɛ bɔ sami la tɛ ɔ naa huɛ bɔmi.

¹⁹ Lɛɛ kɛ i ngɛ tsɔɔe kɛɛ ɔ? Kaa amaga, loo niye ní nɛ a haa amaga a he hia lo?

²⁰ Dɛbi! Nɔ́ nɛ i ngɛ dee kɛkɛ ji, bɔ nɛ wɔ jali sãã a, mumi yayamihi a sãã ngɔ haa, se pi Mawu. Nɛ i sume kaa nyɛɛ kɛ mumi yayamihi nɛ bɔ huɛ.

²¹ Nyɛ be nyɛe maa nu Nyɔmtsɛ ɔ kplu ɔ, nɛ́ nyɛ ma ya nu mumi yayamihi hu a kplu. Nyɛ be nyɛe maa ye ní ngɛ Nyɔmtsɛ ɔ we okplɔɔ ɔ he, nɛ nyɛɛ kɛ mumi yayamihi hu ma ya ye ní.

²² Pe wa ngɛ hlae nɛ waa wo Nyɔmtsɛ ɔ mi mi la nɛ e je hunga lo? Anɛ wa he wa pe lɛ lo?

²³ Nyɛ deɔ ke, “Wa ngɛ he blɔ kaa wa peeɔ nɔ́ tsuaa nɔ́.” Saminya! Se pi nɔ́ tsuaa nɔ́ nɛ he ngɛ se nami. “Wa ngɛ he blɔ kaa wa peeɔ nɔ́ tsuaa nɔ́.” Niinɛ! Se pi nɔ́ tsuaa nɔ́ peemi nɛ ma ha Kristo asafo ɔ maa ya nɔ.

²⁴ Nɔ ko nɔ ko nɛ kó hla kaa e hi ha lɛ nɔ kake too; nɔ tsuaa nɔ nɛ susu e nyɛmi hu he.

²⁵ Lo tsuaa lo nɛ a ngɛ juae ɔ, nyɛ ma nyɛ ye faa; enɛ ɔ peemi kó hao nyɛ he nile.

²⁶ Ejakaa ngmami ɔ ke, “Je ɔ, kɛ e mi níhi tsuo ɔ, Nyɔmtsɛ ɔ nɔ́.”

²⁷ Ke nihi nɛ he we yi ɔ a ti nɔ ko tsɛ nyɛ ní yemi, nɛ nyɛ ya a, nɔ́ tsuaa nɔ́ nɛ a kɛ maa ma nyɛ hɛ mi ɔ, nyɛɛ ye nɛ nyɛ he nile ko hao nyɛ kulaa.

²⁸ Se ke nɔ ko de nyɛ ke, “Niye ní nɛ ɔ, a kɛ sã bɔ ha amaga” a, lɔ ɔ lɛɛ nyɛ ko ye. Pi nyɛ nitsɛmɛ, loo nyɛ he nile he je nɛ i ngɛ nyɛ enɛ ɔ dee, se nɔ kpa a nɛ de nyɛ lo ɔ he sane ɔ, lɛ mohu e he nile he je.

²⁹ Ee, nɔ ɔ he nile nɛ i ngɛ tsɔɔe ɔ nɛ; pi nyɛ nitsɛmɛ nyɛ he nile. Nɔ ko ma bi ke, “He blɔ nɛ i ngɛ kaa i peeɔ nɔ́ tsuaa nɔ́ nɛ i suɔ ɔ, mɛni he je nɔ kpa he nile maa tsɔɔ mi bɔ nɛ imi ma plɛ kɛ tsu jamɛ a he blɔ ɔ he ní ha?

³⁰ Ke i nyɛ gbaa niye ní nɔ nɛ i ye ɔ, mɛni he je nɔ ko tuɔ ye he munyu yaya ngɛ niye ní nɛ i na Mawu si ngɛ he ɔ he?”

³¹ Lɔ ɔ he ɔ, nɔ́ tsuaa nɔ́ nɛ nyɛ ngɛ pee ɔ, ní nyɛ ngɛ yee jio, ní nyɛ ngɛ nue jio, nyɛɛ pee lɛ tsuo kɛ wo Mawu hɛ mi nyami.

³² Nyɛ ko pee nɔ́ ko nɛ sɛ kɛ si Yuda no ko, loo ma je no ko, loo Mawu we asafo ɔ.

³³ Nyɛ wo ye nane. Nɔ́ tsuaa nɔ́ mi ɔ, i bɔɔ mɔde kaa ma sa nihi tsuo a hɛ mi. I susuu we imi nɔ kake too ye he, se mohu i hlaa kaa e hi ha nɔ tsuaa nɔ, konɛ a he a yi wami.