Yuda 1 - Somi He Ɔ

¹ Yuda, nɛ ji Yesu Kristo sɔmɔlɔ kɛ Yakobo nyɛmi ɔ ngma ya ha nihi nɛ a tsɛ mɛ nɛ a pee mɛ klɔuklɔu ngɛ Tsɛ Mawu ɔ mi nɛ a ngɔ mɛ ngɔ to ha Yesu Kristo ɔ.

² Mɔbɔ nami kɛ he jɔmi kɛ suɔmi babauu ha nyɛ!

Lakpa tsɔɔli

³ Mamimɛ, akɛnɛ i ngɛ mɔde bɔe nitsɛ nɛ ma ngma nyɛ wɔ tsuo wa yi wami hemi ɔ he sane ɔ he je ɔ, i na kaa e sa nɛ ma ngma nɛ ma kɛ wo nyɛ he wami konɛ nyɛɛ plee hemi kɛ yemi nɛ a tu ngɔ wo klɔuklɔu bi ɔmɛ a dɛ mi si kake nyɔngloo ɔ he.

⁴ Ejakaa ni komɛ ju si kɛ sɛ mi, nihi nɛ blema lokoo a je nɛ a ngma a he sane ngɔ fɔ si ha kikɛmɛ a fɔ bumi nɛ, nɔ yaya peeli nɛ ngɔɔ wa dloomi ɔ kɛ bɔɔ ajuama, nɛ a kuaa Mawu nɛ ji nɔ yelɔ kake pɛ ɔ, kɛ wa Mawetsɛ Yesu Kristo ɔ.

⁵ Nyɛ le enɛ lɛɛ, se i ngɛ hlae nɛ ma kai nyɛ, kaa benɛ Nyɔmtsɛ je e ma a kɛ je Mizraim ɔ, lɔ ɔ se ɔ, e kpata nihɛmɛ nɛ he we yi ɔmɛ a hɛ mi.

⁶ Nɛ hiɔwe bɔfohi hu nɛ hɛɛ we mɛ nitsɛmɛ a nɔkɔtɔma yemi ɔ mi, se mohu a je mɛ nitsɛmɛ a si himi he ɔ, e kɛ neneene kpahi fi mɛ ngɔ to diblii tsitsliitsli mi ha Ligbi ngua a nɔ kojomi ɔ.

⁷ Nyɛ kai Sodoma kɛ Gomora kɛ mahi nɛ bɔle mɛ nɛ a bɔ ajuama nɛ a nyɛɛ he lo se hluu kaa bɔfo ɔmɛ nɔuu ɔ; a neneene la ami hiɔwo nɛ a naa a ngɛ kaa okadi ko kɛ ha nihi tsuo.

⁸ Ja nɔuu ni nɛ ɔmɛ hu bleɔ he lo ɔ ngɛ a nlamihi a mi, nɛ a gbee Mawu nɔ yemi ɔ he guɛ, nɛ a tuɔ bɔfohi a he munyu yaya.

⁹ Se bɔfo nɔkɔtɔma Mikael tete po, pee we enɛ. E kɛ abosiami pɛ nɛ e kɛ lɛ sa nya ngɛ Mose flu ɔ he. Mikael gbiɛ́ abosiami kɛ musu bɔmi munyu ko, se mohu e ke: “Nyɔmtsɛ ɔ nɛ kã o hɛ mi!”

¹⁰ Se ni nɛ ɔmɛ tuɔ munyu siɔ nihi kulaa nɛ a li, se nihi nɛ a le ngɛ a fɔmi su ɔ nya kaa lohwehi nɛ li ni ɔ, kɔlɔ ɔmɛ nɔuu lɛ kpataa a hɛ mi.

¹¹ Musu tloo mɛ! a ngɔ Kain blɔ ɔ, nɛ a kɛ a he ya wo Bileam sisimi he hiɔwo ɔ mi, nɛ Kora atua tsɔmi ɔ mi a hɛ mi kpata ngɛ.

¹² Ni nɛ ɔmɛ ji nihi nɛ woɔ nyɛ suɔmi niye ni ɔ he mu, ejakaa a kɛ nyɛ yeɔ ni nɛ zo pee we mɛ; a lɛɛ mɛ nitsɛmɛ a he. A ngɛ kaa bɔku nɛ nyu be mi nɛ kɔɔhiɔ kpakaa kɛ bɔleɔ si, tsohi nɛ a yi ba amɛ wɔle nɛ a wui yiblii; a gbo si enyɔ nɛ a hia mɛ kɛ a sipokuhi.

¹³ A ngɛ kaa wo mi oslɔkehi hulɔ nɛ ngɛ hamahama nɛ jeɔ mɛ nitsɛmɛ a zo ni ɔmɛ ngɔ pueɔ he. A ngɛ ka dodoehi nɛ laa blɔ, nihi nɛ Mawu dla diblii tsitsliitsli ɔ ngɔ to kɛ yaa neneene ɔ.

¹⁴ Nimli nɛ ɔmɛ a he nɛ Henok nɔ nɛ ji nɔ kapaago kɛ je Adam nɔ ɔ gba ngɛ ke: “Oʼɛ, Nyɔmtsɛ ɔ ma kɛ e klɔuklɔu bihi akpe nyɔngma nyɔngmahi abɔ,

¹⁵ nɛ e maa kojo nimli tsuo, nɛ e ma ka nɔ yayami peeli ngɛ a ni yayami hi tsuo nɛ a tsu ɔ kɛ musu bɔmi munyu tsuo nɛ yayami peeli Mawu kuali tu ngɛ Mawu he ɔ he.”

¹⁶ Nimli nɛ ɔmɛ ji nihi nɛ tuɔ munyu yaya, sieku yeli kɛ nɔ piali nɛ nɔ muɛ́ a hɛ nɛ a nyɛɛ mɛ nitsɛmɛ a kɔnɔ yayahi a se; a peɔ nya puu, nɛ a gbee nimli a yi mi ngɛ se nami he.

Kɔkɔbɔmi kɛ nitsɔɔmi

¹⁷ Se, mamimɛ, nyɛɛ lɛɛ nyɛ kai munyuhi nɛ wa Mawetsɛ Yesu Kristo bɔfo ɔmɛ tu sa a;

¹⁸ ejakaa a de nyɛ ke: “Nyagbe be ɔ mi ɔ, nɔ he fɛu yeli nɛ nyɛɛ ngɛ mɛ nitsɛmɛ a kɔnɔ yaya amɛ a nya a maa ba.”

¹⁹ Nimli nɛ ɔmɛ ji nihi nɛ kɛ mi gbami baa a nɛ, he lo mi nimli nɛ be mumi.

²⁰ Se, mamimɛ, nyɛɛ lɛɛ, nyɛ ha nyɛ nane nɛ pi si ngɛ hemi kɛ yemi nɛ ngɛ klɔuklɔu pe kulaa a mi, nɛ nyɛɛ sɔle ngɛ Mumi Klɔuklɔu ɔ mi,

²¹ nɛ nyɛɛ to nyɛ he ngɛ Mawu suɔmi ɔ mi, nɛ nyɛɛ hyɛ wa Mawetsɛ Yesu mɔbɔ nami ɔ blɔ, konɛ nyɛ na neneene wami.

²² Nyɛɛ na ninɛmɛ nɛ a yi mi peɔ mɛ kɔsikɔsi ɔ mɔbɔ:

²³ nyɛ je mɛ kɛ je la a mi. Nyɛɛ na ni kpahi hu mɔbɔ kɛ mɔbɔ nami nɛ gbeye yemi ngɛ mi; se nyɛɛ hie sa tade nɛ a kɛ he lo akɔnɔ wo lɛ mu ɔ.

Yijemi sɔlemi

²⁴ Lɛ, nɔ nɛ e ngɛ he wami nɛ e kɛ maa bu nyɛhe nɛ nyɛ ko tɛ si, nɛ e kɛ nyɛ ya da e nyami ɔ hɛ mi nɛ piami ko ko hi nyɛ he ngɛ bua jɔmi mi ɔ,

²⁵ Mawu nɛ ji ni lelɔ kake kɛ wa yi wami helɔ ngɛ Yesu Kristo wa Mawetsɛ ɔ he ɔ, lɛ a ngɔ hɛ mi nyami kɛ agboje, nɔ yemi kɛ he blɔ kulaa ngɔ ha jehanɛ kɛ daa. Amen.