Yohane 9 - Somi He Ɔ

Yesu tsa nyumu ko nɛ a fɔ lɛ hɛyuyuilɔ

¹ Benɛ Yesu bee ɔ, e na nyumu ko nɛ e hɛ yu kɛ je e fomi mi.

² Nɛ e kaseli ɔmɛ bi lɛ ke: “Rabi, mɛnɔ lɛ pee yayami, nɔ nɛ ɔ loo e fɔli, he je nɛ a fɔ lɛ hɛ yuyuilɔ nɛ ɔ?”

³ Yesu he nɔ ke: “Tsa pi nɔ nɛ ɔ loo e fɔli nɛ pee yayami, se mohu benɛ pee nɛ Mawu ni tsumi ɔmɛ nɛ na je po ngɛ e mi he je.

⁴ Wɔɔ lɛɛ, nɛ je na nɛ ɔ ɔ, ja wa tsu nɔ nɛ tsɔ wɔ ɔ ni tsumi ɔmɛ; je maa jɔ, benɛ nɔ ko be ni nyɛe ma tsu hu.

⁵ Be abɔ nɛ i ngɛ je ɔ mi nɛ ɔ, je ɔ la ji mi.”

⁶ Benɛ e de enɛ ɔ ɔ, e la lada ngɔ fɔ si, nɛ e kɛ lada a pɔtɔ zu, nɛ e ngɔ zu ɔ ngɔ ha hɛ yuyuilɔ ɔ hɛngmɛ nɔ,

⁷ nɛ e de lɛ ke: “Yaa du ngɛ Siloam (e sisi ji: nɔ nɛ a tsɔ lɛ) taku ɔ mi.” Kɛkɛ nɛ e ho nɛ e ya du, nɛ e ba nɛ e ngɛ nɔ hyɛe.

⁸ Kɛkɛ nɛ e kpɔ mi bi kɛ nihi nɛ na lɛ sa kaa nɔ balɔ ji lɛ ɔ de ke: “Anɛ pi nɔ nɛ jinɛ e hii si nɛ e baa nɔ ɔ ji nɛ ɔ?”

⁹ Ni komɛ ke “lɛ ʼi;” ni komɛ hu ke: “E je lɛ;” lɛ nitsɛ lɛɛ e ke: “Ami ʼi.”

¹⁰ Lɔ ɔ he ɔ a bi lɛ ke: “Kɛ pee kɛɛ nɛ o hɛngmɛ bli ɔ?”

¹¹ E he nɔ ke: “Nyumu ko nɛ a tsɛɛ lɛ Yesu ɔ lɛ pɔtɔ zu, nɛ e kɛ ha ye hɛngmɛ nɔ, nɛ e de mi ke: ‘Yaa Siloam taku ɔ mi nɛ o ya du.’ Nɛ benɛ i ya nɛ i ya du ɔ, i hyɛ nɔ.”

¹² Kɛkɛ nɛ a bi lɛ ke: “Jije e ngɛ?” E de mɛ ke: “I li.”

Farisifo ɔmɛ bi tsami ɔ he munyu

¹³ Kɛkɛ nɛ a kɛ nɔ nɛ sa nɛ e hɛ yu ɔ yɛ Farisifo ɔmɛ a ngɔ.

¹⁴ Se ligbi nɛ Yesu pɔtɔ zu nɛ e kɛ bli nyumu ɔ hɛngmɛ ɔ, Hejɔɔmi Ligbi ʼi.

¹⁵ Kɛkɛ nɛ Farisifo ɔmɛ hu kpale bi lɛ bɔ nɛ pee nɛ e hyɛ nɔ ɔ. Nɛ e de mɛ ke: “Zu nɛ a pɔtɔ e kɛ ha ye hɛngmɛ ɔ nɔ, nɛ i ya du, nɛ i ngɛ nɔ hyɛe nɛ ɔ nɛ.”

¹⁶ Lɔ ɔ he ɔ Farisifo ɔmɛ a ti ni komɛ de ke: “Nyumu nɛ ɔ ji Mawu ngɔ, ejakaa e yi Hejɔɔmi Ligbi ɔ.” Ni komɛ hu ke: “Kɛ nɔmlɔ ko nɛ ji yayami peelɔ maa pee kɛɛ nɛ e ma nyɛ okadihi kaa enɛ ɔmɛ pee?” Nɛ migbami ba a kpɛti.

¹⁷ Kɛkɛ nɛ a bi hɛ yuyuilɔ ɔ ke: “Mo hu kɛ o ngɛ dee ngɛ e he kɛɛ, akɛnɛ e bli o hɛngmɛ ɔ?” Nɛ e ke: “Gbalɔ ji lɛ.”

¹⁸ Se Yudafo ɔmɛ he we yi kaa hɛ yuyuilɔ ji lɛ sa loko e ngɛ nɔ hyɛe nɛ ɔ kɛ ya su be nɛ a ya tsɛ nɔ nɛ hyɛ nɔ ɔ fɔli,

¹⁹ nɛ a bi mɛ ke: “Anɛ nyɛ bi ɔ nɛ nyɛ deɔ ke a fɔ lɛ hɛ yuyuilɔ ɔ ji nɛ ɔ lo? Kɛ pee kɛɛ nɛ jeha nɛ ɔ e ngɛ nɔ hyɛe nɛ ɔ?”

²⁰ E fɔli ɔmɛ he nɔ ke: “Wa le kaa wa bi ɔ ji nɛ ɔ nɛ; wa le kaa a fɔ lɛ hɛ yuyuilɔ;

²¹ se bɔ nɛ pee nɛ e ngɛ nɔ hyɛe jeha nɛ ɔ ɔ, lɛɛ wa li; jeha nɛ ɔ hu, nɔ nɛ bli e hɛngmɛ ɔ, wa li; nyɛ bi lɛ, e wa, lɛ nitsɛ e maa tu munyu ha e he.”

²² E fɔli ɔmɛ de enɛ ɔ ejakaa a ngɛ Yudafo ɔmɛ gbeye yee. Se Yudafo ɔmɛ so ngɔ to kaa, ke nɔ ko gba mi de ke, lɛ ji Kristo ɔ, a maa fie lɛ kɛ maa je kpe he ɔ.

²³ Lɔ ɔ he nɛ e fɔli ɔmɛ de ke: “E wa, nyɛ bi lɛ nitsɛ” ɔ nɛ.

²⁴ Kɛkɛ nɛ a tsɛ nyumu nɛ sa nɛ e ji hɛ yuyuilɔ ɔ, nɔ́ nɛ ji si enyɔ, nɛ a de lɛ ke: “Ngɔɔ hɛ mi nyami ngɔ ha Mawu; se wɔɔ lɛɛ wa le kaa nɔmlɔ nɔ yayami peelɔ ji lɛ.”

²⁵ Kɛkɛ nɛ e he nɔ nɛ e de mɛ ke: “Yayami peelɔ ji lɛ jio, i li; nɔ́ kake i le, kaa jinɛ hɛ yuyuilɔ ji mi, se jeha nɛ ɔ i ngɛ nɔ hyɛe.”

²⁶ Nɛ a bi lɛ ekohu ke: “Mɛni e pee mo? Kɛ pee kɛɛ nɛ e bli o hɛngmɛ ɔ?”

²⁷ E he nɔ nɛ e ke: “I de nyɛ momo, nɛ nyɛ nui; mɛni he je nyɛ ngɛ hlae nɛ nyɛɛ bu tue ekohu? Anɛ nyɛ hu nyɛ suɔ kaa nyɛ ma plɛ e kaseli lo?”

²⁸ A je lɛ ke: “Mo ji e kaselɔ, se wɔɔ lɛɛ Mose kaseli ji wɔ.

²⁹ Wa le kaa Mawu kɛ Mose tu munyu; se nɔ nɛ ɔ lɛɛ, wa li he nɛ e je.”

³⁰ Nyumu ɔ he nɔ nɛ e de mɛ ke: “Ei, enɛ ɔ ji nɔ́ nɛ ngɛ nyakpɛ ɔ nɛ, kaa nyɛ li he nɛ e je, nɛ kɛ̃ ɔ e bli ye hɛngmɛ!

³¹ Wa le kaa Mawu bui yayami peeli tue; se ke nɔ ko yee lɛ gbeye nɛ e peɔ e suɔmi nya ni ɔ, e buɔ lɛ tue.

³² Kɛ je nɛ a bɔ je ɔ nɛ ɔ, a nui hyɛ kaa nɔ ko bli nɔ nɛ a fɔ lɛ hɛ yuyuilɔ hɛngmɛ gblee.

³³ Kãa nɔ nɛ ɔ ji Mawu ngɔ ɔ, jinɛ e be nyɛe nɔ́ ko maa pee.”

³⁴ A he nɔ nɛ a de lɛ ke “Moo lɛɛ, yayami mi nitsɛ a fɔ mo ngɛ, nɛ mo mohu o ngɛ wɔ ni tsɔɔe nɛ ɔ?” Nɛ a fie lɛ kɛ je kpe he ɔ.

Mumi mi hɛyumi

³⁵ Yesu nu kaa a fie lɛ; nɛ benɛ e na lɛ ɔ, e bi lɛ ke: “O heɔ Mawu Bi ɔ nɔ yeɔ lo?”

³⁶ E he nɔ ke: “Mɛnɔ ji lɛ, Mawetsɛ, konɛ ma he e nɔ ma ye?”

³⁷ Yesu de lɛ ke: “O na lɛ momo, nɛ jeha nɛ ɔ, nɔ nɛ kɛ mo ngɛ munyu tue ɔ, lɛ nɔuu ʼi.”

³⁸ Nɛ e ke: “I heɔ yeɔ, Mawetsɛ;” nɛ e ja lɛ.

³⁹ Nɛ Yesu ke: “Kojomi he nɛ i ba je nɛ ɔ mi ngɛ, konɛ nihi nɛ hyɛ we nɔ ɔ, a hyɛ, nɛ nihi nɛ ngɛ hyɛe ɔ, a plɛ hɛ yuyuli.”

⁴⁰ Nɛ Farisifo ɔmɛ a ti ni komɛ nɛ ngɛ lejɛ ɔ nu enɛ ɔ, nɛ a bi lɛ ke: “Anɛ wɔ hu wa hɛ yu lo?”

⁴¹ Yesu de mɛ Ke: “Kaa nyɛ hɛ yu mohu ɔ, jinɛ yayami be nyɛ he; se jeha nɛ ɔ nyɛ deɔ ke: ‘Wa ngɛ nɔ hyɛe;’ lɔ ɔ he ɔ nyɛ he yayami ɔ ngɛ nyɛ he kɛ mwɔɔ.”