Yohane 5 - Somi He Ɔ

Yesu tsa nyumu ko

¹ Enɛ ɔ se ɔ Yudafo ɔmɛ ngɛ nyami ligbi yee, nɛ Yesu ya Yerusalem.

² Jeha nɛ ɔ taku ko ngɛ Yerusalem ngɛ tohi agbo ɔ kasa nya, nɛ Hebri gbi mi ɔ a tsɛɛ lɛ Betesda, nɛ kue enuɔ ngɛ he.

³ Enɛ ɔmɛ a mi hiɔtsɛmɛ fuu, hɛ yuyuili, pɔtsɛmɛ kɛ ninɛmɛ nɛ hule pueɔ si ngɛ, [nɛ a ngɛ nyu ɔ mi klemi mlɛe.

⁴ Ejakaa be komɛ ɔ, hiɔwe bɔfo ko kpleɔ si kɛ baa taku ɔ mi, nɛ e ba klɛɔ nyu ɔ mi; kɛkɛ ɔ, o mi klemi ɔ se ɔ, nɔ tsuaa nɔ nɛ ya nɔɔ nyu ɔ mi kekle ɔ, hiɔ tsuaa hiɔ nɛ ngɛ e he ɔ tãa.]

⁵ Nyumu ko ngɛ lejɛ ɔ nɛ hiɔ hɛɛ lɛ jeha nyingmi etɛ kɛ kpaanyɔ.

⁶ Nɛ benɛ Yesu na lɛ nɛ e fɔɔ si, nɛ e le kaa e se kɛ hluu ɔ, e bi lɛ ke: “O suɔ kaa o na he wami lo?”

⁷ Hiɔtsɛ ɔ he nɔ ke: “Mawetsɛ, i be nɔ ko nɛ ke a ba klɛ nyu ɔ mi nɛ e ma wo mi ya fɔ taku ɔ mi; se ke i yaa a, nɔ kpa sɛɛ ye hlami ya nɔɔ mi.”

⁸ Yesu de lɛ ke: “Tee si, wo o sa a nɛ o nyɛɛ!”

⁹ Nɛ amlɔ ɔ nɔmlɔ ɔ he mi wa lɛ, nɛ e wo e sa a, nɛ e nyɛɛ. Se lɛ ligbi ɔ Hejɔɔmi Ligbi ʼi.

¹⁰ Lɔ ɔ he ɔ Yudafo ɔmɛ de nɔ nɛ a tsa a ke: “Hejɔɔmi Ligbi ji nɛ ɔ nɛ; o be he blɔ kaa o tloɔ o sa.”

¹¹ E he nɔ ke: “Nɔ nɛ tsa mi ɔ, lɛ nɔuu lɛ de mi ke: ‘Wo o sa a nɛ o nyɛɛ.’ ”

¹² Jeha nɛ ɔ a bi lɛ ke: “Mɛnɔ ji nɔ nɛ de mo ke: ‘Wo o sa a nɛ o nyɛɛ’ ɔ?”

¹³ Se nɔ nɛ a tsa a li nɔ nɛ ji, ejakaa nihi fuu ngɛ lejɛ ɔ he je ɔ Yesu sã e he si.

¹⁴ Pee se ɔ Yesu ya na lɛ ngɛ sɔlemi we ɔ, nɛ e de lɛ ke: “Oʼɛ, o na he wami; koo pee yayami hu, kone nɔ́ ko yaya nɛ pe kekle nɔ́ ɔ ko ba o nɔ.”

¹⁵ Nyumu ɔ pue nɔ kɛ ho nɛ e ya sɛɛ ha Yudafo ɔmɛ ke Yesu ji nɔ nɛ tsa lɛ ɔ nɛ.

¹⁶ Lɔ ɔ he ɔ, Yudafo ɔmɛ je a hɛ ka Yesu, nɛ a ngɛ lɛ hlae nɛ a gbe, ejakaa Hejɔɔmi Ligbi ɔ nɔ e pee nɔ́ nɛ ɔ ngɛ ɔ nɛ.

¹⁷ Se Yesu he nɔ nɛ e de mɛ ke: “Tsaatsɛ ngɛ ni tsue kɛ mwɔɔ nɛ imi hu i ngɛ ni tsue.”

¹⁸ Enɛ ɔ he titli Yudafo ɔmɛ ngɛ lɛ hlae nɛ a gbe ɔ nɛ, ejaksaa pi Hejɔɔmi Ligbi ɔ kɛkɛ nɛ e ble, se mohu e tsɛ Mawu ke lɛ nitse e tsɛ, nɛ e kɛ Mawu sɔ.

Bi ɔ he blɔ nɛ e ngɛ

¹⁹ Lɔ ɔ he ɔ Yesu he nɔ nɛ e de mɛ ke: “I ngɛ nyɛ dee anɔkuale mi ke: Bi ɔ nitse be e yi mi nyɛe maa to kɛ pee nɔ ko, ja nɔ nɛ se naa kaa Tsɛ ɔ peɔ ɔ; ejakaa nihi tsuo nɛ Tsɛ ɔ peɔ ɔ, kɔlɔ ɔmɛ nɔuu Bi ɔ hu peɔ.

²⁰ Ejakaa Tsɛ ɔ suɔ Bi ɔ, nɛ e tsɔɔ lɛ nihi kulaa nɛ lɛ nitse e peɔ ɔ, nɛ e maa tsɔɔ lɛ ni tsumi nguahi nɛ pe enɛ ɔmɛ tete, nɛ nyɛ nya maa kpɛ nyɛ he.

²¹ Ejakaa bɔ nɛ Tsɛ ɔ tleɔ ni gbogboehi a si nɛ e haa mɛ wami ɔ, ja kɛ̃ Bi ɔ hu haa nihi nɛ e suɔ ɔ wami.

²² Ejakaa Tsɛ ɔ kojo we nɔ ko, se e tu kojomi ɔ tsuo ngɔ wo Bi ɔ dɛ;

²³ konɛ nihi tsuo bu Bi ɔ, kaa bɔ nɛ a buu Tsɛ ɔ. Nɔ nɛ bui Bi ɔ, e bui Tsɛ ɔ nɛ tsɔ lɛ ɔ hulɔ.

²⁴ “I ngɛ nyɛ dee anɔkuale mi ke: Nɔ nɛ nuɔ ye munyu nɛ e heɔ nɔ nɛ tsɔ mi ɔ yeɔ ɔ, e ngɛ neneene wami, nɛ e be kojomi mi yae, se mohu e po mi ngɛ gbenɔ mi kɛ ho wami mi ya.

²⁵ I ngɛ nyɛ dee anɔkuale mi ke: Ngmlɛfia a ma, nɛ e su ta, nɛ ni gbogboe ɔmɛ maa nu Mawu Bi ɔ gbi, nɛ nihi nɛ nuɔ ɔ yi ma na wa.

²⁶ Ejakaa bɔ nɛ Tsɛ ɔ ngɛ wami ngɛ lɛ nitse e mi ɔ, ja kɛ̃ e ha Bi ɔ hu ke e hi wami ngɛ lɛ nitse e mi.

²⁷ Nɛ e ha lɛ he blɔ kaa e kojo hulɔ, ejakaa Nɔmlɔ Bi ji lɛ.

²⁸ Enɛ ɔ ko pee nyɛ nyakpɛ; ejakaa ngmlɛfia a ma, nɔ́ mi nɛ nihi tsuo nɛ ngɛ yɔkɔ ɔmɛ a mi ɔ maa nu e gbi,

²⁹ nɛ a maa je kpo, nihi nɛ pee kpakpa a maa te si kɛ maa ya wami mi, nɛ nihi nɛ tsu ni yayahi ɔ maa te si kɛ maa ya kojomi mi.”

Yesu he odasefohi

³⁰ “Imi nitse i be ye yi mi nyɛe maa to kɛ pee nɔ ko; bɔ nɛ i nuɔ ɔ, ja i kojoɔ, nɛ ye kojomi ɔ dami kojomi ʼi, ejakaa i hia we nɔ́ nɛ imi nitsɛ i suɔ, se mohu nɔ nɛ Tsɛ ɔ nɛ tsɔ mi ɔ suɔ?

³¹ Ke imi nitsɛ ye he odase i yeɔ ɔ, ye odase ɔ pi anɔkuale.

³² Nɔ kpa ko ngɛ nɛ yeɔ ye he odase, nɛ i le kaa e odase nɛ e yeɔ ngɛ ye he ɔ anɔkuale ʼi!

³³ Nyɛɛ lɛɛ nyɛ tsɔ kɛ ya Yohane ngɔ, nɛ e ye anɔkuale ɔ he odase.

³⁴ Se imi lɛɛ i ngɔɛ nɔmlɔ ko odase; se benɛ pee nɛ a he nyɛ yi wami he je i ngɛ enɛ ɔmɛ dee ɔ nɛ.

³⁵ Yohane ji kane nɛ ngɛ tsoe nɛ ngɛ kpee ɔ nɛ, se nyɛɛ lɛɛ, nyɛ suɔ kaa nyɛ bua nɛ jɔ be kpiti kɛkɛ ngɛ e la a mi.

³⁶ Se imi lɛɛ, i ngɛ odase nɛ pe Yohane nɔ ɔ, ejakaa ni tsumi ɔmɛ nɛ Tsɛ ɔ ngɔ ha mi kaa ma gbe nya a, lɛ ni tsumi ɔmɛ nɛ i tsuɔ ɔ nɔuu yeɔ ye he odase kaa Tsɛ ɔ lɛ tsɔ mi.

³⁷ Nɛ Tsɛ ɔ nɛ tsɔ mi ɔ, lɛ nitsɛ e ye ye he odase. Nyɛ nui e gbi hyɛ ɔ, pohu nyɛ nɛ e subai hyɛ;

³⁸ nɛ e munyu ɔ nui si ngɛ nyɛ mi, ejakaa nya he we nɔ nɛ e tsɔ ɔ yi.

³⁹ Nyɛ hla ngmami ɔmɛ a mi; ejakaa nyɛ nitsɛmɛ nyɛ susuu kaa kɔlɔ ɔmɛ a mi nyɛ naa neneene wami ngɛ, nɛ kɔlɔ ɔmɛ nɔuu ji nihi nɛ yeɔ ye he odase ɔ nɛ.

⁴⁰ Se nyɛ sume kaa nyɛ baa ye ngɔ nɛ nyɛ na wami.

⁴¹ “I hla we nimli a hɛ mi nyami.

⁴² Se mohu i kpa nyɛ si kaa nyɛ be Mawu suɔmi ngɛ nyɛ mi.

⁴³ Imi lɛɛ i ba ngɛ Tsaatsɛ biɛ mi, nɛ nyɛ he we mi; ke nɔ kpa ko ba ngɛ lɛ nitsɛ e biɛ mi ɔ, lɛɛ nyɛ ma he lɛ.

⁴⁴ Nyɛ nɛ nyɛ ngɛ hɛ mi nyɛmi he hae ngɛ nyɛ kpɛti, se hɛ mi nyami nɛ jee Mawu kake too ɔ ngɔ ɔ lɛɛ nyɛ di se ɔ, kɛ maa pee kɛɛ nɛ nyɛ ma nyɛ he ye mɔ?

⁴⁵ Nyɛ ko susu kaa ma po nyɛ nya ngɔ ha Tsɛ ɔ; nɔ ko ngɛ nɛ ngɛ nyɛ nya poe, lɛ ji Mose, nɔ nɛ nɔ nɔuu nɛ nyɛ ngɔɔ nyɛ hɛ ngɔ fɔɔ ɔ.

⁴⁶ Se kaa nya he Mose ye jinɛ, imi hu nyɛ ma he mi ye; ejakaa ye he sane e ngma a nɛ.

⁴⁷ Se ke nyɛ he we e ngmami ɔmɛ yi ɔ, kɛ maa pee kɛɛ nɛ nyɛ ma he ye munyu ɔmɛ maa ye mɔ?”