Yohane 7 - Somi He Ɔ

Yesu kɛ e nyɛmimɛ nyumu ɔmɛ

¹ Enɛ ɔ se ɔ, Yesu kpa si ngɛ Galilea, se e sume kaa e ya kpaa si ngɛ Yudea ejakaa Yudafo ɔmɛ ngɛ lɛ hlae nɛ a gbe.

² Jeha nɛ ɔ Yudafo ɔmɛ a ba tsuhi nyami ligbi ɔ su ta.

³ Lɔ ɔ he ɔ Yesu nyɛmimɛ ɔmɛ de lɛ ke: “Jee hiɛ ɔ nɛ o ya Yudea, konɛ o kaseli ɔmɛ hu a na nihi nɛ o tsuo ɔmɛ.

⁴ Ejakaa nɔ nɛ hlaa kaa a le lɛ ɔ pee we nɔ́ ko ngɛ laami mi. Ke ni nɛ ɔmɛ o peɔ ɔ, je o he si ngɔ tsɔɔ je ɔ.”

⁵ Se e nyɛmimɛ ɔmɛ tete he we e nɔ yi.

⁶ Kɛkɛ nɛ Yesu de mɛ ke: “Ye be sui lolo, se nyɛɛ lɛɛ nyɛ be ɔ daa nɛ ɔ e su.

⁷ Je ɔ be nyɛe nyɛ maa nyɛ, se imi lɛɛ e nyɛɛ mi, ejakaa i yeɔ e he odase kaa e ni tsumi ɔmɛ ɔ ni tsumi yayamihi ʼi.

⁸ Nyɛɛ lɛɛ nyɛɛ ya nyami ligbi nɛ ɔ yemi se imi lɛɛ i na we ma ya, ejakaa ye be ɔ sui lolo.”

⁹ Benɛ e de mɛ ja a, e hi si bɔɔ ko ngɛ Galilea.

Yesu ya ba tsuhi nyami ligbi ɔ yemi

¹⁰ Se benɛ e nyɛmimɛ ɔmɛ ho ɔ, lɔ ɔ se loko lɛ hu e ya nyami ligbi ɔ, se e je we e he si, se mohu kaa laami mi.

¹¹ Jeha nɛ ɔ Yudafo ɔmɛ bɔni lɛ hlami ngɛ nyami ligbi ɔ nɔ, nɛ a ke: “Jije e ngɛ?”

¹² Nɛ munyu kusikusi fuu ba asafo ɔmɛ a mi ngɛ Yesu he. Ni komɛ de ke: “Nɔmlɔ kpakpa ji lɛ;” nɛ ni komɛ hu ke: “Dɛbi, blɔ mohu e haa asafo ɔ tlaa.”

¹³ Pohu nɔ ko ji paa tui e he munyu ngɛ Yudafo ɔmɛ a gbeye yemi he.

¹⁴ Benɛ e su nyami ligbi ɔmɛ a kpɛti ɔ, Yesu ya sɔlemi we ɔ, nɛ e ya tsɔɔ ni.

¹⁵ Nɛ Yudafo ɔmɛ a nyɛ kpɛ a he nɛ a de ke: “Kɛ nɔ nɛ ɔ nɛ kase we ni ɔ pee kɛɛ nɛ e le womihi a mi nihi nɛ ɔ?”

¹⁶ Yesu he nɔ nɛ e de mɛ ke: “Ye ni tsumi ɔ, tsa pi ye nɔ, se mohu nɔ nɛ tsɔ mi ɔ nɔ.

¹⁷ Ke nɔ ko suɔ kaa e pee e suɔmi nya ni ɔ, lɛ ji nɔ nɛ ma yo ngɛ tsɔɔmi ɔ he kaa Mawu dɛ mi e je aloo imi nitsɛ ye yi mi i toɔ nɛ i tuɔ munyu.

¹⁸ Nɔ nɛ toɔ lɛ nitsɛ e yi mi nɛ e tuɔ munyu ɔ, lɛ nitsɛ e hɛ mi nyami e ngɛ hlae, se nɔ nɛ hlaa nɔ nɛ tsɔ lɛ ɔ hɛ mi nyami ɔ, lɛɛ anɔkualetsɛ ji lɛ, nɛ nɔ́ nɛ dɛ blɔ ko be e mi.

¹⁹ Anɛ pi Mose nɛ ha nyɛ Mlaa a lo? Nɛ nyɛ ti nɔ ko yi Mlaa a nɔ. Mɛni he je nyɛ ngɛ mi hlae nɛ nyɛ maa gbe ɔ?”

²⁰ Asafo ɔ he nɔ nɛ a ke: “Mumi yayami ngɛ o mi; mɛnɔ ngɛ mo hlae nɛ e gbe?”

²¹ Yesu he nɔ nɛ e de mɛ ke: “Ni tsumi kake i tsu nɛ nyɛ tsuo nyɛ nya kpɛ nyɛ he ngɛ he.

²² Mose lɛ ngɔ nɔ pomi ha nyɛ (pi kaa lɛ Mose ɔ ngɔ e je, se mohu e je tsɛmɛ ɔmɛ a ngɔ), nɛ Hejɔɔmi Ligbi ɔ nɔ ɔ, nyɛ poo nɔ.

²³ Ke Hejɔɔmi Ligbi ɔ nɔ ɔ a poo nɔ benɛ pee nɛ a ko tɔ Mose Mlaa a, mɛni he ne nyɛ mi mi fuɔ mi kaa i tsa nɔmlɔ mluku ɔ ngɛ Hejɔɔmi Ligbi ɔ nɔ ɔ?

²⁴ Nyɛ ko hyɛ hɛ mi kɛ kojo, se mohu nyɛɛ kojo dami kojomi.”

Anɛ lɛ ji Mesia a lo?

²⁵ Kɛkɛ nɛ Yerusalembi ɔmɛ a ti ni komɛ ke: “Anɛ pi nɔ nɛ a ngɛ hlae nɛ a gbe ɔ ji nɛ ɔ lo?

²⁶ Nɛ oʼɛ, munyu e ngɛ tue pãa nɛ ɔ nɛ, nɛ a de we lɛ nɔ ko. Eko ɔ be nɛ ɔ mi ɔ, nikɔtɔma amɛ ba na le kaa Kristo ɔ ji nɔ nɛ ɔ niinɛ.

²⁷ Se nɔ nɛ ɔ lɛɛ wa le he nɛ e je; se Kristo ɔ lɛɛ, benɛ e maa ba a, nɔ ko be lee he nɛ e je.”

²⁸ Jeha nɛ ɔ benɛ Yesu ngɛ ni tsɔɔe ngɛ sɔlemi we ɔ, e wo e nya nɔ nɛ e de ke: “Nyɛ le mi, nɛ nyɛ le he nɛ i je hulɔ; i tui imi nitsɛ ye yi mi kɛ bɛ́, se mohu anɔkualetsɛ ji nɔ nɛ tsɔ mi nɛ nyɛ li ɔ nɛ.

²⁹ Se imi lɛɛ i le lɛ, ejakaa e ngɔ i je nɛ lɛ lɛ tsɔ mi.”

³⁰ Enɛ ɔ he ɔ, a ngɛ lɛ hlae nɛ a nu, se nɔ ko tɛ́ e he, ejakaa e ngmlɛfia a sui lolo.

³¹ Se asafo ɔmɛ a ti nihi fuu he e nɔ ye, nɛ a ke: “Benɛ Kristo maa ba a, anɛ e maa pee okadihi fuu pe nihi nɛ nɔ nɛ ɔ ngɛ pee nɛ ɔmɛ lo?”

A tsɔ nɛ a ya nu Yesu

³² Farisifo ɔmɛ nu kaa asafo ɔ ngɛ ni nɛ ɔmɛ dee kusikusi ngɛ e he; nɛ Farisifo ɔmɛ kɛ osɔfo nikɔtɔma amɛ tsɔ tsɔli konɛ a ya nu lɛ.

³³ Kɛkɛ nɛ Yesu de mɛ ke: “Be bɔɔ ko pɛ e piɛ nɛ i kɛ nyɛ maa hi si, nɛ ma ya nɔ nɛ tsɔ mi ɔ ngɔ.

³⁴ Nyɛ ma hia mi, se nyɛ be mi nae, nɛ he nɛ i ngɛ ɔ, nyɛ be lejɛ ɔ nyɛe maa ba.”

³⁵ Lɔ ɔ he ɔ Yudafo ɔmɛ bi a he ke: “Jije nɔ nɛ ɔ maa ya nɛ wa be lɛ nae? Anɛ nihi nɛ gbɛ fia Helabi ɔmɛ a kpɛti ɔ ngɔ e maa ya nɛ e ya tsɔɔ Helabi ɔmɛ a ni lo?

³⁶ Mɛni munyu e tu nɛ ɔ: ‘Nyɛ ma hla mi nɛ nyɛ be mi nae, nɛ he nɛ i ngɛ ɔ, nyɛ be lejɛ ɔ nyɛe maa ba’ a?”

Wami pa

³⁷ Nyagbe ligbi nɛ ji nyami ligbi ɔmɛ a kpɛti ligbi ngua a nɔ ɔ, Yesu ya da si nɛ e wo e nya nɔ nɛ e de ke: “Ke kuma ngɛ nɔ ko tɔe ɔ, e ba ye ngɔ nɛ e ba nu nyu;

³⁸ nɔ nɛ heɔ ye nɔ yeɔ ɔ, — bɔ nɛ ngmami ɔ de ɔ, wami pahi maa je e muklii mi kɛ be.

³⁹ Mumi ɔ nɛ nihi nɛ heɔ e nɔ yeɔ ɔ ma na a he nɛ e de enɛ ɔ ɔ nɛ; se Mumi Klɔuklɔu ɔ na we nɛ e ba, ejakaa a na we nɛ a wo Yesu hɛ mi nyami.

Ni ɔmɛ a kpɛti gba

⁴⁰ Benɛ asafo ɔmɛ a kpɛti ni komɛ nu munyu nɛ ɔ ɔ, a ke: “Gbalɔ ɔ ji nɛ ɔ nɛ niinɛ.”

⁴¹ Ni komɛ ke: “Kristo ɔ ji nɛ ɔ nɛ.” Se ni kpa komɛ hu ke: “Anɛ Kristo ɔ, Galilea e maa je lo?

⁴² Anɛ ngmami ɔ de we ke: ‘David powu ɔ mi kɛ Betlehem ma, he nɛ David hi ɔ, lejɛ ɔ Kristo ɔ maa je’ lo?”

⁴³ Kɛkɛ nɛ migbami ba asafo ɔ mi ngɛ e he.

⁴⁴ Se jinɛ a ti ni komɛ ngɛ hlae nɛ a nu lɛ, se kɛ ɔ, nɔ ko nyɛ we e he nɛ e ta.

Yudafo ɔmɛ a nikɔtɔmahi nɛ he we yi ɔ

⁴⁵ Kɛkɛ nɛ tsɔli ɔmɛ kpale a se kɛ ho osɔfo nikɔtɔma amɛ kɛ Farisifo ɔmɛ a ngɔ ya, nɛ a bi mɛ ke: “Mɛni he je nɛ nyɛɛ kɛ lɛ bɛ ɔ?”

⁴⁶ Tsɔli ɔmɛ he nɔ ke: “Bɔ nɛ nɔmlɔ nɔ ngɛ munyu tue ɔ, nɔ ko tui munyu ja gblee.”

⁴⁷ Kɛkɛ nɛ Farisifo ɔmɛ he nɔ ke: “Anɛ nyɛ hu a mlɔɔ nyɛ?

⁴⁸ Anɛ nyɛ na nɛ nikɔtɔma amɛ loo Farisifo ɔmɛ a ti nɔ ko he e nɔ ye?”

⁴⁹ Se asafo nɛ li mlaa nɛ ɔ, a gbiɛ mɛ.

⁵⁰ Nikodemo, a kpɛti nɔ kake nɛ ba Yesu ngɔ be ko ɔ, he nɔ nɛ e de mɛ ke:

⁵¹ “Ke a nui nɔ ko nya mi gbi nɛ a le nɔ́ nɛ e pee ɔ, wa Mlaa a buu lɛ fɔ lo?”

⁵² A he nɔ, nɛ a de lɛ ke: “Anɛ mo hu Galilea o je lo? Hla mi nɛ o hyɛ, se gbalɔ ko ti si kɛ ji Galilea hyɛ.” [

⁵³ Nɛ a ti nɔ tsuaa nɔ ho e we mi ya.